<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Tuesday, 14th January 2025

બાંગ્લાદેશને તેની જ ભાષામાં જવાબ, ભારતે ડેપ્યુટી હાઈ કમિશનરને સમન્સ પાઠવ્યું

સરહદી વિસ્તાર પર BSFની કડક નજર છે જેના કારણે બાંગ્લાદેશની મોહમ્મદ યુનુસ સરકાર ગભરાટમાં છે

નવી દિલ્હી,તા. ૧૪, ભારત અને બાંગ્લાદેશ વચ્ચેના સંબંધો સતત બગડતા જણાય છે. બાંગ્લાદેશના ભૂતપૂર્વ વડા પ્રધાન શેખ હસીનાની હકાલપટ્ટી બાદ બંને દેશો વચ્ચેના સંબંધો તણાવપૂર્ણ લાગે છે. ભારતીય સરહદ સુરક્ષા દળ એ બાંગ્લાદેશી ઘુસણખોરોને રોકવા માટે સુરક્ષા કડક બનાવી છે. સરહદી વિસ્તાર પર BSFની કડક નજર છે જેના કારણે બાંગ્લાદેશની મોહમ્મદ યુનુસ સરકાર ગભરાટમાં છે.

બાંગ્લાદેશના વિદેશ મંત્રાલયે રવિવારે ભારતીય હાઈ કમિશનર પ્રણય વર્માને બોલાવીને સરહદ પર ભારતની ગતિવિધિઓ પર ચિંતા વ્યક્ત કરી હતી. સોમવારે, ભારતીય વિદેશ મંત્રાલયે નવી દિલ્હીમાં રહેલા બાંગ્લાદેશના ડેપ્યુટી હાઈ કમિશનર નુરુલ ઇસ્લામને પણ સમન્સ પાઠવ્યું હતું. ભારત-બાંગ્લાદેશ સરહદ પર વાડ લગાવવાના મુદ્દા પર બાંગ્લાદેશની વચગાળાની સરકાર તરફથી સહયોગના અભાવે ભારતે નવી દિલ્હીમાં ટોચના બાંગ્લાદેશી રાજદ્વારીને સમન્સ પાઠવ્યું છે.

બાંગ્લાદેશી ઘુસણખોરોને સરહદમાં પ્રવેશતા અટકાવવા માટે ભારતે સરહદ પર વાડ કરવાનું શરૂ કરી દીધું છે. બાંગ્લાદેશ આનાથી નારાજ છે.

ભારતીય હાઈ કમિશનરે ઢાકામાં બાંગ્લાદેશના વિદેશ સચિવ જશીમ ઉદ્દીન સાથે આ મુદ્દાઓ પર લગભગ ૪૫ મિનિટ સુધી મુલાકાત કરી હતી. ચર્ચાઓ અંગે બાંગ્લાદેશની વચગાળાની સરકાર દ્વારા કોઈ સત્તાવાર નિવેદન જારી કરવામાં આવ્યું નથી.

(10:32 AM IST)