ન્યુયોર્ક : અમેરિકામાં અભ્યાસ કે રહેઠાણ માટે જવાનું સપનું જોતા લાખો ભારતીય વિદ્યાર્થીઓ અને ઇમિગ્રન્ટ્સ માટે માઠા સમાચાર છે. ટ્રમ્પ વહીવટીતંત્રની નવી ઇમિગ્રેશન નીતિઓએ અમેરિકા પહોંચવાની પ્રક્રિયાને વધુ કડક બનાવી દીધી છે. હવે, જો તમારી પાસે માન્ય યુએસ વિઝા કે ગ્રીન કાર્ડ હોય તો પણ, સોશિયલ મીડિયા પર કરેલી એક ભૂલથી તમારું વિઝા રદ થઈ શકે છે કે તમને એરપોર્ટ પર જ અટકાયતનો સામનો કરવો પડી શકે છે. યુએસ સિટીઝનશિપ એન્ડ ઇમિગ્રેશન સર્વિસીસ (USCIS)એ સ્પષ્ટ ચેતવણી આપી છે કે ઇઝરાયલ, તેના નાગરિકો કે યહૂદી સમુદાય વિરુદ્ધ ટીકાત્મક પોસ્ટ કરનારાઓને વિઝા કે રહેઠાણની મંજૂરી નહીં મળે. આ નવી નીતિ તાત્કાલિક અમલમાં આવી ગઈ છે અને તે વિદ્યાર્થી વિઝા તેમજ ગ્રીન કાર્ડની અરજીઓ પર લાગુ પડશે.

યુએસ ઇમિગ્રેશન વિભાગે જણાવ્યું છે કે હવેથી અરજદારોની સોશિયલ મીડિયા પ્રવૃત્તિની ઝીણવટભરી તપાસ કરવામાં આવશે. જો કોઈ વ્યક્તિ હમાસ, પેલેસ્ટિનિયન ઇસ્લામિક જેહાદ, હિઝબુલ્લાહ (લેબનોન) કે હૂતી (યમન) જેવા સંગઠનોને સમર્થન આપતી પોસ્ટ કરે છે, તો તેને યહૂદી વિરોધી સામગ્રી ગણીને વિઝા કે રેસિડેન્સી માટે નકારાત્મક પરિબળ તરીકે જોવામાં આવશે. આવા કેસોમાં અરજી નકારવામાં આવશે અથવા પહેલાથી મળેલા વિઝા પણ રદ કરવાની શક્યતા છે.

ડિપાર્ટમેન્ટ ઓફ હોમલેન્ડ સિક્યુરિટી (DHS)ના પબ્લિક અફેર્સ માટે સહાયક સચિવ ટ્રિસિયા મેકલોફલિને આ અંગે સખત વલણ અપનાવ્યું છે. તેમણે કહ્યું, "અમેરિકા એવા લોકો માટે નથી કે જેઓ આતંકવાદને સમર્થન આપે છે. અમારે આવા લોકોને દેશમાં પ્રવેશ આપવો કે અહીં રહેવા દેવાની કોઈ ફરજ નથી. જે લોકો એવું માને છે કે તેઓ અમેરિકામાં આવીને યહૂદી વિરોધી હિંસા કે આતંકવાદનું સમર્થન કરી શકે છે, તેમણે પોતાનો વિચાર બદલવો પડશે. અહીં તેમનું કોઈ સ્વાગત નથી."

આ નવી નીતિએ ભારતીય વિદ્યાર્થીઓ અને ઇમિગ્રન્ટ્સમાં ચિંતાનું મોજું ફેલાવ્યું છે. ખાસ કરીને, સોશિયલ મીડિયાના ઉપયોગમાં સાવચેતી રાખવાની સલાહ આપવામાં આવી રહી છે, કારણ કે એક નાની ભૂલ પણ તેમના અમેરિકન સપનાને ભાંગી શકે છે.