મુંબઈ, 9 એપ્રિલ 2025: મુંબઈ જવાનું વિચારી રહેલા મુસાફરો માટે મહત્ત્વના સમાચાર છે. પશ્ચિમ રેલ્વેએ જાહેરાત કરી છે કે માહિમ ક્રીક બ્રિજના રિ-ગર્ડરિંગના કામને કારણે 11 અને 12 એપ્રિલના રોજ કુલ 519 ટ્રેનો પ્રભાવિત થશે. આ કામ માટે રાત્રિના સમયે બ્લોક લેવામાં આવશે, જેના કારણે મુંબઈની લોકલ અને લાંબા અંતરની ઘણી ટ્રેનોની સેવા ખોરવાશે. પશ્ચિમ રેલ્વેના જણાવ્યા મુજબ, આ સમારકામનું કામ 11-12 એપ્રિલ અને 12-13 એપ્રિલની રાત્રે હાથ ધરવામાં આવશે, જેના લીધે માહિમ અને બાંદ્રા સ્ટેશનો વચ્ચેના પુલ પર ટ્રાફિક બંધ રહેશે.

બ્લોકનો સમય અને અસર:
પશ્ચિમ રેલ્વેના પ્રકાશન મુજબ, પહેલો નાઇટ બ્લોક 11 એપ્રિલે રાત્રે 11:00 વાગ્યાથી 12 એપ્રિલે સવારે 8:30 વાગ્યા સુધી રહેશે, જે 9 કલાક અને 30 મિનિટનો હશે. બીજો બ્લોક 12 એપ્રિલે રાત્રે 11:30 વાગ્યાથી 13 એપ્રિલે સવારે 9:00 વાગ્યા સુધી ચાલશે. આ બંને બ્લોક દરમિયાન હાઇ-સ્પીડ અને સ્લો લાઇન પરની ટ્રેન સેવાઓ સંપૂર્ણપણે બંધ રહેશે. પશ્ચિમ રેલ્વેના મુખ્ય જનસંપર્ક અધિકારી વિનીત અભિષેકે જણાવ્યું, "આ સમયગાળા દરમ્યાન કેટલીક લોકલ ટ્રેનો ઉપરાંત મેલ અને એક્સપ્રેસ ટ્રેનો પણ પ્રભાવિત થશે."

ટ્રેનોની સ્થિતિ અને વૈકલ્પિક વ્યવસ્થા:
આ બ્લોકને કારણે કુલ 334 ટ્રેનો સંપૂર્ણ રીતે રદ કરાઈ છે, જેમાં 11 એપ્રિલે 132 અને 12 એપ્રિલે 202 ટ્રેનોનો સમાવેશ થાય છે. આ ઉપરાંત, 185 ટ્રેનો આંશિક રીતે રદ રહેશે, જેમાંથી 68 ટ્રેનો 11 એપ્રિલે અને 117 ટ્રેનો 12 એપ્રિલે ચાલશે. મુસાફરોની સુવિધા માટે પશ્ચિમ રેલ્વેએ 110 વધારાની ટ્રેનો ચલાવવાનો નિર્ણય લીધો છે, જેમાં 11 એપ્રિલે 42 અને 12 એપ્રિલે 68 ટ્રેનો શામેલ છે. નવ લાંબા અંતરની ટ્રેનો આંશિક રીતે રદ થશે, જ્યારે 11 અન્ય ટ્રેનોનું સમયપત્રક બદલાશે અથવા તેને નિયંત્રિત કરવામાં આવશે.

કયા સ્ટેશનો પર અસર?
આ મેગા બ્લોકની અસર મુંબઈની પશ્ચિમ રેલ્વે લાઇનના અનેક સ્ટેશનો પર જોવા મળશે. મહાલક્ષ્મી, લોઅર પરેલ, પ્રભાદેવી, માટુંગા રોડ, માહિમ અને ખાર રોડ જેવા સ્ટેશનો પર ટ્રેનોનું આગમન અને પ્રસ્થાન બંધ રહેશે. પશ્ચિમ રેલ્વેનું ઉપનગરીય નેટવર્ક ચર્ચગેટથી દહાણુ રોડ સુધી ફેલાયેલું છે અને દરરોજ 30 લાખથી વધુ મુસાફરો આ નેટવર્કનો ઉપયોગ કરે છે. રેલવેએ મુસાફરોને સલાહ આપી છે કે તેઓ આ દિવસોમાં મુસાફરીનું આયોજન કાળજીપૂર્વક કરે અને ટ્રેનોની અપડેટેડ માહિતી તપાસી લે.