નવી દિલ્હી : દિલ્હી પોલીસે દિલ્હીની કેટલીક શાળાઓમાં બોમ્બની ધમકીઓ મોકલવા બદલ ધોરણ 12ના વિદ્યાર્થીની અટકાયત કરી છે. આ વિદ્યાર્થીએ 23 જેટલી શાળાઓને બોમ્બની ધમકીના ઈમેલ મોકલ્યા હતા, જે પાછળથી ખોટા સાબિત થયા હતા.

  પોલીસ તપાસમાં સામે આવ્યું છે કે વિદ્યાર્થીએ જાણી જોઈને આ ધમકીઓ આપી હતી જેથી કરીને તે તેની આગામી પરીક્ષા ટાળી શકે. પોલીસના જણાવ્યા અનુસાર, આ વિદ્યાર્થીએ માત્ર તેની શાળાને જ નહીં પરંતુ અન્ય ઘણી શાળાઓને પણ ધમકીભર્યા ઈમેલ મોકલ્યા હતા.

  વિદ્યાર્થીએ આવું એટલા માટે કર્યું હતું કે તેની ઓળખ છૂપી રહે અને તે સરળતાથી પકડાઈ ન શકે. તેણે આયોજન કર્યું હતું કે આના કારણે શાળાઓ ખાલી કરાવવામાં આવશે અને તેની પરીક્ષાઓ રદ કરવામાં આવશે, જેથી તે પરીક્ષામાંથી છટકી શકે. તપાસ દરમિયાન એ વાત પણ સામે આવી હતી કે વિદ્યાર્થીએ તેના ઈમેલમાં બોમ્બથી ઉડાવી દેવાની ધમકી આપી હતી, જો કે બાદમાં આ ધમકીઓ સંપૂર્ણપણે ખોટી હોવાનું જાણવા મળ્યું હતું. જો કે, છેલ્લા કેટલાક મહિનામાં, દિલ્હીની શાળાઓ અને કોલેજોમાં આવી ધમકીઓના કિસ્સાઓ નોંધાયા હતા, જેના કારણે વિદ્યાર્થીઓ અને શિક્ષકોમાં ગભરાટ ફેલાયો હતો. 

  આ ધમકીઓને કારણે ઘણી વખત શાળાઓ ખાલી કરાવવી પડી હતી. જોકે, મોટાભાગની ધમકીઓ ખોટી સાબિત થઈ હતી. પોલીસે વિદ્યાર્થીની પૂછપરછ કરી વધુ તપાસ હાથ ધરી છે. ગયા વર્ષે ઑક્ટોબરમાં પણ દિલ્હીના રોહિણી વિસ્તારમાં CRPF સ્કૂલ પાસે વિસ્ફોટ થયો હતો, જેનાથી વિસ્તારમાં ગભરાટ ફેલાઈ ગયો હતો, જોકે આ ઘટનામાં કોઈને ઈજા થઈ ન હતી. હવે આ નવો મામલો એ સવાલ ઉભો કરે છે કે આવા ખોટા મેસેજથી કેટલું નુકસાન થઈ શકે છે અને તેને રોકવા માટે શું પગલાં લેવામાં આવશે