<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Tuesday, 28th January 2025

ગુરમીત રામ રહીમ પેરોલ પર ફરી જેલમાંથી બહાર આવ્યો: પ્રથમ વખત સિરસામાં કેમ્પની મુલાકાત લેશે

અગાઉના પેરોલ અથવા ફર્લો દરમિયાન, તેને ફક્ત ઉત્તરપ્રદેશના બાગપતમાં તેના આશ્રમની મુલાકાત લેવાની મંજૂરી આપવામાં આવી હતી

નવી દિલ્હી :બળાત્કાર અને હત્યાના મામલામાં દોષિત ઠરેલા ડેરા સચ્ચા સૌદાના વડા ગુરમીત રામ રહીમ ફરી એકવાર પેરોલ પર જેલની બહાર છે. અધિકારીઓના જણાવ્યા અનુસાર તે મંગળવારે સવારે જેલમાંથી બહાર આવ્યો હતો. 2017માં દોષિત જાહેર થયા બાદ તે પ્રથમ વખત સિરસામાં કેમ્પની મુલાકાત લેશે. તેના અગાઉના પેરોલ અથવા ફર્લો દરમિયાન, તેને ફક્ત ઉત્તરપ્રદેશના બાગપતમાં તેના આશ્રમની મુલાકાત લેવાની મંજૂરી આપવામાં આવી હતી.

પ્રશાસને મંગળવારે સવારે 5.26 વાગ્યે રામ રહીમને ગુપ્ત રીતે જેલમાંથી બહાર કાઢ્યો હતો. આ દરમિયાન કડક સુરક્ષા જોવા મળી રહી છે. માનવામાં આવે છે કે આ વખતે ગુરમીત રામ રહીમ સિરસામાં સ્થિત કેમ્પમાં જ રહેશે.

આ પહેલા ગયા વર્ષે ઓક્ટોબરમાં રામ રહીમ જેલમાંથી બહાર આવ્યો હતો. ચૂંટણી પંચે તેની પેરોલની અરજી મંજૂર કર્યા બાદ તે જેલમાંથી બહાર આવ્યો હતો. છેલ્લા 12 મહિનામાં આ તેની ચોથી કામચલાઉ રિલીઝ છે અને ચાર વર્ષ પહેલાં તેને દોષિત ઠેરવ્યા બાદ તેની કુલ સંખ્યા 16 પર પહોંચી ગઈ છે. હરિયાણા અને પંજાબમાં રામ રહીમનો ઘણો દબદબો છે. તેની અગાઉની ફર્લો અને પેરોલ વિવિધ ચૂંટણીઓ સાથે સુસંગત છે, પછી તે મ્યુનિસિપલ કે રાજ્ય વિધાનસભાની ચૂંટણીઓ હોય.

ગયા વર્ષે 13 ઓગસ્ટે 21 દિવસની રજા મળ્યા બાદ રામ રહીમ 2 સપ્ટેમ્બરે સુનારિયા જેલમાં પરત ફર્યો હતો. 19 જાન્યુઆરીના રોજ, રામ રહીમને લોકસભાની ચૂંટણી પહેલા પેરોલ મંજૂર કરવામાં આવ્યો હતો, ચૂંટણી કાર્યક્રમ સાથે મુક્તિનો ટ્રેન્ડ ચાલુ રાખ્યો હતો. આ પહેલા તેઓ 2022ની પંજાબ વિધાનસભા ચૂંટણી દરમિયાન 21 દિવસ જેલની બહાર રહ્યો હતો.  હરિયાણા મ્યુનિસિપલ કોર્પોરેશનની ચૂંટણી પહેલા 17 જૂન, 2022 ના રોજ ફરી એકવાર જેલમાંથી બહાર આવ્યો.

2017 માં, ગુરમીત રામ રહીમ સિંહને તેની બે મહિલા અનુયાયીઓ પર બળાત્કારનો દોષી ઠેરવવામાં આવ્યો હતો અને તેને 20 વર્ષની જેલની સજા ફટકારવામાં આવી હતી. જો કે, 2002ના ભૂતપૂર્વ સંપ્રદાય મેનેજર રણજીત સિંહની હત્યામાં તેને અને અન્ય ચારને મે મહિનામાં હાઈકોર્ટે નિર્દોષ જાહેર કર્યા હતા.

(1:13 PM IST)