કર્ણાટકના રાજ્યપાલ થાવર ચંદ ગેહલોતે સરકારી કોન્ટ્રાક્ટમાં મુસ્લિમોને 4% અનામત આપતું બિલ રાષ્ટ્રપતિ દ્રૌપદી મુર્મુને મંજૂરી માટે મોકલ્યું છે. તેમણે કહ્યું કે બંધારણ ધર્મના આધારે અનામતની મંજૂરી આપતું નથી, તેથી તેમણે પોતાના અધિકારનો ઉપયોગ કરીને આ બિલ રાષ્ટ્રપતિને મોકલ્યું છે.

   આ બિલ ગયા મહિને વિધાનસભામાં પસાર થયું હતું, જેમાં 1 કરોડ રૂપિયા સુધીના સરકારી બાંધકામ કોન્ટ્રાક્ટમાં મુસ્લિમોને 4% અનામત આપવાનો પ્રસ્તાવ છે. રાજ્યપાલ ગેહલોતે કહ્યું કે આ જોગવાઈ બંધારણના અનુચ્છેદ ૧૪ (સમાનતા), ૧૫ (ધર્મના આધારે ભેદભાવ ન કરવો) અને ૧૬ (સમાન તક)નું ઉલ્લંઘન કરે છે. મુખ્યમંત્રી સિદ્ધારમૈયાએ આ બિલનો બચાવ કર્યો અને કહ્યું કે કોંગ્રેસ સરકારનો ઉદ્દેશ્ય સામાજિક અને આર્થિક રીતે નબળા વર્ગોને સશક્ત બનાવવાનો છે. તેમણે કહ્યું કે આ અનામત ફક્ત મુસ્લિમો માટે જ નહીં પરંતુ 1, 2A અને 2B જેવી અન્ય OBC શ્રેણીઓ માટે પણ છે, જેમાં મુસ્લિમોનો પણ સમાવેશ થાય છે.

  સિદ્ધારમૈયાએ આરોપ લગાવ્યો કે ભાજપે તેને "તુષ્ટિકરણ"નો મુદ્દો બનાવીને લોકોને ગેરમાર્ગે દોર્યા છે. તેમણે એમ પણ કહ્યું કે પહેલા આ કોન્ટ્રાક્ટ ફક્ત 50 લાખ રૂપિયા સુધીના હતા, પછી 1 કરોડ રૂપિયા અને હવે તેને વધારીને 2 કરોડ રૂપિયા કરવામાં આવ્યા છે.