બાળકો માટે લાલ રંગ નંબર 3 નો ઉપયોગ ખાસ ચિંતાનો વિષય છે, કારણ કે આ રંગ બાળકો માટે તૈયાર કરવામાં આવતા ખોરાકમાં જોવા મળે છે. ગ્રાહકો અને નિષ્ણાતો દ્વારા લાંબા સમયથી તેની સંભવિત સ્વાસ્થ્ય અસરો અંગે ચિંતા વ્યક્ત કરવામાં આવી રહી છે. કેલિફોર્નિયા જેવા રાજ્યોએ ગયા વર્ષે ખાદ્ય ઉત્પાદનોમાંથી રંગ દૂર કર્યો હતો, અને હવે યુ.એસ.માં રાષ્ટ્રીય સ્તરે આ પગલું લેવામાં આવ્યું છે.

યુએસ ફૂડ એન્ડ ડ્રગ એડમિનિસ્ટ્રેશન (FDA) એ બુધવારે જાહેરાત કરી હતી કે તે હવે ખોરાક અને ગળી શકાય તેવી દવાઓમાં લાલ રંગ નંબર 3 નો ઉપયોગ કરવાની મંજૂરી આપશે નહીં. FDA ના ડેપ્યુટી કમિશનર જીમ જોન્સે જણાવ્યું હતું કે, "આ રંગનો ઉપયોગ તબક્કાવાર બંધ કરવામાં આવી રહ્યો છે કારણ કે તે ઉંદરોમાં કેન્સર જેવી અસરો પેદા કરે છે તેવું દર્શાવવામાં આવ્યું છે. જોકે, આ રંગની મનુષ્યોમાં કોઈ કાર્સિનોજેનિક અસરો હોવાનું દર્શાવવામાં આવ્યું નથી."

૧૯૯૦ માં કોસ્મેટિક ઉત્પાદનોમાં લાલ રંગ નંબર ૩ ના ઉપયોગ પર પ્રતિબંધ મૂકવામાં આવ્યો હતો. તે સમયે સાબિત થયું હતું કે આ રંગ પ્રાણીઓમાં કેન્સરનું કારણ બની શકે છે. આ પ્રતિબંધ લાગુ કરતી વખતે, યુ.એસ.એ 1960 માં પસાર થયેલા ડેલેની કલમનું પાલન કર્યું, જે જણાવે છે કે જો કોઈ રંગ અથવા ઉમેરણ કેન્સરનું કારણ બને તો તેને સલામત ગણી શકાય નહીં.

ખાદ્ય ઉત્પાદનોમાં આ રંગના ઉપયોગ અંગે યુરોપિયન દેશોમાં પહેલાથી જ કડક નિયમો છે. કેટલાક દેશોમાં આ રંગ પર સંપૂર્ણ પ્રતિબંધ છે, જ્યારે અન્ય દેશોમાં તે ગ્રાહકો માટે ચેતવણી લેબલ સાથે વેચાય છે. યુરોપિયન યુનિયનમાં ખાદ્ય સુરક્ષાના ધોરણો ખૂબ જ કડક છે, અને અહીં ગ્રાહક સુરક્ષાને સૌથી વધુ પ્રાથમિકતા આપવામાં આવે છે.

કેટલીક વૈજ્ઞાનિક સંસ્થાઓ અને ઉદ્યોગો આ રંગના ઉપયોગને સલામત માને છે. ઇન્ટરનેશનલ એસોસિએશન ઓફ કલર મેન્યુફેક્ચરર્સ (IACM) જણાવે છે કે સામાન્ય વપરાશ સ્તરે આ રંગ મનુષ્યો માટે હાનિકારક નથી. તેમનું કહેવું છે કે સંયુક્ત રાષ્ટ્ર અને વિશ્વ આરોગ્ય સંગઠન દ્વારા કરવામાં આવેલા સંશોધન મુજબ, આ રંગ સલામત છે. જોકે, કેટલાક ખાદ્ય ઉત્પાદકોએ તેમના ઉત્પાદનોમાંથી આ રંગ પહેલાથી જ દૂર કરી દીધો છે.