વિદેશી સ્ટૂડન્ટસમાં કેનેડા, ઓસ્ટ્રેલિયા, યુકે અને યુએસનું આકર્ષણ ઘટયું
હવે તેમનામાં જર્મની, ફિનલેન્ડ અને ફ્રાન્સ જેવા દેશોનું આકર્ષણ વધ્યું છેઃ એક સમયે વિદેશી સ્ટુડન્ટસના ફેવરિટ ડેસ્ટિનેશન રહેલા દેશોમાં સ્ટડી પછી અપાતી વર્ક પરમિટના નિયમો, ત્યાં રહેવાનો વધી ગયેલો ખર્ચ અને અન્ય કારણોથી સ્ટડી વિઝાની એપ્લિકેશન્સ ઘટી છે : વિદેશી સ્ટૂડન્ટસના ઘટવાથી ઈન્સ્ટિટયૂશન્સની સાથે જે-તે દેશની ઈકોનોમી પણ પણ અસર પડે છે
નવી દિલ્હી, તા.૨૫: કેનેડા, ઓસ્ટ્રેલિયા, યુકે અને યુએસ જેવા દેશો વર્ષોથી વિદેશી સ્ટૂડન્ટ્સ માટે ફેવરિટ ડેસ્ટિનેશન રહ્યા છે પણ હવે આ દેશોનું આકર્ષણ ઘટી રહ્યું હોય તેવું લાગી રહ્યું છે. વર્ષ ૨૦૨૪માં આ દેશોમાં વિદેશી સ્ટૂડન્ટ્સનો પ્રવાહ ઘટયો હોવાનું જોવા મળી રહ્યું છે. કેનેડાની જ વાત કરીએ તો ત્યાં સ્ટૂડન્ટ વિઝા એપ્લિકેશન્સમાં ૪૬ ટકાનો ઘટાડો થયો છે. કેનેડામાં સ્ટડી માટે વર્ષ ૨૦૨૩માં ૮,૬૮,૦૦૦ વિદેશી સ્ટૂડન્ટે એપ્લિકેશન્સ કરી હતી જે ઘટીને ૨૦૨૪માં ૪,૬૯,૦૦૦ પર આવી ગઈ હતી. એક સમયે ઓસ્ટ્રેલિયા પણ વિદેશી સ્ટૂડન્ટ્સના ફેવરિટ ડેસ્ટિનેશનના લિસ્ટમાં ટોપ પર હતું પણ હવે ત્યાં સ્ટૂડન્ટ વિઝા માટેની અરજીમાં ૩૬ ટકાનો ઘટાડો નોંધાયો છે. ઓસ્ટ્રેલિયામાં વર્ષ ૨૦૨૩માં ૩,૯૦,૦૦૦ એપ્લિકેશન આવી હતી, જેની સામે ૨૦૨૪માં ૧,૭૬,૦૦૦ સ્ટૂડન્ટ્સે જ ત્યાં સ્ટડી કરવામાં રસ બતાવ્યો છે. બિઝનેસ સ્ટાન્ડર્ડના રિપોર્ટ મુજબ, અગ્રણી ગ્લોબલ એજ્યુકેશન કંપની MSM યુનિફાઈના તાજેતરના સ્ટડીમાં આ વાત સામે આવી છે.
કેનેડા અને ઓસ્ટ્રેલિયાની સરખામણીમાં બ્રિટન અને અમેરિકા માટે સ્ટૂડન્ટ વિઝા એપ્લિકેશન્સમાં ઓછો ઘટાડો થયો છે. બ્રિટનમાં ૧૬ ટકા અને અમેરિકામાં ૧૧ ટકાનો ઘટાડો નોંધાયો છે. જોકે, આ ઘટાડો નોંધપાત્ર તો છે જ. બ્રિટન માટે ૨,૯૪,૦૦ અને અમેરિકા માટે ૩,૨૨,૦૦૦ સ્ટૂડન્ટ વિઝા એપ્લિકેશન થઈ હતી.
આ દેશોમાં સ્ટૂડન્ટ્સ વિઝા માટેની એપ્લિકેશન્સમાં ઘટાડો થવાનું મુખ્ય કારણ તેમની નીતિઓ છે. જેમાં વધારે આવક બતાવવાની જરૂરિયાત, સ્ટૂડન્ટ્સના ઈરાદાઓનું કડક મુલ્યાંકન (ખાસ કરીને ઓસ્ટ્રેલિયામાં), કેનેડામાં પોસ્ટ-ગ્રેજ્યુએશન વર્ક ઓપ્શન્સમાં થયેલા ફેરફારોનો સમાવેશ થાય છે. આ કારણોથી સ્ટૂડન્ટ્સના મનમાં ભવિષ્યને લઈને અનિ?તિતાની સ્થિતિ જોવા મળી રહી છે. તે ઉપરાંત આ દેશોમાં રહેવાનો ખર્ચ પણ વધી ગયો હોવાથી વિદેશી સ્ટૂડન્ટ્સનું મન પાછું પડી રહ્યું છે. યુકે અને યુએસમાં તો કોસ્ટ ઓફ લિવિંગમાં ઘણો જ વધારો થયો છે. તો કેનેડાએ પોસ્ટ-ગ્રેજ્યુએશન વર્ક પરમિટ માટેના ક્રાઈટેરિયામાં ફેરફાર કર્યો હોવાથી ત્યાં સ્ટડી માટે જવા માગતા વિદેશી સ્ટૂડન્ટ્સમાં વર્ક પરમિટ મળવાને લઈને આશંકા ઊભી થઈ છે જે એક મોટી અડચણ છે. વિદેશી સ્ટૂડન્ટ્સને હવે આ દેશોમાં સ્ટડી કરવાની સાથે બીજા ખર્ચા ઉઠાવવાનું મુશ્કેલ લાગી રહ્યું છે.
સ્ટડીમાં જણાવાયું છે કે, હવે વિદેશી સ્ટૂડન્ટ્સમાં જર્મની, ફ્રાન્સ અને ફિનલેન્ડ જેવા દેશોનું આકર્ષણ વધ્યું છે. જર્મનીમાં વર્ષ ૨૦૨૩/૨૪માં ૩,૮૦,૦૦૦ વિદેશી સ્ટૂડન્ટ્સ ગયા હતા, જે તેની અગાઉના વર્ષ કરતા ૩ ટકાનો વધારો દર્શાવે છે. જર્મનીએ સ્કીલ્ડ ઈમિગ્રેશન એક્ટ લાગુ કર્યો છે, જે સ્ટૂડન્ટ્સને સ્ટડીની સાથે વધુ કલાકો કામ કરવાની છૂટ આપે છે અને ત્યાં પીઆર મળવા પણ સરળ છે. જર્મનીની એવરેજ ટયૂશન ફી ઘણી ઓછી છે અને ઘણા પ્રોગ્રામ તો ફ્રીમાં કરી શકાય છે.
ફ્રાન્સમાં વિદેશી સ્ટૂડન્ટ્સની સંખ્યામાં વર્ષ ૨૦૨૩ની સરખામણીમાં વર્ષ ૨૦૨૪માં ૫ ટકાનો વધારો થયો છે. વર્ષ ૨૦૨૪માં ૪,૩૬,૦૦૦ વિદેશી સ્ટૂડન્ટ્સની ફ્રાન્સના સ્ટડી વિઝા માટે એપ્લિકેશન્સ મળી હતી. ફ્રાન્સે વિદેશી સ્ટૂડન્ટ્સને આકર્ષવાના હેતુથી નીતિઓમાં ઘણા ફેરફાર કર્યા છે. જેમાં ફ્રેન્ચ ભાષાનો કોર્સ ફ્રીમાં કરાવવાનો અને હાઉસિંગ ઓપ્શન્સમાં વધારા જેવી બાબતોનો સમાવેશ થાય છે. ફ્રાન્સ વિદેશી સ્ટૂડન્ટ્સને ટયુશન ફીમાં પણ ઘણી સબસિડી આપી રહ્યું છે.
ફિનલેન્ડની વાત કરીએ તો અંગ્રેજી શીખવતા પ્રોગ્રામ્સમાં એપ્લિકેશન્સમાં વધારો થયો છે. ખાસ કરીને બિઝનેસ અને હેલ્થકેરમાં એપ્લિકેશન્સ વધી છે. તેણે રેસિડન્સી માટેના નિયમોમાં પણ ફેરફાર કર્યા છે, જે અંતર્ગત હવે વિદેશી સ્ટૂડન્ટ્સ તેમના પરિવારને પણ લઈ જઈ શકે છે અને કાયમી સેટલ થઈ શકે છે. ફિનલેન્ડે વિકસીત દેશોના સ્ટૂડન્ટ્સને ધ્યાનમાં રાખી સ્કોલરશિપ માટેના ફંડમાં પણ વધારો કર્યો છે.
MSM ગ્રુપના ફાઉન્ડર સંજય લૌલએ બિઝનેસ સ્ટાન્ડર્ડને જણાવ્યું હતું કે, સ્ટડી માટે ફેવરિટ ડેસ્ટિનેશન રહેલા દેશોની પોલિસીમાં થયેલા ફેરફારથી માત્ર સ્ટૂડન્ટ્સને જ અસર થઈ છે એવું નથી, ઈન્સ્ટિટયૂશન્સની નાણાકીય સ્થિતિ પર પણ અસર પડી છે. વિદેશી સ્ટૂડન્ટ્સમાં ઘટાડાથી ઈન્સ્ટિટયૂશન્સની રેવન્યુમાં ઘટાડો થયો છે અને તેની સીધી અસર સ્થાનિક ઈકોનોમી પર પડી છે. જેમકે, વર્ષ ૨૦૨૨માં કેનેડાની ઈકોનોમીમાં વિદેશી સ્ટૂડન્ટ્સે ૨૨ બિલિયન કેનેડિયન ડોલર ઠાલવ્યા હતા, જેમાં આ વર્ષે મોટો ઘટાડો થવાનો અંદાજ છે. ઘણા દેશો STEM સેક્ટર્સમાં લેબરની અછતને પૂરી કરવા વિદેશી ઈન્ટરનેશનલ ગ્રેજ્યુએટ્સ પર નિર્ભર છે ત્યારે વિદેશી સ્ટૂડન્ટ્સ આવતા ઓછા થશે તો તેમના માટે આ ગેપ પૂરવો અઘરો બની જશે.
(2:52 PM IST)
છેલ્લા 8 દિવસમાં સૌથી લોકપ્રિય 
