ફ્રાન્સની એક કોર્ટે મરીન લે પેનને પાંચ વર્ષ માટે કોઈપણ સરકારી પદ સંભાળવા પર પ્રતિબંધ મૂક્યો છે અને તેમને ચાર વર્ષની જેલની સજા ફટકારી છે, જેના કારણે તેઓ 2027ની રાષ્ટ્રપતિની ચૂંટણી લડવા માટે અયોગ્ય બની ગયા છે.

ફ્રાન્સના રાષ્ટ્રપતિ ઇમેન્યુઅલ મેક્રોનના માર્ગમાં સૌથી મોટો અવરોધ દૂર થઈ ગયો છે. આવું એટલા માટે કહેવામાં આવી રહ્યું છે કારણ કે ફ્રેન્ચ કોર્ટે મરીન લે પેનને તાત્કાલિક અસરથી પાંચ વર્ષ માટે સરકારી પદ સંભાળવા પર પ્રતિબંધ મૂક્યો છે. મરીન લે પેનને ચાર વર્ષની જેલની સજા ફટકારવામાં આવી છે, જ્યારે બે વર્ષની સજા સસ્પેન્ડ કરવામાં આવી છે. કોર્ટના આ નિર્ણયથી સ્પષ્ટ થઈ ગયું છે કે લે પેન હવે 2027ની રાષ્ટ્રપતિની ચૂંટણીમાં ભાગ લઈ શકશે નહીં.

લે પેનને €100,000 (£82,635) નો દંડ પણ ફટકારવામાં આવ્યો છે. તે જેલની સજા સામે અપીલ કરશે તેવી શક્યતા છે, તેથી સજા હવે લાગુ કરવામાં આવશે નહીં. આ ચોક્કસપણે લે પેન અને તેમના પક્ષ માટે એક મોટો ફટકો છે. આના તેમના પર, તેમના પક્ષ પર અને ફ્રેન્ચ લોકશાહી પર ઊંડા પ્રભાવ પડશે.

તેમના કેટલાક વિરોધીઓએ કહ્યું કે તેઓ આશા રાખતા હતા કે તેમને રાષ્ટ્રપતિ પદ માટે ચૂંટણી લડવાથી રોકવામાં આવશે નહીં - એમ કહીને કે તેઓ તેમની સામે ન્યાયિક પ્રણાલી દ્વારા નહીં, પણ મતપેટી દ્વારા લડવા માંગે છે. પણ હવે આખો ખેલ બદલાઈ ગયો છે. લે પેન ચૂંટણીની રેસમાંથી બહાર છે અને ખૂબ ગુસ્સે છે. કોર્ટરૂમમાંથી બહાર નીકળતી વખતે તેમના ચહેરા પર ગુસ્સાના ભાવ સ્પષ્ટ દેખાઈ રહ્યા હતા.