કર્ણાટકમાં મુસ્લિમ કોન્ટ્રાક્ટરોને ૪% અનામત આપવાની તૈયારી :૨ કરોડ સુધીના ટેન્ડર આપવામાં આવશે
મુખ્યમંત્રી સિદ્ધારમૈયા વોટ બેંકને મજબૂત કરવા માટે આ પગલું ભરશે
નવી દિલ્હી, તા.૬: કર્ણાટક સરકાર એક વર્ષના અંતરાલ પછી મુસ્લિમ કોન્ટ્રાક્ટરો માટે જાહેર કાર્યોમાં ૪% અનામતનો પ્રસ્તાવ ફરીથી રજૂ કરવાની તૈયારી કરી રહી છે. અગાઉ વિવાદ અને તુષ્ટિકરણની રાજનીતિના આરોપોને કારણે આ પ્રસ્તાવ પાછો ખેંચી લેવામાં આવ્યો હતો. મુખ્યમંત્રી સિદ્ધારમૈયા ‘અહિંદા' (લઘુમતીઓ, પછાત જાતિઓ અને દલિતો માટે વપરાતો કન્નડ શબ્દ) વોટ બેંકને મજબૂત કરવા માટે આ પગલું ભરી શકે છે. કોંગ્રેસની તરફેણમાં સમર્થન મેળવવાના ઉદ્દેશ્યથી આ પગલું લેવામાં આવી રહયું છે.
વિધાનસભાના વર્તમાન બજેટ સત્રમાં આ અનામત લાગુ કરવા માટે સરકાર કર્ણાટક ટ્રાન્સપરન્સી ઇન પબ્લિક પ્રોક્યોરમેન્ટ્સ એક્ટ, ૧૯૯૯ માં સુધારો કરવાની યોજના બનાવી રહી છે. નાણા વિભાગે તેની રૂપરેખા તૈયાર કરી છે અને કાયદા અને સંસદીય બાબતોના મંત્રી એચ.કે. પાટીલે પણ આ સુધારાને મંજૂરી આપી છે.
કર્ણાટકમાં પહેલાથી જ અનુસૂચિત જાતિ (SC) અને અનુસૂચિત જનજાતિ (ST) માટે ૨૪%, OBC શ્રેણી-૧ માટે ૪% અને OBC શ્રેણી-2A માટે ૧૫% અનામત છે. સરકારી કોન્ટ્રાક્ટ મેળવવા માટે આ અનામત કુલ અનામતના ૪૩% જેટલું છે. જો પ્રસ્તાવિત ૪% મુસ્લિમ અનામત લાગુ કરવામાં આવે તો આ અનામત શ્રેણી-2B હેઠળ આવશે. આ સાથે, સરકારી કરારોમાં કુલ અનામત વધીને ૪૭% થશે. કરાર મર્યાદા પણ બમણી કરીને રૂ. ૨ કરોડ કરવામાં આવશે.
સિદ્ધારમૈયાએ તેમના પહેલા કાર્યકાળ (૨૦૧૩-૧૮)માં સરકારી કોન્ટ્રાક્ટરો માટે SC/ST અનામત રજૂ કરી હતી. આ વર્ષની શરૂઆતમાં બે OBC શ્રેણીઓને સમાન લાભ આપવામાં આવ્યા હતા. બિસ્તા, ઉપ્પારા અને દલિત ખ્રિસ્તી જેવી જાતિઓ શ્રેણી-૧ હેઠળ આવે છે, જ્યારે કુરુબા, ઇડિગા અને ૧૦૦ થી વધુ અન્ય જાતિઓ શ્રેણી-2A હેઠળ આવે છે. સિદ્ધારમૈયા પોતે કુરુબા સમુદાયના છે. ભાજપે આ પ્રસ્તાવનો વિરોધ કર્યો છે, તેને ગેરબંધારણીય અને તુષ્ટિકરણની રાજનીતિનું ઉદાહરણ ગણાવ્યું છે. ભાજપના પ્રદેશ પ્રમુખ બી.વાય. વિજયેન્દ્રએ જણાવ્યું હતું કે, ‘‘અમે કોંગ્રેસ સરકારની નીતિનો વિરોધ કરીએ છીએ જે ધર્મના આધારે સમાજને વિભાજીત કરે છે. કોંગ્રેસ ફક્ત મુસ્લિમોને લઘુમતી માને છે જ્યારે અન્ય ખરેખર હાંસિયામાં ધકેલાઈ ગયેલી જાતિઓને અવગણે છે. મુસ્લિમોને શિક્ષણ અને રોજગારમાં પહેલાથી જ અનામત મળી ચૂકી છે, જે બંધારણની વિરુદ્ધ છે. હવે સરકારી કોન્ટ્રાક્ટમાં ૪% અનામત આપવી એ તુષ્ટિકરણની રાજનીતિની સર્વોચ્ચ મર્યાદા છે. જો આ બધી લઘુમતીઓ માટે હોત, તો અમને કોઈ વાંધો ન હોત.''
(11:59 AM IST)
છેલ્લા 8 દિવસમાં સૌથી લોકપ્રિય 
