નવી દિલ્‍હી, તા.૨૫: દિલ્‍હીમાં શાસક ભાજપ સરકાર આજે વિધાનસભામાં પેન્‍ડિંગ CAG રિપોર્ટ રજૂ કરશે. આ રિપોર્ટ પાછલી AAP સરકારના કાર્યકાળ દરમિયાન મુખ્‍યમંત્રી નિવાસસ્‍થાન અને મોહલ્લા ક્‍લિનિકના બાંધકામમાં થયેલી કથિત અનિયમિતતાઓ પર ધ્‍યાન કેન્‍દ્રિત કરશે. દરમિયાન, એક RTI રિપોર્ટમાં ખુલાસો થયો છે કે અરવિંદ કેજરીવાલના કાર્યકાળ દરમિયાન, સરકારી રહેઠાણોને મોટા પ્રમાણમાં વીજળીના બિલ આવ્‍યા છે.

રસપ્રદ વાત એ છે કે, માહિતી અધિકાર (RTI)ના અહેવાલના જવાબ મુજબ, દિલ્‍હી સરકારના સત્તાવાર રહેઠાણોના વીજળી બિલ લાખોમાં છે. નવેમ્‍બર ૨૦૨૪ ના એક RTI મુજબ, આમ આદમી પાર્ટીના સાત મંત્રીઓના વીજળી બિલ બે વર્ષ (૨૦૨૨-૨૦૨૪) માં ૧.૧૫ કરોડ રૂપિયા સુધી પહોંચી ગયા.

દિલ્‍હીના પૂર્વ મુખ્‍યમંત્રીના નિવાસસ્‍થાનનું વીજળી બિલ ૪૧ લાખ રૂપિયા હતું. ભૂતપૂર્વ શિક્ષણ મંત્રીના નિવાસસ્‍થાને ૧.૨૬ લાખ યુનિટથી વધુ વીજળીનો વપરાશ થયો, જેની કિંમત ૧૪.૯૫ લાખ રૂપિયા હતી. આ ઉપરાંત, GAD (સામાન્‍ય વહીવટ વિભાગ) મંત્રીના નિવાસસ્‍થાનના વીજળી બિલ દ્વારા ૨૧.૭૨ લાખ રૂપિયાનો ખર્ચ કરવામાં આવ્‍યો હતો.

ભૂતપૂર્વ આરોગ્‍ય પ્રધાનના સત્તાવાર નિવાસસ્‍થાને ૬૮,૫૮૧ યુનિટ વીજળીનો વપરાશ થયો, જેની કિંમત ૧૦.૫૩ લાખ રૂપિયા હતી. પૂર્વ નાણામંત્રીના સત્તાવાર નિવાસસ્‍થાને વીજળી પાછળ રૂ. ૧૯.૩૨ લાખ ખર્ચ્‍યા હતા, જ્‍યારે સમાજ કલ્‍યાણ મંત્રીના નિવાસસ્‍થાને બે વર્ષમાં વીજળી પાછળ રૂ. ૪.૯૯ લાખ ખર્ચ્‍યા  હતા. ઉપરાંત, પૂર્વ મુખ્‍યમંત્રીનું પાણીનું બિલ ૧.૧૩ લાખ રૂપિયા હતું, જ્‍યારે શિક્ષણ મંત્રીનું ૩.૧૬ લાખ રૂપિયા હોવાનું કહેવાય છે.

દિલ્‍હી વિધાનસભા ચૂંટણી પ્રચારમાં ભાજપ માટે મુખ્‍યમંત્રીના નિવાસસ્‍થાનનું નવીનીકરણ એક મુખ્‍ય મુદ્દો રહયો છે, જ્‍યાં પાર્ટીએ બંગલાના પુનર્નિર્માણ અને આંતરિક સુશોભનમાં અનિયમિતતાઓ અને ભ્રષ્ટાચારનો આરોપ લગાવ્‍યો હતો. ભાજપે તેને ‘શીશમહેલ' નામ આપ્‍યું હતું અને હવે તેને સંગ્રહાલયમાં રૂપાંતરિત કરવાની તૈયારીઓ ચાલી રહી છે. ભાજપ પોતાના પ્રચારમાં કહેતું રહયું છે કે જો સરકાર બનશે તો CAG રિપોર્ટ વિધાનસભામાં રજૂ કરવામાં આવશે, જેને ભાજપનો આરોપ છે કે કેજરીવાલ સરકારે છુપાવ્‍યો હતો.(૨૩.૬)