અમેરિકાના રાષ્ટ્રપતિ ડોનાલ્ડ ટ્રમ્પે શનિવારે યમનમાં ઈરાન સમર્થિત હૂથી આતંકવાદીઓ પર મોટા હવાઈ હુમલાનો આદેશ આપ્યો હતો અને જણાવ્યું હતું કે, "હૂથી આતંકવાદીઓ, તમારો સમય પૂરો થયો છે અને તમારા હુમલા આજથી બંધ થવા જોઈએ. જો નહીં, તો તમારા પર એવી આફત આવશે જે તમે ક્યારેય જોઈ નથી!" 

આ હુમલા હાલમાં યમનની રાજધાની સનામાં ચાલી રહ્યા છે. ટ્રમ્પે આ હુમલાને હૂથીઓની અમેરિકા વિરુદ્ધની ધમકીઓ અને લાલ સમુદ્રમાં જહાજી પરિવહનને ખોરવી નાખતી કાર્યવાહીના જવાબમાં ગણાવ્યો છે. તેમણે સ્પષ્ટ કર્યું કે આ "નબળા બાઈડનનું અમેરિકા" નથી, અને હૂથીઓએ મોટી ભૂલ કરી છે.

ટ્રમ્પે સોશિયલ મીડિયા પર જણાવ્યું, "અમારા નૌકાદળના યોદ્ધાઓ હાલમાં હૂથી આતંકવાદીઓના ઠેકાણાઓ, નેતાઓ અને મિસાઈલ રક્ષણ પ્રણાલી પર હવાઈ હુમલા કરી રહ્યા છે. આનો હેતુ અમેરિકી જહાજો, હવાઈ અને નૌકા સંપત્તિનું રક્ષણ કરવાનો અને નૌકાયનની સ્વતંત્રતા પુનઃસ્થાપિત કરવાનો છે." 

હૂથીઓએ લાલ સમુદ્રમાં 100થી વધુ વેપારી જહાજો પર મિસાઈલ અને ડ્રોન હુમલા કર્યા હતા, જેમાં બે જહાજો ડૂબી ગયા અને ચાર નાવિકો માર્યા ગયા. આ હુમલાઓએ વૈશ્વિક વેપારને અબજો ડોલરનું નુકસાન પહોંચાડ્યું છે. 

હૂથીઓએ ધમકી આપી હતી કે જો ગાઝામાં યુદ્ધ ફરી શરૂ થશે તો તેઓ ઈઝરાયેલ પર બેલિસ્ટિક – અણુ મિસાઈલો દ્વારા હુમલો કરશે. આ ધમકી બાદ ટ્રમ્પે તેમની શક્તિને નબળી પાડવા આ હુમલાનો આદેશ આપ્યો હોવાનું મનાય છે. 

સમાચાર સૂત્રો અનુસાર, આ હુમલામાં યુ.એસ.એસ. હેરી એસ. ટ્રુમેન વાહક જૂથ અને યુ.એસ.એસ. જ્યોર્જિયા ક્રૂઝ મિસાઈલ સબમરીનનો ઉપયોગ કરવામાં આવ્યો છે. હૂથી મીડિયા અનુસાર, સનાના શૌબ જિલ્લામાં ચાર હવાઈ હુમલા થયા, જેમાં રહેણાંક વિસ્તારોને નિશાન બનાવવામાં આવ્યા હોવાનો દાવો કરાયો છે.

હૂથીઓની કાર્યવાહી

હુમલાનો આરંભ: ઓક્ટોબર 2023થી (ઈઝરાયેલ-હમાસ યુદ્ધની શરૂઆત)  

લક્ષ્ય: 100થી વધુ વેપારી જહાજો, ઈઝરાયેલી જહાજો  

પરિણામ: 2 જહાજો ડૂબ્યા, 4 નાવિકો મૃત, અબજો ડોલરનું નુકસાન  

ધમકી: ગાઝામાં યુદ્ધ ફરી શરૂ થશે તો ઈઝરાયેલ પર મિસાઈલ હુમલો

ટ્રમ્પે ઈરાનને ચેતવણી આપી કે, "હૂથીઓને સમર્થન બંધ કરો, નહીં તો તેમની કાર્યવાહી માટે ઈરાનને પૂરી જવાબદારી લેવી પડશે." આ હુમલો ગાઝા અને ઈરાન સામેની ભાવિ કાર્યવાહીની તૈયારીનો ભાગ હોવાનું મનાય છે. સ્થાનિક રહેવાસીઓએ જણાવ્યું કે સનામાં થયેલા વિસ્ફોટો એટલા તીવ્ર હતા કે તે ભૂકંપ જેવું લાગ્યું. આ હુમલાથી હૂથીઓની શક્તિને નોંધપાત્ર નુકસાન થવાની શક્યતા છે.