મુંબઈ :ભારતીય શેરબજારોમાંથી વિદેશી પોર્ટફોલિયો રોકાણકારો (FPIs) નું ઉપાડ ચાલુ છે. વૈશ્વિક વેપાર તણાવમાં વધારો થવા વચ્ચે માર્ચના પ્રથમ પખવાડિયામાં FPI એ સ્થાનિક શેરબજારોમાંથી 30,000 કરોડ રૂપિયાથી વધુ રકમ ઉપાડી લીધી છે.

અગાઉ તેઓએ ફેબ્રુઆરીમાં શેરમાંથી રૂપિયા 34,574 કરોડ અને જાન્યુઆરીમાં રૂપિયા 78,027 કરોડ ઉપાડ્યા હતા. ડિપોઝિટરી ડેટા અનુસાર વર્ષ 2025માં અત્યાર સુધીમાં FPIએ ભારતીય શેરબજારમાંથી કુલ રૂપિયા 1.42 લાખ કરોડ ( 16.5 બિલિયન ડોલર) પાછા ખેંચી લીધા છે.

માહિતી અનુસાર, વિદેશી પોર્ટફોલિયો રોકાણકારો (FPIs)એ આ મહિને (13 માર્ચ સુધીમાં) ભારતીય શેરબજારોમાંથી 30,015 કરોડ રૂપિયા પાછા ખેંચી લીધા છે. આ તેમનો ચોખ્ખો ઉપાડનો સતત 14મો સપ્તાહ છે. અનેક વૈશ્વિક અને સ્થાનિક પરિબળોને કારણે, FPIs ઘણા સમયથી સતત વેચવાલી કરી રહ્યા છે.

રાષ્ટ્રપતિ ડોનાલ્ડ ટ્રમ્પના નેતૃત્વ હેઠળની US વેપાર નીતિઓની આસપાસની અનિશ્ચિતતાએ વૈશ્વિક સ્તરે જોખમ લેવાની ક્ષમતા પર અસર કરી છે. આવી સ્થિતિમાં, FPIs ભારત જેવા ઉભરતા બજારો પ્રત્યે સાવધ વલણ અપનાવી રહ્યા છે.