અમેરિકાના ઉપરાષ્ટ્રપતિ જેડી વાન્સ ૧૮ એપ્રિલથી ૨૪ એપ્રિલ દરમિયાન ઇટાલી અને ભારતની મુલાકાતે રહેશે. આ મુલાકાત દરમિયાન, તેઓ તેમની પત્ની ઉષા વાન્સ સાથે ભારત પહોંચશે, જેઓ દ્વિતીય મહિલા તરીકે પ્રથમ વખત ભારતની મુલાકાતે આવશે. આ દરમિયાન જેડી વાન્સ પીએમ મોદીને મળશે.

અત્રે ઉલ્લેખનીય છે કે ઉષા વાન્સના માતા-પિતા આંધ્રપ્રદેશના હતા, જેઓ પાછળથી અમેરિકા સ્થાયી થયા હતા. તેની માતા મોલેક્યુલર બાયોલોજીસ્ટ છે અને પિતા મિકેનિકલ એન્જિનિયર છે. હવે જ્યારે ઉષા વાન્સ ઉપરાષ્ટ્રપતિના પત્ની તરીકે ભારત આવી રહ્યા છે, ત્યારે તે તેમના માટે ખૂબ જ ખાસ ક્ષણ હશે. ઉષા વાન્સ તેના પતિ સાથે નવી દિલ્હી, જયપુર અને આગ્રાની યાત્રા કરશે

   ભારતની આ મુલાકાત એવા સમયે થઈ રહી છે જ્યારે ટ્રમ્પ વહીવટીતંત્ર દ્વારા લાદવામાં આવેલા ટેરિફ અંગે વિશ્વભરમાં એક નવી ચર્ચા શરૂ થઈ છે. યુએસ વેપાર નીતિમાં 'અમેરિકા ફર્સ્ટ' ના પુનરાગમનના સંકેતો છે અને ટેરિફ અને વેપાર અવરોધો ફરી એકવાર વૈશ્વિક મંચ પર વિવાદનો વિષય બન્યા છે. આ સંદર્ભમાં, વાન્સની ભારત મુલાકાત ખૂબ જ મહત્વપૂર્ણ માનવામાં આવી રહી છે.

    ભારત અને અમેરિકા હાલમાં 2025 સુધીમાં બહુ-ક્ષેત્રીય દ્વિપક્ષીય વેપાર કરારના પ્રથમ તબક્કા માટે વાટાઘાટો કરી રહ્યા છે. આ સંવાદને આગળ વધારવા માટે, વડા પ્રધાન નરેન્દ્ર મોદી અને રાષ્ટ્રપતિ ડોનાલ્ડ ટ્રમ્પ ફેબ્રુઆરીમાં વ્હાઇટ હાઉસ ખાતે મળ્યા હતા અને વરિષ્ઠ પ્રતિનિધિઓની નિમણૂક પર સંમત થયા હતા. 

 આ પછી, વાણિજ્ય મંત્રી પીયૂષ ગોયલના નેતૃત્વમાં ભારતીય પ્રતિનિધિમંડળે 3 થી 6 માર્ચ દરમિયાન અમેરિકાની મુલાકાત લીધી અને યુએસ વાણિજ્ય સચિવ અને વેપાર પ્રતિનિધિ સહિત ઘણા અધિકારીઓ સાથે વાતચીત કરી.