મોડાસા, 16 એપ્રિલ 2025: કોંગ્રેસના અગ્રણી નેતા અને સાંસદ રાહુલ ગાંધીના ગુજરાત પ્રવાસનો આજે બીજો દિવસ છે. તેઓ આજે અરવલ્લી જિલ્લાના મોડાસામાં પહોંચ્યા હતા, જ્યાં તેમણે કોંગ્રેસના સંગઠનને મજબૂત કરવા માટેના ‘સંગઠન સૃજન અભિયાન’નો શુભારંભ કરાવ્યો. આ અભિયાનના ભાગરૂપે ગુજરાતમાં પાયલટ પ્રોજેક્ટની શરૂઆત કરવામાં આવી છે, જેનો ઉદ્દેશ સમગ્ર દેશમાં કોંગ્રેસના સંગઠનને વધુ મજબૂત અને સક્રિય બનાવવાનો છે. રાહુલ ગાંધી અમદાવાદથી મોડાસા પહોંચ્યા બાદ સ્વામિનારાયણ મંદિર ખાતે અરવલ્લી જિલ્લાના નેતાઓ અને કાર્યકરો સાથે બેઠક યોજી હતી. આ બેઠક બાદ તેઓ કાર્યકર્તા સંમેલનમાં સંબોધન કરશે. આ કાર્યક્રમને લઈને અરવલ્લી જિલ્લા પોલીસે કડક સુરક્ષા વ્યવસ્થા ગોઠવી છે.

સંગઠનને નવી દિશા આપવાનો પ્રયાસ:
રાહુલ ગાંધીના નેતૃત્વમાં કોંગ્રેસે દેશભરમાં પોતાના સંગઠનને મજબૂત કરવા અને જિલ્લા પ્રમુખોની સત્તા વધારવાનો નિર્ણય લીધો છે. આ યોજનાના પાયલટ પ્રોજેક્ટની શરૂઆત ગુજરાતથી કરવામાં આવી છે. આ અભિયાન હેઠળ જિલ્લા અને શહેર પ્રમુખોની નિમણૂક માટે નવી અને પારદર્શક પ્રક્રિયા અપનાવવામાં આવશે. ગઈકાલે અમદાવાદના રાજીવ ગાંધી ભવન ખાતે રાહુલ ગાંધીએ ગુજરાત કોંગ્રેસના વરિષ્ઠ નેતાઓ સાથે બેઠક યોજી હતી, જેમાં જિલ્લા નિરીક્ષકોની નિમણૂક કરીને તેમને જવાબદારીઓ સોંપવામાં આવી હતી.

આ નિરીક્ષકોની ટીમમાં એક કેન્દ્રીય નિરીક્ષક અને ચાર ગુજરાતના નિરીક્ષકોનો સમાવેશ થાય છે. આ ટીમને 10 દિવસમાં જિલ્લા અંગેનો પ્રથમ અહેવાલ સોંપવાની સૂચના આપવામાં આવી છે. આગામી 45 દિવસમાં એટલે કે 31 મે, 2025 સુધીમાં જિલ્લા પ્રમુખોની નિમણૂક પ્રક્રિયા પૂર્ણ કરવાનો લક્ષ્યાંક નિર્ધારિત કરાયો છે. નિરીક્ષકોને જિલ્લા અને શહેર અધ્યક્ષોની પસંદગી માટે પાંચ નામોની પેનલ તૈયાર કરવાની જવાબદારી સોંપાઈ છે. આ માટે તેઓએ સંબંધિત જિલ્લા અથવા શહેરનો વિસ્તૃત પ્રવાસ કરવો પડશે અને દરેક સ્થળે ઓછામાં ઓછા ત્રણ દિવસ રોકાવું પડશે.

નિરીક્ષકોની ભૂમિકા અને જવાબદારી:
નિરીક્ષકોને સૂચના આપવામાં આવી છે કે તેઓએ જિલ્લા અને શહેરમાં સૌથી વધુ સક્ષમ અને સ્વીકૃત નેતાઓની ઓળખ કરવી. આ પ્રક્રિયામાં તેઓએ માત્ર નેતાઓ જ નહીં, પરંતુ કાર્યકરો અને સામાન્ય જનતાને પણ મળવું પડશે. આ માટે પોલિટિકલ અફેર્સ કમિટીના સભ્યો, સાંસદો, પૂર્વ સાંસદો, ધારાસભ્યો, પૂર્વ ધારાસભ્યો, SC, ST, OBC અને માયનોરિટી વિભાગના વડાઓ તેમજ સ્થાનિક સ્વરાજ્ય સંસ્થાઓના પૂર્વ વડાઓને નિરીક્ષક તરીકે જવાબદારી સોંપવામાં આવી છે. આ પ્રક્રિયા દ્વારા ગ્રાઉન્ડ લેવલથી કોંગ્રેસના સંગઠનને ફરીથી સક્રિય અને મજબૂત કરવાનો પ્રયાસ કરાશે.

નવી પસંદગી પ્રક્રિયા અને રાહુલનો ઈન્ટરવ્યૂ:
કોંગ્રેસના જિલ્લા અને શહેર પ્રમુખોની પસંદગી હવે એકદમ કડક અને પારદર્શક પ્રક્રિયા હેઠળ થશે. નિરીક્ષકો દ્વારા તૈયાર કરાયેલા અહેવાલોની ચકાસણી માટે રાહુલ ગાંધીએ બે ખાનગી એજન્સીઓને જવાબદારી સોંપી છે. આમાં એક ગુજરાતની અને એક ગુજરાત બહારની એજન્સીનો સમાવેશ થાય છે. આ એજન્સીઓ નિરીક્ષકોના અહેવાલોની સાથે સ્વતંત્ર સર્વે કરશે અને તેના આધારે જિલ્લા અને શહેર પ્રમુખોની પેનલ તૈયાર કરાશે. આ પેનલમાં સામેલ ઉમેદવારોનો રાહુલ ગાંધી દ્વારા વ્યક્તિગત ઈન્ટરવ્યૂ લેવામાં આવશે. આ ઈન્ટરવ્યૂમાં પાસ થનારા ઉમેદવારોને જ જિલ્લા, શહેર અથવા પ્રદેશ સ્તરે જવાબદારી સોંપવામાં આવશે.

મહિલા નેતૃત્વને પ્રોત્સાહન:
રાહુલ ગાંધીએ ગુજરાત કોંગ્રેસના નેતાઓને સ્પષ્ટ સૂચના આપી છે કે, પક્ષની પસંદગી પ્રક્રિયામાં સક્ષમ મહિલા નેતાઓને પ્રાધાન્ય આપવું. ઓછામાં ઓછા પાંચ જિલ્લાઓમાં મહિલા પ્રમુખોની નિમણૂક કરવાનો લક્ષ્યાંક નિર્ધારિત કરાયો છે. નિરીક્ષકોને સામાન્ય જનતા અને કાર્યકરોની પસંદગીને પ્રાધાન્ય આપવા અને સ્થાનિક સ્તરે સૌથી વધુ સ્વીકૃત નેતાઓની ઓળખ કરવા આદેશ આપવામાં આવ્યો છે.

નેતાઓને ટકોર - ‘ભાજપ સાથે સ્પર્ધા કરો, અંદરોઅંદર નહીં’:
બેઠક દરમિયાન રાહુલ ગાંધીએ ગુજરાત કોંગ્રેસના નેતાઓને સ્પષ્ટ શબ્દોમાં ટકોર કરી હતી કે, “આપણે ભાજપ સાથે સ્પર્ધા કરવાની છે, અંદરોઅંદરની લડાઈઓ નહીં કરવાની.” તેમણે નેતાઓને એકજૂથ થઈને પક્ષને મજબૂત કરવા અને ગ્રાઉન્ડ લેવલ પર કામ કરવા પ્રોત્સાહિત કર્યા.

આ સંગઠન સૃજન અભિયાન અને નવી પસંદગી પ્રક્રિયા ગુજરાત કોંગ્રેસ માટે એક નવો અધ્યાય શરૂ કરવાની દિશામાં મહત્વનું પગલું ગણાય છે. આ પ્રયાસથી કોંગ્રેસને ગુજરાતમાં નવી ઉર્જા અને સંગઠનાત્મક મજબૂતી મળવાની આશા છે.