પાકિસ્તાની સેનાએ બલૂચિસ્તાનના બોલાન જિલ્લામાં બળવાખોરો દ્વારા હાઇજેક કરાયેલા જાફર એક્સપ્રેસના તમામ 346 બંધકોને સફળતાપૂર્વક બચાવી લીધા છે. આ બચાવ અભિયાનમાં 33 બળવાખોરો માર્યા ગયા, જ્યારે 28 સૈનિકોએ જીવ ગુમાવ્યો. જેમાં 27 સૈનિકો સામેલ હતા જેઓ ટ્રેનમાં મુસાફરો તરીકે મુસાફરી કરી રહ્યા હતા. ઓપરેશન દરમિયાન એક સૈનિકે જીવ ગુમાવ્યો હતો.

   આ ઘટના મંગળવારે બપોરે બની જ્યારે બલૂચિસ્તાનના દૂરના વિસ્તારમાં બલૂચ લિબરેશન આર્મી (BLA)ના વિદ્રોહીઓએ ટ્રેન પર હુમલો કર્યો. તેઓએ પહેલા રેલ્વે ટ્રેકને બ્લાસ્ટ કર્યો અને પછી મોટી સંખ્યામાં સશસ્ત્ર બળવાખોરોએ ટ્રેનને ઘેરી લીધી.

  પાકિસ્તાન આર્મીના ઈન્ટર-સર્વિસ પબ્લિક રિલેશન્સ (ISPR)ના ડાયરેક્ટર જનરલ લેફ્ટનન્ટ જનરલ અહેમદ શરીફ ચૌધરીએ બુધવારે ઓપરેશનની પુષ્ટિ કરતા કહ્યું કે કોઈ મુસાફરોને ઈજા થઈ નથી. તેમણે કહ્યું કે બળવાખોરો મહિલાઓ અને બાળકોનો ઢાલ તરીકે ઉપયોગ કરે છે જ્યારે સુરક્ષા દળોના સ્નાઈપર્સે આત્મઘાતી બોમ્બરોને નિશાન બનાવીને મારી નાખ્યા હતા

  આ સિવાય જનરલ ચૌધરીએ એ પણ જણાવ્યું કે આતંકીઓ અફઘાનિસ્તાનમાં હાજર તેમના માસ્ટર્સ સાથે જોડાયેલા હતા. આ હુમલાની જવાબદારી BLA દ્વારા લેવામાં આવી છે, જે લાંબા સમયથી બલૂચિસ્તાનમાં સુરક્ષા દળો અને બહારના લોકોને નિશાન બનાવી રહી છે.