નવી દિલ્હી, તા. ર૩: નવી નોકરી શોધી રહેલા યુવાનોની સંગઠિત ક્ષેત્રની કંપનીઓ મોટા પાયે ભરતી કરી રહી છે. આ માહિતી કર્મચારી ભવિષ્ય નિધિ સંગઠન (EPFO) ના ડેટામાંથી પ્રાપ્ત થઈ છે. EPFO અનુસાર, નવેમ્બર ૨૦૨૪માં સંગઠિત ક્ષેત્રમાં ૧૪.૬૩ લાખ નવા લોકોને નોકરીઓ મળી. આ વાર્ષિક ધોરણે ૪.૮૮ ટકા વધુ છે. આ માહિતી ફિકસ પગાર ધોરણ પર કાર્યરત લોકોના પગારપત્રકના ડેટામાંથી મેળવવામાં આવી હતી.

શ્રમ મંત્રાલયે એક નિવેદનમાં જણાવ્યું હતું કે, ચોખ્ખા પીએફ ફાળો આપનારાઓની સંખ્યામાં વધારો રોજગારની તકોમાં વધારો અને કર્મચારી લાભો વિશે વધતી જાગૃતિને પ્રતિબિંબિત કરે છે. EPFOની અસરકારક આઉટરીચ પહેલ દ્વારા આ વાતને વધુ મજબૂત બનાવવામાં આવી છે. મંત્રાલયે જણાવ્યું હતું કે, મહિના-દર-મહિનાના આધારે ઓકટોબર ૨૦૨૪ ની સરખામણીમાં સભ્યોના વધારામાં ૯.૦૭ ટકા રહ્યો હતો.

નવેમ્બર મહિના દરમિયાન મહારાષ્ટ્ર, કર્ણાટક, તમિલનાડુ, હરિયાણા, ગુજરાત, દિલ્હી, તેલંગાણા અને ઉત્તર પ્રદેશમાં કુલ વ્યકિતગત સભ્યપદમાં પાંચ ટકાથી વધુનો વધારો જોવા મળ્યો. તેનો અર્થ એ કે આ રાજ્યોમાં મોટી સંખ્યામાં નોકરી શોધનારાઓને નોકરી મળી. આ નોકરીનો ડેટા કામચલાઉ છે કારણ કે ડેટા તૈયાર કરવો અને કર્મચારી રેકોર્ડ અપડેટ કરવું એ એક ચાલુ પ્રક્રિયા છે.

ડેટાના લિંગ મુજબ વિશ્લેષણ દર્શાવે છે કે નવેમ્બર, ૨૦૨૪ દરમિયાન ઉમેરાયેલા નવા સભ્યોમાંથી લગભગ ૨.૪૦ લાખ મહિલાઓ છે. ઓકટોબર,  ૨૦૨૪ની સરખામણીમાં ૧૪.૯૪ ટકાનો વધારો થયો છે, જ્યારે નવેમ્બર, ૨૦૨૩ની સરખામણીમાં વાર્ષિક વૃદ્ધિ ૨૩.૬૨ ટકા છે. આ ઉપરાંત નવેમ્બર દરમિયાન મહિલા સભ્યોનો ચોખ્ખો ઉમેરો ૩.૧૩ લાખ થયો હતો, જે ઓકટોબર ૨૦૨૪ની સરખામણીમાં ૧૨.૧૬ ટકા વધુ અને ગયા વર્ષના નવેમ્બરની સરખામણીમાં ૧૧.૭૫ ટકા વધુ છે. મંત્રાલયે જણાવ્યું હતું કે મહિલા સભ્યોની સંખ્યામાં વધારો વધુ સમાવિષ્ટ અને વૈવિધ્યસભર કાર્યબળ તરફના વ્યાપક પરિવર્તનનો સંકેત આપે છે.

રાજ્યવાર ડેટાના વિશ્લેષણ દર્શાવે છે કે ટોચના પાંચ રાજ્યો/કેન્દ્રશાસિત પ્રદેશોનો હિસ્સો ચોખ્ખા સભ્યો ઉમેરામાં લગભગ ૫૯.૪૨ ટકા હતો, જે મહિના દરમિયાન કુલ ૮.૬૯ લાખ ચોખ્ખા સબ્સ્ક્રાઇબર ઉમેર્યા હતા. તમામ રાજ્યોમાં મહારાષ્ટ્ર નવેમ્બર દરમિયાન ૨૦.૮૬ ટકા સભ્યોના ઉમેરા સાથે આગળ રહ્યું.

નવેમ્બર ૨૦૨૪માં EPFOએ લગભગ ૮.૭૪ લાખ નવા સભ્યો નોંધાવ્યા, જે એક વર્ષ પહેલાના સમાન મહિના કરતા ૧૮.૮૦ ટકા વધુ અને ઓકટોબર ૨૦૨૪ કરતા ૧૬.૫૮ ટકા વધુ છે.

મંત્રાલયે જણાવ્યું હતું કે ડેટાનો એક મહત્વપૂર્ણ પાસું ૧૮-૨૫ વય જૂથનું વર્ચસ્વ છે. આ વય જૂથમાં  ૪.૮૧ લાખ નવા સભ્યો ઉમેરવામાં આવ્યા છે, જે નવેમ્બર ૨૦૨૪માં ઉમેરાયેલા કુલ નવા સભ્યોના ૫૪.૯૭ ટકા છે.

નવેમ્બર ૨૦૨૪માં૧૮-૨૫ વર્ષની વય જૂથમાં ૫.૮૬ સભ્યોનો ચોખ્ખો ઉમેરો થયો હતો, જે ઓકટોબર, ૨૦૨૪ની સરખામણીમાં ૭.૯૬ ટકા વધુ છે. મંત્રાલયે કહ્યું કે આ અગાઉના વલણ સાથે સુસંગત છે જે દર્શાવે છે કે સંગઠિત કાર્યબળમાં જોડાતા મોટાભાગના વ્યકિતઓ યુવાનો છે. આમાં મુખ્યત્વે એવા લોકોનો પણ સમાવેશ થાય છે જેઓ પહેલીવાર નોકરી શોધી રહ્યા છે