નવી દિલ્હી, તા.૧૭

ચંદ્રને એક્સપ્લોર કરવા માટે સરકારે ચંદ્રયાન-૫ માટે પરવાનગી આપી દીધી છે. ઇન્ડિયન સ્પેસ રિસર્ચ ઓર્ગેનાઇઝેશનના ચેરમેન વી. નારાયણન દ્વારા આ અંગે જાહેરાત કરવામાં આવી છે. ચંદ્રયાન-૩માં પ્રયાગયાન નામનું રોવર મોકલવામાં આવ્યું હતું, જેનું વજન ૨૫ કિલોગ્રામ હતું. પરંતુ ચંદ્રયાન-૫માં હવે ૨૫૦ કિલોગ્રામનું રોવર મોકલવામાં આવશે. આ રોવર ચંદ્રની સપાટીનું ખૂબ જ ચીણવટ ભરેલું રિસર્ચ કરશે. વી. નારાયણને જણાવ્યું કે, 'ત્રણ દિવસ પહેલાં જ અમને ચંદ્રયાન-૫ માટે પરવાનગી મળી છે. અમે આ મિશન જાપાન સાથે મળીને કરીશું.' ચંદ્રયાન મિશન ભારત માટે અત્યંત મહત્વપૂર્ણ રહ્યું છે. ભારતનું પહેલું ચંદ્રયાન-૧ ૨૦૦૮માં લોન્ચ કરવામાં આવ્યું હતું. તે સમયે ચંદ્રનું કેમિકલ, મિનરલોજિકલ અને ફોટો-જીયોલોજિકલ મેપિંગ કરવામાં આવ્યું હતું. ચંદ્રયાન-૨ ૨૦૧૯માં લોન્ચ કરવામાં આવ્યું હતું. ફાઇનલ સ્ટેજમાં થોડી મુશ્કેલીઓ છતાં આ મિશનમાં ૯૮% સફળતા મળી હતી. ૨૦૨૩ની ૨૩મી ઓગસ્ટે ભારતે ચંદ્રયાન-૩ને ચંદ્રના સાઉથ પોલમાં ઉતાર્યું હતું. આ મિશન માટે ભારત માટે આ વિસ્તારના પ્રથમ રોવર સપાટી પર ઉતરવાનું ગૌરવ હતું. આ રોવર પૃથ્વી પરના ૧૪ દિવસ સુધી કાર્યરત રહ્યું હતું.

ISRO હાલના સમયમાં ચંદ્રયાન મિશન પર ખૂબ જ ધ્યાન કેન્દ્રિત કરી રહ્યું છે. ચંદ્રયાન-૪ મિશનને ૨૦૨૭માં લોન્ચ કરવામાં આવશે. આ મિશનમાં ચંદ્ર પરથી નમૂનાઓ લાવવામાં આવશે. ISRO ગંગયાનનું પણ પ્લાનિંગ કરી રહ્યું છે. એટલું જ નહીં, ISRO દ્વારા હવે ભારતીય અંતરીક્ષ સ્ટેશન પણ બનાવવામાં આવશે. ચંદ્રયાન-૫ બાદ ભારત ચંદ્રયાન-૬ પર કાર્ય કરશે. ૨૦૩૫ સુધીમાં ભારતનો સ્પેસ સેક્ટર ૪૪ બિલિયન અમેરિકન ડોલરનું બની જશે એવી અપેક્ષા રાખવામાં આવી રહી છે. ચંદ્રયાન-૩ દ્વારા ભારતને ઘણી સફળતા મળી હતી. તે સમયે રોવરનું વજન ફક્ત ૨૫ કિલોગ્રામ હતું. જોકે, હવે ભારત ચંદ્ર પર વધુ ગંભીરતાપૂર્વક અભ્યાસ કરવાની આશા રાખે છે. આ માટે વૈજ્ઞાનિક ટેક્નોલોજીનો વધુ સારી રીતે ઉપયોગ કરવા અને વધુ ઊંડાણપૂર્વક શોધખોળ માટે જાપાન સાથે સહકાર શરૃ કર્યો છે. તેમની મદદથી ભારત હવે ચંદ્ર પર ૨૫૦ કિલોગ્રામનું રોવર લેન્ડ કરશે.