ઇરાકની સંસદે છોકરીઓના લગ્નની ઉંમર ઘટાડીને ૯ વર્ષ કરી
મહિલા અધિકાર જૂથોએ આ કાયદાઓના પસાર થવાને ભયાનક ગણાવ્યું છે : દેશમાં શિયા અને સુન્ની માટે લગ્નની ઉંમર અલગ અલગ હશે : સંસદમાં વિવાદાસ્પદ કાયદો પસાર
બગદાદ, તા.૨૩: ઇરાકની સંસદે મંગળવારે એક વિવાદાસ્પદ સુધારેલા બિલને મંજૂરી આપી જેણે ઇસ્લામિક દેશમાં બાળ લગ્નને કાયદેસર બનાવી દીધા છે. દાયકાઓ જૂના કાયદામાં સુધારા બાદ, હવે ૯ વર્ષની છોકરીઓના પણ લગ્ન થઈ શકે છે. ઇરાકી સંસદની વેબસાઇટે જણાવ્યું હતું કે તેણે વ્યક્તિગત સ્થિતિ કાયદામાં સુધારો કરવાના પ્રસ્તાવ તેમજ ‘સામાન્ય માફી કાયદામાં બીજા સુધારા'ને સ્વીકારી લીધો છે. મહિલા અધિકાર જૂથોએ આ કાયદાઓના પસાર થવાને ભયાનક ગણાવ્યું છે. તેઓ કહે છે કે આનાથી બાળ બળાત્કાર કાયદેસર બનશે.
અત્યાર સુધી, ઇરાકમાં મહિલાઓ માટે લગ્ન માટેની લઘુત્તમ ઉંમર ૧૮ વર્ષ હતી, પરંતુ નવા સુધારા પછી, મૌલવીઓને લગ્ન, છૂટાછેડા અને બાળકોની સંભાળ સહિત કૌટુંબિક બાબતો પર નિર્ણય લેવાનો અધિકાર આપવામાં આવ્યો છે. ‘આપણે ઇરાકમાં મહિલાઓ અને બાળકોના અધિકારોના અંત સુધી પહોંચી ગયા છીએ,' કાયદાના સૌથી મુખ્ય વિરોધીઓમાંના એક વકીલ મોહમ્મદ જુમાએ જણાવ્યું. ઇરાકી પત્રકાર સાજા હાશિમે જણાવ્યું હતું કે, મહિલાઓનું ભાગ્ય મૌલવીઓના હાથમાં છે તે હકીકત ભયાનક છે. એકસ્ત્રી તરીકે મારા જીવનમાં આવતી દરેક વસ્તુથી મને ડર લાગે છે.
ગાર્ડિયનના અહેવાલ મુજબ, ઇરાકમાં છોકરીઓ માટે લગ્નની લઘુત્તમ ઉંમર બહુમતી શિયા મુસ્લિમો માટે ૯ વર્ષ હશે, જ્યારે સુન્ની મુસ્લિમો માટે તે ૧૫ વર્ષ હશે. રિપોર્ટમાં સ્વતંત્ર સાંસદ સજ્જાદ સલીમને ટાંકીને કહેવામાં આવ્યું છે કે ‘ઈરાકી રાજ્યએ કયારેય આટલું અધોગતિ અને અપવિત્રતા જોઈ નથી જેનાથી ઈરાકની સંપત્તિ અને પ્રતિષ્ઠાને નુકસાન થયું હોય જેટલું આપણે આજે જોઈ રહ્યા છીએ.'
ઇરાકમાં બાળ લગ્ન લાંબા સમયથી ચાલતો મુદ્દો રહ્યો છે. ૨૦૨૩ માં હાથ ધરાયેલા સંયુક્ત રાષ્ટ્રના સર્વેક્ષણમાં જાણવા મળ્યું હતું કે દેશમાં ૨૮ ટકા છોકરીઓના લગ્ન ૧૮ વર્ષની ઉંમર પહેલા થઈ જાય છે. ગરીબીમાંથી બહાર નીકળવા માટે સગીર છોકરીઓને લગ્નની ઓફર કરવામાં આવે છે. ઘણા વહેલા લગ્ન નિષ્ફળ જાય છે, જેના કારણે યુવતીઓને જીવનભર તેના પરિણામો ભોગવવા પડે છે.
(10:28 AM IST)
છેલ્લા 8 દિવસમાં સૌથી લોકપ્રિય 
