લખનૌ: ઉત્તર પ્રદેશમાં ફરી એકવાર ટ્રેનને પાટા પરથી ઉતારી પાડવાની સાજિશનો મામલો સામે આવ્યો છે. તાજો બનાવ લખનૌ જિલ્લાનો છે. બુધવારે લખનૌ-મુરાદાબાદ રેલ ટ્રેક પર રહીમાબાદ નજીક એક ટ્રેનના એન્જિન સાથે લાકડાનો એક મોટો ટુકડો અથડાયો હતો. ઘટનાની જાણ થતાં જ રેલવેના ઉચ્ચ અધિકારીઓ તાત્કાલિક ઘટનાસ્થળે પહોંચી ગયા છે અને સમગ્ર મામલાની તપાસ શરૂ કરી દેવામાં આવી છે. આ સાથે જ તપાસ એજન્સીઓને પણ આ ઘટના અંગે જાણ કરવામાં આવી છે.

પ્રાથમિક માહિતી અનુસાર, લખનૌ-મુરાદાબાદ રેલવે લાઇન પરથી પસાર થઈ રહેલા એક એન્જિન સાથે અચાનક લાકડાનો મોટો ટુકડો અથડાયો હતો. એન્જિન ડ્રાઇવરે તાત્કાલિક ટ્રેનને રોકી અને ઘટનાની જાણ ઉચ્ચ અધિકારીઓને કરી હતી. ઘટનાસ્થળે પહોંચેલા અધિકારીઓએ આસપાસના વિસ્તારની તપાસ હાથ ધરી છે અને આ લાકડાનો ટુકડો ટ્રેક પર કોણે અને કઈ પરિસ્થિતિમાં મૂક્યો તે અંગે માહિતી મેળવવાનો પ્રયાસ કરી રહ્યા છે.

ઉલ્લેખનીય છે કે ઉત્તર પ્રદેશમાં અગાઉ પણ ટ્રેનોને પાટા પરથી ઉતારી પાડવાની આવી કેટલીક ઘટનાઓ બની ચૂકી છે, જેને પગલે રેલવે તંત્ર હંમેશા એલર્ટ રહે છે. આ ઘટનાને પણ રેલવે તંત્ર ગંભીરતાથી લઈ રહ્યું છે અને તમામ પાસાઓ પર ઝીણવટભરી તપાસ કરવામાં આવી રહી છે. તપાસ પૂર્ણ થયા બાદ જ આ ઘટના પાછળનો અસલ હેતુ જાણી શકાશે. હાલમાં રેલવે પોલીસ અને અન્ય સુરક્ષા એજન્સીઓ પણ તપાસમાં જોડાઈ છે.