નવી દિલ્હી :ખેડૂત નેતા જગજીત સિંહ દલેવાલના આમરણાંત ઉપવાસના 100 દિવસ પૂર્ણ થયા છે. આ પ્રસંગે, દેશભરના ખેડૂતોએ જિલ્લા અને તાલુકા સ્તરે પ્રતીકાત્મક ભૂખ હડતાળ કરી હતી. આજે દાતા સિંહ વાલા-ખાનૌરી કિસાન મોરચા, શંભુ મોરચા અને રત્નાપુરા મોરચા ખાતે સેંકડો ખેડૂતોએ પ્રતીકાત્મક ભૂખ હડતાળ કરી હતી.

પંજાબ, હરિયાણા, રાજસ્થાન, મધ્યપ્રદેશ, ઉત્તર પ્રદેશ, તમિલનાડુ અને કર્ણાટકમાં પણ ખેડૂતોએ મોટા પાયે પ્રતીકાત્મક ભૂખ હડતાળ કરી હતી. ખેડૂત નેતાઓએ જણાવ્યું હતું કે 100 કલાક ભૂખ્યા રહ્યા પછી વ્યક્તિની હાલત બગડી જાય છે, પરંતુ જગજીત સિંહ દલેવાલ એક મજબૂત સંકલ્પ ધરાવતા માણસ છે અને ભગવાન-વાહેગુરુના આશીર્વાદથી 100 દિવસથી ભૂખ હડતાળ પર હોવા છતાં, તેમનો ઉત્સાહ ઉંચો છે.

આ પ્રસંગે જગજીત સિંહ દલેવાલે કહ્યું કે આજે MSP ગેરંટી કાયદાનો પડઘો રસ્તાઓથી સંસદ સુધી સંભળાઈ રહ્યો છે. ભગવાન-વાહગુરુના આશીર્વાદથી આ શક્ય બન્યું છે, જગજીત સિંહ દલેવાલે પોતે કંઈ કર્યું નથી.

ખેડૂત નેતાઓએ જણાવ્યું હતું કે ભલે આપણા દેશને વિશ્વનો સૌથી મોટો લોકશાહી કહેવામાં આવે છે, પરંતુ જગજીત સિંહ દલેવાલનો સત્યાગ્રહ છેલ્લા 100 દિવસથી ચાલી રહ્યો છે, તેમ છતાં કેન્દ્ર સરકારે હજુ સુધી ખેડૂતોની માંગણીઓ પૂર્ણ કરી નથી અને હજુ પણ સરકાર ખેડૂતોની ધીરજની કસોટી કરી રહી છે.

ખેડૂત નેતાઓએ જણાવ્યું હતું કે સંયુક્ત કિસાન મોરચાના 'ચંદીગઢ કૂચ' કાર્યક્રમને ધ્યાનમાં રાખીને પંજાબમાં ખેડૂત નેતાઓની જે રીતે ધરપકડ કરવામાં આવી છે તે ખૂબ જ નિંદનીય છે. તેમણે કહ્યું કે અટકાયતમાં લેવાયેલા તમામ ખેડૂત નેતાઓને તાત્કાલિક મુક્ત કરવા જોઈએ અને વાતચીત કરીને ખેડૂતોના પ્રશ્નોનોનો ઉકેલ લાવવો જોઈએ.