ટયૂલિપ ગાર્ડનને હવે ગરમીનો ખતરોઃ શ્રીનગરમાં એશિયાનું સૌથી મોટું ટયૂલિપ ગાર્ડન બન્યું પ્રવાસીઓનું આકર્ષણ
વધતી જતી ગરમી ગાર્ડનની સુંદરતા માટે ખતરો બની રહી છેઃ શ્રીનગરમાં અત્યારે એપ્રિલમાં તાપમાન ૩૨ ડિગ્રી સેલ્સિયસ સુધી પહોંચ્યું: જે ટયૂલિપના ફૂલો માટે હાનિકારક
શ્રીનગરઃ શ્રીનગરનું ઇન્દિરા ગાંધી મેમોરિયલ ટયૂલિપ ગાર્ડન આ વર્ષે પ્રવાસીઓ માટે નવો રેકોર્ડ બનાવી રહ્યું છે. ૨૬ માર્ચ, ૨૦૨૫ના રોજ ખુલ્યા બાદ માત્ર ૨૦ દિવસમાં ૬,૭૧,૯૨૬ પ્રવાસીઓએ આ ગાર્ડનની મુલાકાત લીધી, જે ગાર્ડનના ઇતિહાસમાં અત્યાર સુધીની સૌથી વધુ સંખ્યા છે. જોકે, વધતી જતી ગરમી ગાર્ડનની સુંદરતા માટે ખતરો બની રહી છે, કારણ કે શ્રીનગરમાં એપ્રિલમાં તાપમાન ૩૨ ડિગ્રી સેલ્સિયસ સુધી પહોંચ્યું છે, જે ટયૂલિપના ફૂલો માટે હાનિકારક છે. ઝબરવાન પર્વતમાળાની તળેટીમાં અને ડલ લેકની સામે આવેલું આ ગાર્ડન ૫૫ હેક્ટરમાં ફેલાયેલું છે અને હાલમાં ૧.૭ મિલિયન ટયૂલિપ ફૂલોથી શણગારાયેલું છે. આ ફૂલો લાલ, પીળા, ગુલાબી, જાંબલી અને સફેદ રંગોના આકર્ષક સંયોજનથી ગાર્ડનને રંગીન ચિત્રમાં ફેરવી દે છે. આ વર્ષે ગાર્ડનમાં ૭૪ પ્રકારના ટયૂલિપ ઉપરાંત ડેફોડિલ, હાયસિન્થ અને રેનનકયુલસ જેવા અન્ય ફૂલો પણ પ્રદર્શિત કરવામાં આવ્યા છે.
રેકોર્ડબ્રેક પ્રવાસીઓની ભીડ
આ વર્ષે ગાર્ડનમાં ૨૭,૮૧૦ સ્થાનિક, ૩,૯૧,૯૧૮ દેશી પ્રવાસીઓ અને ૨,૧૯૮ આંતરરાષ્ટ્રીય પ્રવાસીઓએ મુલાકાત લીધી છે. ગત વર્ષોની સરખામણીએ આ આંકડો ઘણો ઊંચો છે. ૨૦૨૨ અને ૨૦૨૩માં ૩.૬૫ લાખ, ૨૦૨૪માં ૪.૪૫ લાખ પ્રવાસીઓએ મુલાકાત લીધી હતી, પરંતુ આ વર્ષે સિઝન પૂરી થાય તે પહેલાં જ ૬.૭૧ લાખનો આંકડો પાર થઈ ગયો છે. જમ્મુ-કાશ્મીરના મુખ્યમંત્રી ઓમર અબ્દુલ્લાએ ગાર્ડનનું ઉદ્ધાટન કર્યું હતું અને આને કાશ્મીરની કુદરતી સુંદરતાનો ઉત્સવ ગણાવ્યો હતો.
ગરમીનો ખતરો
ફ્લોરીકલ્ચર વિભાગના અધિકારીઓના જણાવ્યા અનુસાર, ટયૂલિપ ફૂલો ૧૫થી ૨૫ ડિગ્રી સેલ્સિયસના તાપમાનમાં ખીલે છે. જોકે, શ્રીનગરમાં આ વર્ષે એપ્રિલમાં તાપમાન ૩૨ ડિગ્રી સુધી પહોંચી ગયું છે, જેના કારણે ફૂલોનું આયુષ્ય ઘટી શકે છે. વિભાગે રાત્રે સિંચાઈ કરીને ફૂલોને બચાવવાના પ્રયાસો શરૂ કર્યા છે, કારણ કે દિવસે પાણીનો છંટકાવ ફૂલોને નુકસાન પહોંચાડી શકે છે.
પ્રવાસીઓ અને સ્થાનિકોનો ઉત્સાહ
ગુજરાતના પ્રવાસી સંદીપે જણાવ્યું, કાશ્મીરની આ મારી પ્રથમ મુલાકાત છે, અને ટયૂલિપ ગાર્ડનની સુંદરતાએ મને મંત્રમુગ્ધ કરી દીધો છે. આવો રંગબેરંગી નજારો મેં કયારેય જોયો નથી. યુનાઇટેડ કિંગડમના એક પ્રવાસીએ કહ્યું, આ ગાર્ડનની કુદરતી સુંદરતા અને કાશ્મીરી આતિથ્ય દરેક પ્રવાસી માટે અનુભવવા લાયક છે.
સ્થાનિક વેપારીઓ પણ આ ભીડથી ખુશ છે. ગાર્ડનની બહાર આઇસક્રીમની દુકાન ચલાવતા ઇલિયાસ અહદે જણાવ્યું, આ વર્ષે વેપાર ખૂબ સારો રહ્યો. કેટલાક દિવસે તો સાંજ પહેલાં જ મારો સ્ટોક ખૂટી જાય છે.
ટયૂલિપ ફેસ્ટિવલની ખાસિયત
ટયૂલિપ ફેસ્ટિવલ દરમિયાન ગાર્ડનમાં કાશ્મીરી સંસ્કળતિનું પ્રદર્શન પણ થાય છે. પરંપરાગત સંગીત, નળત્ય, હસ્તકલાની દુકાનો અને કાશ્મીરી વાનગીઓ જેવી કે રોગન જોશ અને કહવા પ્રવાસીઓને આકર્ષે છે. ગાર્ડનની એન્ટ્રી ફી પુખ્ત વ્યક્તિ માટે ૭૫ રૂપિયા અને બાળકો માટે ૨૫ રૂપિયા છે, અને તે સવારે ૯ થી સાંજે ૭ વાગ્યા સુધી ખુલ્લું રહે છે.
ભવિષ્યની આશા
જમ્મુ-કાશ્મીર પર્યટન વિભાગના અધિકારીઓએ આ રેકોર્ડબ્રેક ભીડને પર્યટન ક્ષેત્ર માટે મોટી સફળતા ગણાવી. તેમનું માનવું છે કે આ કાશ્મીરને સુરક્ષિત અને આકર્ષક સ્થળ તરીકે પ્રવાસીઓના વધતા વિશ્વાસને દર્શાવે છે. જોકે, વધતું તાપમાન ગાર્ડનના ફૂલો અને આગામી દિવસોની મુલાકાતો પર અસર કરી શકે છે, જે ચિંતાનો વિષય છે.
(3:46 PM IST)
છેલ્લા 8 દિવસમાં સૌથી લોકપ્રિય 
