IPL 2025ની શરૂઆતમાં જ એક મોટો વિવાદ ઉભો થયો છે. ભારતનો પૂર્વ સ્ટાર ઓફ સ્પિનર હરભજન સિંહ પોતાની કોમેન્ટ્રીને કારણે ચાહકોના નિશાના પર આવી ગયો છે.હરભજન સિંહનો એક વીડિયો સોશિયલ મીડિયા પર વાયરલ થઈ રહ્યો છે. આ વીડિયો રાજસ્થાન રોયલ્સ અને સનરાઈઝર્સ હૈદરાબાદ વચ્ચે રમાયેલી મેચનો છે, જેમાં તેણે એક એવી ટિપ્પણી કરી છે જેનાથી હંગામો મચી ગયો છે. ચાહકો તેના પર જાતિવાદી ટિપ્પણી કરવાનો આરોપ લગાવી રહ્યા છે. 

સોશિયલ મીડિયા પર વાયરલ થઈ રહેલો આ વીડિયો રાજસ્થાન રોયલ્સની ઈનિંગની 18મી ઓવરનો છે. ત્યારે ઈશાન કિશન અને હેનરિક ક્લાસેન પિચ પર બેટિંગ કરી રહ્યા હતા અને જોફ્રા આર્ચર બોલિંગ કરી રહ્યો હતો. આ દરમિયાન, જ્યારે ક્લાસેને આર્ચરના બીજા અને ત્રીજા બોલ પર સતત ચોગ્ગા ફટકાર્યા, ત્યારે હરભજન સિંહે કહ્યું, ‘લંડનમાં કાળી ટેક્સીનું મીટર ઝડપથી ચાલે છે અને અહીં આર્ચર સાહેબનું મીટર પણ ઝડપથી ચાલે છે.’ તેની ટિપ્પણી વાયરલ થઈ રહી છે અને ચાહકો તેને ટિપ્પણી કરવાથી પ્રતિબંધિત કરવાની માંગ કરી રહ્યા છે.

ચાહકો માને છે કે હરભજન સિંહે ઈંગ્લેન્ડના ફાસ્ટ બોલર જોફ્રા આર્ચરની સરખામણી ‘કાળી ટેક્સી’ સાથે કરી હતી, જે એક જાતિવાદી ટિપ્પણી છે. એક યુઝરે લખ્યું, ‘હરભજન સિંહે હિન્દી કોમેન્ટરીમાં જોફ્રા આર્ચરને કાળી ટેક્સી કહી.’ આ ખૂબ જ ખરાબ વાત છે. તેના પર પ્રતિબંધ લગાવો. એક યુઝરે લખ્યું, ‘જાતિવાદ ચરમસીમાએ, હરભજન સિંહ આર્ચરને કાળી ટેક્સી કહી રહ્યો છે.’

આ મેચમાં જોફ્રા આર્ચરે IPLના ઈતિહાસનો સૌથી મોંઘો સ્પેલ ફેંક્યો હતો. તેણે 4 ઓવરમાં 76 રન આપ્યા હતા. આર્ચરે પહેલી જ ઓવરમાં 23 રન આપ્યા હતા. આ પછી આર્ચરે બીજી ઓવરમાં 12 રન, ત્રીજી ઓવરમાં 22 અને ચોથી ઓવરમાં 19 રન આપીને આ શરમજનક રેકોર્ડ પોતાના નામે કર્યો હતો. આર્ચર પહેલા, મોહિત શર્મા સૌથી મોંઘો સ્પેલ ફેંકનાર બોલર હતો. ગયા સિઝનમાં મોહિત શર્માએ એક મેચમાં 73 રન આપ્યા હતા. જ્યારે બાસિલ થમ્પીએ પણ એક વખત 70 રનનો સ્પેલ ફેંક્યો હતો.