નવી દિલ્હી: ભારત અને ચીન વચ્ચેના સંબંધોમાં આવી રહેલા સુધારા વચ્ચે શ્રદ્ધાળુઓ માટે એક સારા સમાચાર સામે આવ્યા છે. કોરોના મહામારી બાદ સ્થગિત કરવામાં આવેલી કૈલાશ માનસરોવર યાત્રા આગામી સમયમાં ફરી શરૂ થશે. ભારતના વિદેશ મંત્રાલયના પ્રવક્તા રણધીર જયસ્વાલે આ અંગે મહત્વપૂર્ણ માહિતી આપતા જણાવ્યું હતું કે આ વર્ષે યાત્રાનું આયોજન કરવામાં આવશે અને તેની તૈયારીઓ ચાલી રહી છે. ટૂંક સમયમાં જ આ અંગે સત્તાવાર જાહેર નોટિસ બહાર પાડવામાં આવશે.
ઉલ્લેખનીય છે કે કોવિડ-૧૯ રોગચાળાને કારણે ૨૦૨૦ થી કૈલાશ માનસરોવરની યાત્રા સ્થગિત કરવામાં આવી હતી, જેના કારણે હિન્દુ, જૈન અને બૌદ્ધ ધર્મના અનુયાયીઓમાં નિરાશા જોવા મળી રહી હતી. હવે વિદેશ મંત્રાલયના પ્રવક્તાના આ નિવેદનથી યાત્રા શરૂ થવાની સંભાવના પ્રબળ બની છે.
આ ઉપરાંત, ૨૬/૧૧ મુંબઈ હુમલાના આરોપી તહવ્વુર રાણાના પ્રત્યાર્પણ અંગે વાત કરતા તેમણે જણાવ્યું હતું કે પાકિસ્તાન ગમે તેટલા પ્રયત્નો કરે, પરંતુ વૈશ્વિક આતંકવાદના કેન્દ્ર તરીકેની તેની છબી બદલાશે નહીં. રાણાનું પ્રત્યાર્પણ પાકિસ્તાનને એ વાતની યાદ અપાવે છે કે તેણે હજુ પણ આ હુમલાના અન્ય ગુનેગારોને ન્યાયના કઠેડામાં લાવવા જોઈએ, જેમને તે આશ્રય આપી રહ્યું છે.
અગાઉ, વિદેશ મંત્રી એસ જયશંકરે પણ માનસરોવર યાત્રા અંગે સંકેત આપ્યા હતા અને જણાવ્યું હતું કે ૨૦૨૦ થી ૨૦૨૪ સુધીના તણાવપૂર્ણ સંબંધોને કારણે બંને દેશોને નુકસાન થયું છે, જેમાં સીધી ફ્લાઇટ્સ અને માનસરોવર યાત્રા પરના પ્રતિબંધો યથાવત છે. તેમણે આશા વ્યક્ત કરી હતી કે આ દિશામાં આગળ વધી શકાય છે.
ગત ઓક્ટોબર મહિનામાં ભારત અને ચીન વચ્ચે થયેલી અનેક તબક્કાની વાતચીત બાદ ડેપસાંગ મેદાનો અને ડેમચોકમાં પેટ્રોલિંગ વ્યવસ્થા અંગે સમજૂતી થઈ હતી. તે જ રીતે, ગયા વર્ષે બ્રિક્સ સમિટ દરમિયાન વડા પ્રધાન નરેન્દ્ર મોદી અને રાષ્ટ્રપતિ શી જિનપિંગ વચ્ચે પણ મુલાકાત થઈ હતી, જેમાં સરહદ વિવાદને ઉકેલવાની દિશામાં થયેલી પ્રગતિને આવકારવામાં આવી હતી. હવે આ સુધરતા સંબંધોની સીધી અસર કૈલાશ માનસરોવર યાત્રા પર જોવા મળી રહી છે, જે લાખો શ્રદ્ધાળુઓ માટે અત્યંત આનંદના સમાચાર છે.