ન્યુયોર્ક : લોકપ્રિય મ્યુઝિક સ્ટ્રીમિંગ એપ Spotify આજે વિશ્વભરના લાખો યુઝર્સ માટે બંધ થઈ ગયું છે. ડાઉનડિટેક્ટર અનુસાર, સવારે 9 વાગ્યાની આસપાસ આઉટેજ શરૂ થયો હતો, જેના કારણે યુઝર્સને એપ લોડ કરવામાં, ઓડિયો સ્ટ્રીમ કરવામાં અને વેબસાઈટ એક્સેસ કરવામાં મુશ્કેલી પડી રહી છે.

ડાઉનડિટેક્ટર પર અમેરિકાના લગભગ 50,000 થી વધુ Spotify યુઝર્સે આઉટેજની ફરિયાદ નોંધાવી છે. ન્યૂયોર્ક સિટી, લોસ એન્જલસ, હ્યુસ્ટન અને શિકાગો જેવા મોટા શહેરોમાં પણ સમસ્યા નોંધાઈ છે. માત્ર અમેરિકા જ નહીં, પરંતુ યુકે, યુરોપના કેટલાક ભાગો, ચીન અને દક્ષિણ અમેરિકાના યુઝર્સ પણ આ સમસ્યાનો સામનો કરી રહ્યા છે.

આ સમસ્યા એટલી ગંભીર છે કે Spotifyની સપોર્ટ વેબસાઈટ પણ ડાઉન થઈ ગઈ છે અને યુઝર્સને 'સર્વર એરર'નો મેસેજ દેખાઈ રહ્યો છે. વિશ્વભરમાં Spotifyના 675 મિલિયનથી વધુ યુઝર્સ છે અને તેમાંથી કેટલા પ્રભાવિત થયા છે તે હજુ સુધી જાણી શકાયું નથી.

Spotifyએ આ આઉટેજ સ્વીકાર્યું છે અને કહ્યું છે કે તેઓ યુઝર્સ તરફથી એપ લોડ ન થવાની અથવા પ્લેબેક સમસ્યાઓની રિપોર્ટ જોઈ રહ્યા છે. કંપનીએ એમ પણ જણાવ્યું છે કે કેટલાક યુઝર્સને સપોર્ટ સાઇટ એક્સેસ કરવામાં પણ તકલીફ પડી રહી છે.

Spotify યુઝર્સે આ સમસ્યા અંગે માહિતી મેળવવા અને પોતાની હતાશા વ્યક્ત કરવા માટે X (ટ્વિટર)નો સહારો લીધો છે. કેટલાક યુઝર્સે મજાકમાં કહ્યું કે Spotify ડાઉન હોવાથી તેઓ Apple Music પર સ્વિચ કરી રહ્યા છે. એક યુઝરે પોસ્ટ કર્યું કે 'કામ પર હોવ ત્યારે Spotify ડાઉન... આ મારું 13મું કારણ છે શા માટે!'. અન્ય એક યુઝરે શેર કર્યું કે 'હા Spotify ડાઉન છે. કેમ સીડી, વિનાઇલ અને યુટ્યુબ જરૂરી છે.'

કેટલાક સોશિયલ મીડિયા યુઝર્સે જણાવ્યું કે તેઓ ડાઉનલોડ કરેલા મ્યુઝિકને હજુ પણ પ્લે કરી શકે છે, પરંતુ તેઓ એપ પર આર્ટિસ્ટને સર્ચ કે જોઈ શકતા નથી. Spotifyએ સોશિયલ મીડિયા પ્લેટફોર્મ X પર એક પોસ્ટમાં કહ્યું, 'અમે હાલમાં કેટલીક સમસ્યાઓથી વાકેફ છીએ અને તેની તપાસ કરી રહ્યા છીએ.'

ડાઉનડિટેક્ટરના ડેટા અનુસાર, 61 ટકા સમસ્યાઓ એપને લગતી છે, 24 ટકા ઓડિયો સ્ટ્રીમિંગમાં અને 15 ટકા યુઝર્સે વેબસાઈટ સાથે સમસ્યાની જાણ કરી છે. Spotify દ્વારા આ સમસ્યાને ક્યારે ઠીક કરવામાં આવશે તેની રાહ જોવાઈ રહી છે, ત્યારે લાખો યુઝર્સ સંગીત વગર પરેશાન થઈ રહ્યા છે.