નોઈડા: નવરાત્રી દરમિયાન નોઈડાની એક મહિલા સાથે આવી ઘટના બની, જેનાથી સોશિયલ મીડિયા પર લોકો ચોંકી ગયા. મહિલાએ ઓનલાઈન વેજ બિરયાનીનો ઓર્ડર આપ્યો હતો પરંતુ તેને ચિકન બિરયાની પીરસવામાં આવી. મામલો એટલો ગંભીર બની ગયો કે પોલીસે એક રેસ્ટોરન્ટ કર્મચારીને કસ્ટડીમાં લીધો.

આ ઘટના 4 એપ્રિલના રોજ બની હતી. નોઈડાની છાયા શર્મા નામની એક મહિલાએ ઓનલાઈન ફૂડ ડિલિવરી એપ સ્વિગી દ્વારા લખનવી કબાબ પરાઠા નામના રેસ્ટોરન્ટમાંથી વેજ બિરયાનીનો ઓર્ડર આપ્યો હતો. પણ જ્યારે તેણે ભોજન ખાધું ત્યારે તેને ખ્યાલ આવ્યો કે તે નોન-વેજ બિરયાની હતી. તેણે વીડિયોમાં કહ્યું કે તે શુદ્ધ શાકાહારી છે. છાયાએ કહ્યું કે તેણે ૨-૩ ચમચી ખાધા હતા, ત્યારે જ તેને ખ્યાલ આવ્યો કે તેમાં નોન-વેજ છે. તેણે રેસ્ટોરન્ટનો સંપર્ક કરવાનો પ્રયાસ કર્યો, પરંતુ ત્યાં સુધીમાં રેસ્ટોરન્ટ બંધ થઈ ગયું હતું અને કોઈએ ફોન પણ ઉપાડ્યો નહીં.

છાયા શર્મા દ્વારા પોસ્ટ કરાયેલો વીડિયો વાયરલ થયો છે. આના પર હજારો લોકોએ પ્રતિભાવ આપ્યો. ઘણા લોકોએ આ ઘટનાને ધાર્મિક લાગણીઓ સાથે જોડાયેલી ગણાવી અને સ્વિગી અને રેસ્ટોરન્ટ સામે કડક કાર્યવાહીની માંગ કરી.

કેટલાક યુઝર્સે મહિલાને એવો પણ પ્રશ્ન કર્યો કે તેણે નવરાત્રી જેવા પ્રસંગે નોન-વેજ રેસ્ટોરન્ટમાંથી ભોજન કેમ મંગાવ્યું. એક વર્ગે તેને સાવધાનીનો અભાવ ગણાવ્યો, જ્યારે અન્ય લોકોએ તેને ધાર્મિક અપમાન તરીકે જોયું.

ઘટનાની ગંભીરતા જોઈને, ઉત્તર પ્રદેશ પોલીસે આ મામલે તાત્કાલિક કાર્યવાહી કરી. પોલીસે રેસ્ટોરન્ટના એક સ્ટાફ સભ્યની અટકાયત કરી છે અને આ મામલાની તપાસ શરૂ કરી છે. દરમિયાન, સ્વિગી દ્વારા હજુ સુધી કોઈ સત્તાવાર નિવેદન જારી કરવામાં આવ્યું નથી.