નવી દિલ્‍હી, તા.૧૪: હરિયાણાના યમુનાનગરમાં એક રેલીને સંબોધિત કરતી વખતે પીએમ નરેન્‍દ્ર મોદીએ કોંગ્રેસ પર બંધારણની અવગણના કરવાનો આરોપ લગાવ્‍યો. તેમણે કહ્યું કે કોંગ્રેસે હંમેશા સત્તા કબજે કરવા માટે બંધારણનો ઉપયોગ હથિયાર તરીકે કર્યો છે. પીએમ મોદીએ કહ્યું કે આ જ કોંગ્રેસે કટ્ટરપંથી મુસ્‍લિમોને ખુશ કરવા માટે ૨૦૧૩ માં વકફ કાયદામાં સુધારો કર્યો હતો. ચૂંટણી જીતવા માટે આ થોડા મહિના પહેલા જ કરવામાં આવ્‍યું હતું અને તે એવો કાયદો હતો કે તેના કારણે બંધારણ પણ નબળું પડી ગયું અને તેના પર લાગુ પણ થઈ શકયું નહીં. એટલું જ નહીં, પીએમ મોદીએ કહ્યું કે જો કોંગ્રેસ મુસ્‍લિમોને આટલો પ્રેમ કરે છે તો તે કોઈ મુસ્‍લિમને પાર્ટીનો અધ્‍યક્ષ કેમ નથી બનાવતી.

તેમણે કહ્યું કે કોંગ્રેસ ચૂંટણીમાં મુસ્‍લિમોને અડધી ટિકિટ કેમ નથી આપતી. પીએમ નરેન્‍દ્ર મોદીએ કહ્યું કે કોંગ્રેસે કટોકટી દરમિયાન બંધારણના ટુકડા કરી નાખ્‍યા હતા. કોંગ્રેસે કટોકટી દરમિયાન બંધારણની ભાવનાને કચડી નાખી જેથી તે કોઈક રીતે સત્તા જાળવી શકે. તેમણે કહ્યું કે બંધારણની ભાવના એ છે કે બધા માટે ન્‍યાય હોવો જોઈએ અને સમાનતાની ભાવના સાથે કાર્ય થવું જોઈએ. બંધારણની ભાવના એ છે કે બધા માટે એક સમાન ન્‍યાય સંહિતા હોવી જોઈએ, જેને હું ધર્મનિરપેક્ષ નાગરિક સંહિતા કહું છું. પરંતુ કોંગ્રેસે કયારેય તેનો અમલ કર્યો નહીં.

પ્રધાનમંત્રીએ કહ્યું કે ઉત્તરાખંડમાં ભાજપ સરકાર સત્તામાં આવ્‍યા પછી, ધર્મનિરપેક્ષ નાગરિક સંહિતા લાગુ કરવામાં આવી. તેનો અમલ ખૂબ જ ઉત્‍સાહથી કરવામાં આવ્‍યો. દેશની કમનસીબી જુઓ કે જે લોકો બંધારણને પોતાના ખિસ્‍સામાં રાખે છે તેઓ તેનો પણ વિરોધ કરે છે. પીએમ મોદીએ કહ્યું કે કર્ણાટકમાં કોંગ્રેસ સરકારે ટેન્‍ડરોમાં ધર્મના આધારે અનામત આપી હતી, જેની બંધારણમાં જોગવાઈ નથી. બાબા સાહેબ ભીમરાવ આંબેડકરે પણ આ અંગે સ્‍પષ્ટ વાત કરી હતી.

પીએમ મોદીએ કહ્યું કે હું કહું છું કે જો કોંગ્રેસ મુસ્‍લિમોને આટલો પ્રેમ કરે છે તો તે તેમના એક નેતાને પોતાની પાર્ટીનો અધ્‍યક્ષ કેમ નથી બનાવતી. ચૂંટણીમાં તમે તેમને અડધી ટિકિટ કેમ નથી આપતા? તેમણે કહ્યું કે આ લોકોને કોઈની પરવા નથી. તેઓ એવા નિર્ણયો લે છે જેનાથી ગરીબ મુસ્‍લિમો માટે પણ મુશ્‍કેલી ઊભી થાય છે. આવો વકફ એક્‍ટ હતો, જેના કારણે ફક્‍ત કટ્ટરપંથી મુસ્‍લિમો અને શ્રીમંત લોકોને જ વકફ બોર્ડ પર નિયંત્રણ મળ્‍યું. હવે બધા નવા કાયદાથી ખુશ છે