News of Thursday, 24th April 2025
કાશ્મીરીઓની દરિયા દિલીઃ હોટલમાં રોકાયેલા હજારો પ્રવાસીઓને ખાવા-પીવાનું ફ્રીઃ વિનામૂલ્યે પરિવહન
એકાદ લાખ પ્રવાસી ફસાયેલા છેઃ જમ્મુ-શ્રીનગર હાઈવે શરૂ કરવા ભારે પ્રયાસોઃ ટ્રેન અને વિમાન દ્વારા કાશ્મીરમાંથી નિકળી રહયા છેઃ ભોજન, પાણી, રહેવાનું ભાડું માફ

શ્રીનગર, તા.૨૪: પહેલગામના બૈસરનમાં પ્રવાસીઓ પર થયેલા ક્રૂર હત્યાકાંડને કારણે સમગ્ર ખીણમાં ગુસ્સો છે. જો કે આ ઘટનામાં જીવ ગુમાવનારા લોકોના જીવ પાછા લાવી શકાતા નથી, પરંતુ સમગ્ર ખીણ આ ઘટનાના પીડિતો પ્રત્યે સંવેદના વ્યક્ત કરવા અને ખીણમાં આવેલા અન્ય પ્રવાસીઓને મદદ કરવા માટે એકત્ર થયું છે.
હોટલ અને ગેસ્ટ હાઉસમાં રોકાતા પ્રવાસીઓ માટે મફત લોન્ચિંગ અને ર્બોડિંગની વ્યવસ્થા કરવામાં આવી છે અને તેમને રેલ્વે સ્ટેશન અને એરપોર્ટ પર લઈ જવા માટે મફત વાહનોની વ્યવસ્થા કરવામાં આવી છે. અત્રે ઉલ્લેખનીય છે કે મંગળવારે બૈસરનમાં બનેલી આ ઘટના બાદ કાશ્મીર ખીણમાં હાજર પ્રવાસીઓ ગભરાઈ ગયા છે. આમાંના મોટાભાગના પ્રવાસીઓ પોતાના ઘરે પાછા ફરવાનો પ્રયાસ કરી રહ્યા છે, પરંતુ જમ્મુ-શ્રીનગર હાઇવે સતત બંધ રહેવાને કારણે પ્રવાસીઓ તેમ કરી શકતા નથી. આવી સ્થિતિમાં, તેઓ બનિહાલ-બારામુલા ટ્રેન અથવા ફ્લાઇટ દ્વારા પોતાના ઘરે પાછા ફરી રહ્યા છે. આ પરિસ્થિતિને કારણે, સ્થાનિક લોકોએ પોતાના સ્તરે મહેમાનોને મદદ કરવા માટે પ્રયાસો શરૂ કર્યા છે.
હાલમાં, હોટલોમાં રોકાતા પ્રવાસીઓ માટે ખોરાક, પીણા અને રહેવાની વ્યવસ્થા મફત કરવામાં આવી છે. કાશ્મીર હોટેલ અને રેસ્ટોરન્ટ એસોસિએશનના પ્રમુખ બાબર ચૌધરીએ આ વાતની પુષ્ટિ કરતા કહ્યું કે બૈસરન ઘટનાથી ઉભી થયેલી પરિસ્થિતિને કારણે, અમે હાલમાં સ્થાનિક હોટલ અને ગેસ્ટ હાઉસમાં રોકાતા પ્રવાસીઓ માટે ખાવા-પીવાની સુવિધા મફત કરી છે અને તેમના રહેઠાણનું ભાડું પણ માફ કરી દીધું છે.બાબરે કહ્યું કે હાલમાં અહીં એક લાખથી વધુ પ્રવાસીઓ હાજર છે. જોકે, પરિસ્થિતિને કારણે આજે સવારે ઘણા પ્રવાસીઓએ ચેક આઉટ કર્યું અને પોતાના ઘરે પાછા ફર્યા. જોકે, મોટાભાગના પ્રવાસીઓ હજુ પણ અહીં ફસાયેલા છે. તેઓ પોતાના ઘરે પાછા ફરી શકતા નથી, તેથી આવી સ્થિતિમાં અમે અહીં ફસાયેલા આ પ્રવાસીઓ પાસેથી ભોજન, પીણા અને હોટલમાં રહેવા માટે કોઈ ફી વસૂલતા નથી. જેથી આપણે તેમને થોડી મદદ કરી શકીએ.
પ્રવાસીઓને તેમના ઘરે પરત ફરવા માટે રેલ્વે સ્ટેશન અને શ્રીનગર એરપોર્ટ સુધી મફત ઓટો રિક્ષા સેવા ઉપલબ્ધ કરાવવામાં આવી છે. શ્રીનગરના લાલ ચોકમાં ક્લોક ટાવર પાસે લાલરુખ ઓટો સ્ટેન્ડે આ સેવા શરૂ કરી છે. સ્ટેન્ડ હેડ હિલાલ અહેમદે જણાવ્યું હતું કે અમારા સ્ટેન્ડ પર ૨૦ ઓટો રિક્ષા ઉપલબ્ધ છે અને અમે અમારા પ્રવાસીઓને રેલ્વે સ્ટેશન અને એરપોર્ટ પર લઈ જવા માટે આ બધી રિક્ષાઓ ગઈ કાલથી મફતમાં ઉપલબ્ધ રાખી છે. હિલાલે કહ્યું કે આજે સવારથી, અમે ૩૦૦ થી વધુ પ્રવાસીઓને રેલ્વે સ્ટેશન અને એરપોર્ટ પર લઈ ગયા છે અને તેમની પાસેથી કોઈ ચાર્જ વસૂલ્યો નથી. હિલાલે કહ્યું કે પરિસ્થિતિ સુધરે ત્યાં સુધી અમે અમારા મહેમાનો માટે આ સુવિધા ઉપલબ્ધ રાખીશું.
(2:23 PM IST)









છેલ્લા 8 દિવસમાં સૌથી લોકપ્રિય 
