ભાવનગર: ઇન્ડિયન હોટેલ્સ કંપની લિમિટેડ (IHCL) દ્વારા આગામી તાજ પાલીતાણા હોટેલમાં નોન-વેજ ફૂડ અને એલ્કોહોલિક પીણાં પીરસવામાં નહીં આવે, એવો નિર્ણય લેવામાં આવ્યો છે. જૈન સમુદાયે આ લક્ઝરી હોસ્પિટાલિટી પ્રોજેક્ટની જાહેરાત સામે રોષ વ્યક્ત કર્યો હતો, જેને ધ્યાને લઈને IHCLએ આ પગલું ભર્યું છે. આ નિર્ણય સાથે, તાજ પાલીતાણા એ IHCLની તાજ બ્રાન્ડ હેઠળ પ્રથમ શાકાહારી અને એલ્કોહોલ-મુક્ત હોટેલ બનશે.

આ નિર્ણયની પાછળનું કારણ 1 એપ્રિલના રોજ એક મીડિયા હાઉસે પ્રકાશિત કરેલા અહેવાલમાં જૈન સમુદાયની ચિંતાઓને ઉજાગર કરવામાં આવ્યું હતું. જૈન સમુદાયને ભય હતો કે, તાજ પાલીતાણા હોટેલમાં નોન-વેજ ભોજન અને એલ્કોહોલ પીરસાતાં તેમના પવિત્ર યાત્રાધામની પવિત્રતા ખંડિત થશે. IHCLએ ભાવનગર જિલ્લામાં આવેલા પાલીતાણા પેલેસને પાંચ સ્ટાર હોટેલમાં રૂપાંતરિત કરવા માટે કરાર કરેલો છે.

મીડિયા હાઉસે IHCLનો સંપર્ક કર્યો ત્યારે કંપનીએ સ્પષ્ટ કર્યું કે, પાલીતાણામાં આ હોટેલમાં માત્ર શાકાહારી ભોજન અને નોન-એલ્કોહોલિક પીણાં જ પીરસવામાં આવશે. IHCLના પ્રવક્તાએ જણાવ્યું, “પાલીતાણામાં નિર્માણાધીન હોટેલમાં ફક્ત શાકાહારી જૈન ભોજન અને નોન-એલ્કોહોલિક પીણાં ઉપલબ્ધ હશે.” આ નિર્ણયથી તાજ પાલીતાણા તાજ બ્રાન્ડની પ્રથમ એવી હોટેલ બનશે જે સંપૂર્ણપણે શાકાહારી અને એલ્કોહોલ-મુક્ત રહેશે.

પાલીતાણા પેલેસના માલિક અને રાજકોટના પૂર્વ રાજવી પરિવારના મંધાતસિંહ જાડેજાએ પણ આ નિર્ણયને સમર્થન આપ્યું છે. તેમણે ગુજરાત સરકારના એનિમલ વેલ્ફેર બોર્ડના સભ્યના પત્રના જવાબમાં જણાવ્યું, “અમે પ્રસ્તાવિત હોટેલમાં માત્ર શાકાહારી જૈન ભોજન અને નોન-એલ્કોહોલિક પીણાં જ પીરસીશું. અમારી આ પ્રોપર્ટી પર કાર્યરત કોઈપણ હોટેલ બ્રાન્ડ માટે પણ આ જ નીતિ લાગુ કરવાનો અમારો ઇરાદો છે. અમારો જૈન સમુદાયની લાગણીઓને ઠેસ પહોંચાડવાનો કે વ્યવસાયિક હિતોને ધ્યાને લઈને કોઈ યોજના ઘડવાનો કોઈ ઇરાદો નથી.”

બીજી તરફ, શ્રી મુંબઈ જૈન સંઘ સંગઠન, જે મુંબઈના તમામ જૈન ઉપ-સમુદાયોનું એક સંગઠન છે, તેણે ગુજરાતના મુખ્યમંત્રી, ગૃહમંત્રી અને ગુજરાત પવિત્ર યાત્રાધામ વિકાસ બોર્ડને પત્ર લખીને આ હોટેલ પ્રોજેક્ટનો વિરોધ કર્યો હતો. IHCLની આ જાહેરાતને સંગઠને આવકારી છે, પરંતુ તેમને હજુ પણ ચિંતા છે કે હોટેલ સંસ્કૃતિ આ પવિત્ર સ્થળની પવિત્રતાને નુકસાન પહોંચાડી શકે છે.

સંગઠનના કારોબારી સમિતિના સભ્ય કમલેશ શાહે જણાવ્યું, “તાજ ગ્રુપ પોતાની નીતિઓનું પાલન કરશે અને અમને તેમના વિશે ચિંતા નથી, પરંતુ પાલીતાણામાં તેમનું આગમન અન્ય હોટેલ ચેઇન્સ માટે પણ દરવાજા ખોલશે. બધી હોટેલો તાજ જેટલી પ્રતિબદ્ધ નથી હોતી અને ભવિષ્યમાં અન્ય હોટેલો આ સ્થળની પવિત્રતાને ખંડિત કરી શકે છે.”

સંગઠને IHCLના મેનેજિંગ ડિરેક્ટર અને સીઇઓ પુનીત છતવાલને મળવા માટે સમય માંગ્યો છે, પરંતુ હજુ સુધી તેમનો જવાબ મળ્યો નથી. જૈન સમુદાયે ગુજરાત સરકારને પણ આવી તમામ યાત્રાધામ શહેરો અને ગામોને અયોધ્યા અને વૈષ્ણોદેવીની જેમ શાકાહારી અને એલ્કોહોલ-મુક્ત ઝોન બનાવવાની માંગ કરી છે.

પાલીતાણા, જ્યાં 850થી વધુ મંદિરો આવેલાં છે, તે જૈન સમુદાય માટે સૌથી મહત્વનાં યાત્રાધામોમાંનું એક છે. શહેરમાં આવેલું શત્રુંજય પર્વત જૈન સમુદાયના પાંચ પંચક્ષેત્રોમાંનું એક પવિત્ર સ્થળ માનવામાં આવે છે.