હૈદરાબાદની નામપલ્લી કોર્ટે ફિલ્મ 'પુષ્પા 2'ના પ્રીમિયર દરમિયાન થયેલી ભાગદોડ કેસમાં અભિનેતા અલ્લુ અર્જુનને ઘણી રાહતો આપી છે. અભિનેતાની ગયા મહિને ધરપકડ કરવામાં આવી હતી પરંતુ બાદમાં તેમને જામીન પર મુક્ત કરવામાં આવ્યા હતા. મીડિયા રિપોર્ટ્સ અનુસાર, અલ્લુ અર્જુનને દર રવિવારે ચિક્કડપલ્લી પોલીસ સ્ટેશનમાં હાજરી આપવાની છૂટ આપવામાં આવી છે. તેમની કાનૂની ટીમે સુરક્ષાના કારણોસર કોર્ટમાં આ વિનંતી કરી હતી. આ ઉપરાંત તેમને વિદેશ પ્રવાસની પરવાનગી પણ મળી ગઈ છે.

 4 ડિસેમ્બર, 2024 ના રોજ હૈદરાબાદના સંધ્યા થિયેટરમાં અલ્લુ અર્જુનને જોવા માટે મોટી ભીડ એકઠી થઈ હતી ત્યારે નાસભાગ મચી ગઈ હતી. જ્યારે અભિનેતા પોતાની કારમાંથી ઉતરીને ચાહકોનું સ્વાગત કરવા લાગ્યો ત્યારે પરિસ્થિતિ વધુ વણસી ગઈ. આ પછી ત્યાં અરાજકતા મચી ગઈ. આ ઘટનામાં, 35 વર્ષીય મહિલાનું મોત થયું હતું અને તેનો આઠ વર્ષનો પુત્ર ગંભીર રીતે ઘાયલ થયો હતો અને તે હજુ પણ હોસ્પિટલમાં છે.

આ ઘટના બાદ ૧૩ ડિસેમ્બર, ૨૦૨૪ના રોજ અલ્લુ અર્જુનની ધરપકડ કરવામાં આવી હતી. તેને 14 દિવસની ન્યાયિક કસ્ટડીમાં મોકલવામાં આવ્યો હતો. ધરપકડ પછી તરત જ તેમને વચગાળાના જામીન મળી ગયા. બાદમાં, 3 જાન્યુઆરી, 2025 ના રોજ, તેમને વીડિયો કોન્ફરન્સ દ્વારા કોર્ટમાં હાજર થયા બાદ નિયમિત જામીન આપવામાં આવ્યા હતા. અગાઉ કોર્ટે તેમને આગામી આદેશ સુધી દર રવિવારે પોલીસ સ્ટેશનમાં હાજર રહેવાનો આદેશ આપ્યો હતો.