મહારાષ્ટ્રના નાગપુરમાં સોમવારે રાત્રે હિંસા ફાટી નીકળ્યા બાદ સ્થિતિ હવે નિયંત્રણમાં છે, પરંતુ વાતાવરણ તંગ છે. મહેલ વિસ્તારમાં કડક પોલીસ બંદોબસ્ત ગોઠવી દેવામાં આવ્યો છે. તોફાનીઓને પકડવા માટે પોલીસે આખી રાત કોમ્બિંગ ઓપરેશન હાથ ધર્યું હતું અને અત્યાર સુધીમાં 80 લોકોની ધરપકડ કરી છે. આ સિવાય સોશિયલ મીડિયા પર પણ ઝીણવટભરી નજર રાખવામાં આવી રહી છે. ભડકાઉ સામગ્રી અને વીડિયો પોસ્ટ કરતા 55 સોશિયલ મીડિયા એકાઉન્ટ પોલીસના રડાર પર છે.

  માહિતી અનુસાર, નાગપુરના ઘણા ભાગોમાં કર્ફ્યુ (કલમ 163) લાદવામાં આવ્યો છે અને સંવેદનશીલ વિસ્તારોમાં ભારે પોલીસ બળ હાજર છે. વહીવટીતંત્રે નાગપુરના કોતવાલી, ગણેશપેઠ, લક્કડગંજ, પચપાવલી, શાંતિનગર, સક્કરદરા, નંદનવન, ઈમામવાડા, યશોધરાનગર અને કપિલનગરમાં કલમ 144 લાગુ કરી છે. આ વિસ્તારોમાં મેડિકલ ઈમરજન્સી સિવાય કોઈને પણ ઘરની બહાર નીકળવાની છૂટ નથી.

  નાગપુર હિંસાનું મૂળ સોમવારે સવારે થયેલા પ્રદર્શનમાં છે. વિશ્વ હિંદુ પરિષદ અને બજરંગ દળના કાર્યકર્તાઓએ ઔરંગઝેબની કબર હટાવવાની માંગ સાથે મહલના છત્રપતિ શિવાજી મહારાજ ચોકમાં પ્રદર્શન કર્યું. આ દરમિયાન ઔરંગઝેબના પોસ્ટરો અને લીલા કપડામાં લપેટી પ્રતિકાત્મક કબરને બાળવાનો પ્રયાસ કરવામાં આવ્યો હતો. સાંજ સુધીમાં, ઇસ્લામના અપમાનની અફવાઓ ફેલાવા લાગી અને નાગપુરના ઘણા ભાગોમાં તણાવ વધી ગયો. જો કે, બજરંગ દળે આરોપોને નકારી કાઢ્યા હતા અને દાવો કર્યો હતો કે તેઓએ વિરોધ દરમિયાન માત્ર ઔરંગઝેબનું પૂતળું બાળ્યું હતું. પોલીસે આ અંગે ગુનો પણ નોંધ્યો હતો.