લિસ્બન: ભારતના માનનીય રાષ્ટ્રપતિ શ્રીમતી દ્રૌપદી મુર્મુએ પોર્ટુગલના રાષ્ટ્રપતિ મહામહિમ માર્કેલો રેબેલો દ સોઝા સાથે મુલાકાત કરી અને ભારત-પોર્ટુગલ વચ્ચેના દ્વિપક્ષીય સંબંધોને નવી ઉંચાઈએ લઈ જવા માટે વાર્તાલાપમાં ભાગ લીધો. આ ઐતિહાસિક પ્રસંગે લિસ્બનના ‘પ્રાકા દો ઈમ્પેરિયો’ ખાતે રાષ્ટ્રપતિ મુર્મુનું ભવ્ય સ્વાગત કરવામાં આવ્યું, જ્યાં તેમને ગાર્ડ ઓફ ઑનર સાથે ઔપચારિક રીતે આવકારવામાં આવ્યા. આ મુલાકાતમાં તેમની સાથે કેન્દ્રીય રાજ્ય મંત્રીઓ શ્રીમતી નિમુબેન બાંભણિયા, શ્રીમતી સંધ્યા રાય અને શ્રી ધવલ પટેલ પણ હાજર રહ્યા હતા.

#)સાંતા મરીયા ચર્ચ અને જેરોનિમોસ મઠની મુલાકાત:
રાષ્ટ્રપતિ મુર્મુએ પોર્ટુગલની મુલાકાત દરમિયાન સાંતા મરીયા ચર્ચની યાત્રા કરી અને પોર્ટુગલના પ્રખ્યાત રાષ્ટ્રીય કવિ લુઇસ વાઝ દ કેમોઈઝની સમાધિ પર પુષ્પાંજલિ અર્પણ કરી. આ સાથે જ તેમણે 16મી સદીની કલાત્મક સ્થાપત્ય કળાનું ઉત્તમ ઉદાહરણ ગણાતા જેરોનિમોસ મઠનું પણ નિરીક્ષણ કર્યું. આ મુલાકાત દ્વારા બંને દેશો વચ્ચે સાંસ્કૃતિક સમજણ અને સંબંધોને વધુ ગાઢ બનાવવાનો પ્રયાસ કરવામાં આવ્યો.

50 વર્ષના રાજદ્વારી સંબંધોની ઉજવણીમાં સ્મારક ટપાલ ટિકિટનું વિમોચન:
ભારત અને પોર્ટુગલ વચ્ચે રાજદ્વારી સંબંધોના 50 વર્ષ પૂર્ણ થવાના ઉપલક્ષ્યમાં એક વિશેષ સમારંભનું આયોજન કરવામાં આવ્યું હતું, જેમાં બંને રાષ્ટ્રપતિઓની ઉપસ્થિતિમાં સ્મારક ટપાલ ટિકિટોનું વિમોચન કરાયું. આ ટપાલ ટિકિટોમાં ભારતના રાજસ્થાનના પરંપરાગત તાલબેલિયા પોશાક અને પોર્ટુગલના વિયાના દો કાસ્ટેલો ડ્રેસને દર્શાવવામાં આવ્યા છે, જે બંને દેશોની સમૃદ્ધ સાંસ્કૃતિક વિવિધતાને પ્રતિબિંબિત કરે છે.

વેપાર, ટેક્નોલોજી અને ઊર્જા ક્ષેત્રે સહકાર વધારવા પર ભાર:
રાષ્ટ્રપતિ મુર્મુ અને રાષ્ટ્રપતિ માર્કેલો વચ્ચે થયેલ દ્વિપક્ષીય વાર્તાલાપમાં વેપાર, રોકાણ, માહિતી ટેક્નોલોજી, નવીનીકરણશીલ ઊર્જા અને કનેક્ટિવિટી જેવા મહત્ત્વના ક્ષેત્રોમાં સહકારને વધુ મજબૂત કરવા પર ચર્ચા કરવામાં આવી. બંને નેતાઓએ વૈશ્વિક અને પ્રાદેશિક મુદ્દાઓ પર પણ વિચાર-વિમર્શ કર્યો અને આગામી સમયમાં સહયોગને નવું આયામ આપવાની પ્રતિબદ્ધતા વ્યક્ત કરી.

બંને દેશો વચ્ચે વિશ્વાસ અને સહયોગનો મજબૂત પાયો:
બંને રાષ્ટ્રપતિઓએ ભારપૂર્વક જણાવ્યું કે ભારત અને પોર્ટુગલ વચ્ચેના સંબંધો પરસ્પર વિશ્વાસ, સમજૂતી અને બહુપક્ષીય મંચો પર સહયોગ પર આધારિત છે. આ મુલાકાત દ્વારા બંને દેશોના સંબંધોને વધુ ગાઢ બનાવવાનો પ્રયાસ કરવામાં આવ્યો છે, જે આવનારા વર્ષોમાં નવી ઉંચાઈઓ સર કરશે. આ મુલાકાતને ભારત-પોર્ટુગલના સંબંધોમાં એક મહત્ત્વના પડાવ તરીકે જોવામાં આવી રહી છે.