<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Thursday, 24th April 2025

"પાકિસ્તાનથી આવેલા આ કૂતરાઓને..." - ઓવૈસીએ પહેલગામ હુમલા પર ઉઠાવ્યા બે સવાલ : ન્યાય કેવી રીતે મળશે તે જણાવ્યું

ઓવૈસીએ પહેલગામ આતંકવાદી હુમલાની સખત નિંદા કરી : આતંકવાદીઓના ખાત્માથી પીડિત પરિવારોને ન્યાય મળશે : આતંકવાદીઓ સરહદ કેવી રીતે પાર કરી ગયા અને તેમને આશ્રય આપનારા દેશો સામે કાર્યવાહીની માંગ કરી

નવી દિલ્હી: AIMIMના પ્રમુખ અસદુદ્દીન ઓવૈસીએ જમ્મુ-કાશ્મીરના પહેલગામના બૈસરનમાં મંગળવારે થયેલા આતંકવાદી હુમલાની આકરી નિંદા કરી છે. તેમણે કહ્યું કે આ આતંકવાદીઓના ખાત્માથી જ તેમાં માર્યા ગયેલા લોકોના પરિવારજનોને ન્યાય મળશે. ઓવૈસીએ પાકિસ્તાનથી આવેલા આ આતંકવાદીઓ સરહદ કેવી રીતે પાર કરી ગયા તે અંગે પણ સવાલ ઉઠાવ્યા છે. તેમણે આતંકવાદીઓને આશ્રય આપનારા દેશો સામે એકજુટ થઈને કાર્યવાહી કરવાની જરૂરિયાત પર ભાર મૂક્યો છે.
ઓવૈસીએ કહ્યું, "એવી જગ્યા જ્યાં ઘણા બધા પ્રવાસીઓ હતા, ત્યાં એક પણ પોલીસકર્મી કે CRPF કેમ્પ નહોતો. ક્વિક રિએક્શન ટીમ (QRT)ને ઘટનાસ્થળે પહોંચવામાં એક કલાકથી વધુ સમય લાગ્યો અને આ નીચોએ લોકોનો ધર્મ પૂછીને તેમને ગોળી મારી દીધી."
ઓવૈસીએ ઉઠાવ્યા સવાલ:
તેમણે કહ્યું કે તેઓ પાકિસ્તાનથી આવ્યા હતા અને પાકિસ્તાન તેમનું સમર્થન કરે છે. તેઓ સરહદ કેવી રીતે પાર કરી ગયા? આ માટે કોણ જવાબદાર છે? તેઓ પહેલગામ પહોંચી ગયા તો શ્રીનગર પણ પહોંચી શકે છે... જવાબદારી નક્કી થશે ત્યારે જ ન્યાય મળશે... અમે આતંકવાદી હુમલાની નિંદા કરીએ છીએ.
પીએમ પાસે સર્વપક્ષીય બેઠકની માંગ:
ઉલ્લેખનીય છે કે AIMIM પ્રમુખ અસદુદ્દીન ઓવૈસીએ ગુરુવારે વડાપ્રધાન નરેન્દ્ર મોદીને અપીલ કરી હતી કે પહેલગામ અંગે સર્વપક્ષીય બેઠક માટે સંસદમાં સભ્યોની સંખ્યાની પરવા કર્યા વિના તમામ રાજકીય પક્ષોને આમંત્રણ આપવામાં આવે.
ઓવૈસીએ સોશિયલ મીડિયા પર એક પોસ્ટમાં જણાવ્યું હતું કે તેમણે બુધવારે રાત્રે કેન્દ્રીય સંસદીય કાર્ય મંત્રી કિરેન રિજિજુ સાથે ફોન પર વાત કરી હતી અને તેમને કહેવામાં આવ્યું હતું કે NDA સરકાર ફક્ત 'પાંચ કે ૧૦ સાંસદો' ધરાવતા પક્ષોને આમંત્રણ આપવા પર વિચાર કરી રહી છે.
ઓવૈસીએ એ પણ કહ્યું કે જ્યારે તેમણે પૂછ્યું કે ઓછા સાંસદોવાળા પક્ષોને કેમ નહીં? તો કેન્દ્રીય મંત્રીએ જવાબ આપ્યો કે બેઠક 'ખૂબ લાંબી' થઈ જશે અને તેમણે મજાકમાં કહ્યું કે AIMIM નેતાઓનો અવાજ તો પણ ખૂબ મોટો છે.
ગુરુવારે સાંજે યોજાનારી બેઠકમાં કેન્દ્ર સરકાર વિવિધ રાજકીય પક્ષોના નેતાઓને પહેલગામ આતંકવાદી હુમલા વિશે માહિતી આપશે અને તેમના વિચારો સાંભળશે. સત્તાવાર સૂત્રોએ જણાવ્યું કે સંરક્ષણ મંત્રી રાજનાથ સિંહ અને ગૃહ મંત્રી અમિત શાહ નેતાઓને માહિતી આપશે. સિંહ બેઠકની અધ્યક્ષતા કરશે.
આતંકવાદીઓને જડબાતોડ જવાબ જરૂરી:
ઓવૈસીએ કહ્યું કે આ ભાજપ કે અન્ય કોઈ પાર્ટીની આંતરિક બેઠક નથી, પરંતુ આતંકવાદ અને આતંકવાદીઓને આશ્રય આપનારા દેશો સામે એક મજબૂત અને એકજુટ સંદેશ મોકલવા માટે એક સર્વપક્ષીય બેઠક છે. શું નરેન્દ્ર મોદી તમામ પક્ષોની ચિંતાઓ સાંભળવા માટે એક કલાક વધુ નહીં આપી શકે?

 

(7:09 PM IST)