નવી દિલ્હી : પૂર્વ કેન્દ્રીય મંત્રી સ્મૃતિ ઈરાની દિલ્હી વિધાનસભાની ચૂંટણી લડશે તે લગભગ નિશ્ચિત છે. ભારતીય જનતા પાર્ટી (BJP) દિલ્હીની ચૂંટણીમાં સ્મૃતિ ઈરાનીને મેદાનમાં ઉતારવાની યોજના બનાવી રહી છે.

  દિલ્હી ચૂંટણીમાં 59 ઉમેદવારોને મેદાનમાં ઉતારનાર ભાજપ બાકીની 11 બેઠકો પર પણ ઉમેદવારોના નામની જાહેરાત કરીને આશ્ચર્યચકિત કરી શકે છે. આ 11 નામોમાં પ્રખ્યાત નામો અને પૂર્વ કેન્દ્રીય મંત્રી સ્મૃતિ ઈરાનીનું નામ સામેલ છે. એવી અટકળો છે કે ભાજપ તેમને દિલ્હી કેન્ટ અથવા ગ્રેટર કૈલાશ વિધાનસભા મતવિસ્તારમાંથી મેદાનમાં ઉતારી શકે છે

   પૂર્વ કેન્દ્રીય મંત્રી સ્મૃતિ ઈરાનીની ઉમેદવારી દિલ્હી વિધાનસભાની ચૂંટણીને વધુ રસપ્રદ બનાવી શકે છે. દૈનિક જાગરણના અહેવાલ મુજબ, ભાજપ દિલ્હી કેન્ટ અથવા ગ્રેટર કૈલાશ વિધાનસભા બેઠક પરથી સ્મૃતિ ઈરાનીને ટિકિટ આપી શકે છે. બીજેપી ગ્રેટર કૈલાશથી AAP ઉમેદવાર સૌરભ ભારદ્વાજ સામે મજબૂત ઉમેદવાર ઈચ્છે છે.

 તાજેતરમાં જ સ્મૃતિ ઈરાનીએ દિલ્હી ચૂંટણીને લઈને પ્રેસ કોન્ફરન્સ પણ કરી છે. જે બાદ તેમના ચૂંટણી લડવાની અટકળોએ જોર પકડ્યું છે. સ્મૃતિ ઈરાનીએ રવિવાર, 12 જાન્યુઆરીએ બીજેપી પાર્ટી હેડક્વાર્ટર ખાતે એક પ્રેસ કોન્ફરન્સને સંબોધી હતી. આ PCમાં સ્મૃતિ ઈરાનીએ આમ આદમી પાર્ટી (AAP) પર નકલી આધાર કાર્ડ અને દસ્તાવેજો દ્વારા ગેરકાયદેસર બાંગ્લાદેશીઓને દિલ્હીમાં સ્થાયી થવામાં મદદ કરવાનો આરોપ લગાવ્યો હતો.

  સ્મૃતિ ઈરાનીએ 2019ની લોકસભા ચૂંટણીમાં ઉત્તર પ્રદેશના અમેઠી મતવિસ્તારમાંથી કોંગ્રેસના નેતા રાહુલ ગાંધીને હરાવ્યા હતા, જોકે તે પોતે 2024ની ચૂંટણીમાં હારી ગઈ હતી. આ પહેલા તેઓ 2009ની લોકસભા ચૂંટણી દિલ્હીના ચાંદની ચોક મતદારક્ષેત્રથી લડ્યા હતા.

   સ્મૃતિ ઈરાનીનું શાનદાર ભાષણ અને વ્યાપક લોકપ્રિયતા પાર્ટીના કાર્યકરોમાં ઉત્સાહ વધારશે તેવી અપેક્ષા છે. આ ઉપરાંત તેમને દિલ્હી વિધાનસભા ચૂંટણીમાં ભાજપના મહત્વના ચહેરાઓમાંથી એક તરીકે જોવામાં આવી શકે છે. આ વખતે તમામ રાજકીય સમીકરણોને ધ્યાનમાં રાખીને પાર્ટીએ વ્યૂહાત્મક રીતે મહત્ત્વની બેઠકો પર અગ્રણી વ્યક્તિઓને મેદાનમાં ઉતાર્યા છે

 . નવી દિલ્હી બેઠક પર પૂર્વ સાંસદ પરવેશ વર્માની નવી દિલ્હીમાં AAP સંયોજક અરવિંદ કેજરીવાલ સામેની એન્ટ્રીથી મુકાબલો વધુ રસપ્રદ બન્યો છે. તેવી જ રીતે, કાલકાજીમાં સીએમ આતિષી સામે પૂર્વ સાંસદ રમેશ બિધુરીને મેદાનમાં ઉતારવાથી આ બેઠક પરની રાજકીય હરીફાઈ પણ અગાઉની ચૂંટણીઓની સરખામણીમાં વધુ કઠિન બની છે.