પાકિસ્તાન સાથે વધતા તણાવ વચ્ચે સરકારે હોસ્પિટલોને દવાઓનો સ્ટોક કરવાનો આદેશ આપ્યો
જમ્મુ અને કાશ્મીરના પહેલગામમાં થયેલા આતંકવાદી હુમલા બાદ ભારત-પાકિસ્તાન સરહદને અડીને આવેલા વિસ્તારોમાં સુરક્ષા દળો હાઈ એલર્ટ પર : આગામી દિવસોમાં કોઈપણ અનિચ્છનીય ઘટનાને ધ્યાનમાં રાખીને જમ્મુની હોસ્પિટલોને તૈયાર રહેવાનો આદેશ આપવામાં આવ્યો
જમ્મુ તા.૨૬: પહેલગામ હુમલા બાદ ભારત અને પાકિસ્તાન વચ્ચે તણાવ ચરમસીમાએ પહોંચી ગયો છે. માહિતી અનુસાર, પાકિસ્તાને જમ્મુ ક્ષેત્રમાં ૨૦૦ કિલોમીટર લાંબી ભારત-પાક આંતરરાષ્ટ્રીય સરહદ પર ચેનાબ રેન્જર્સ તૈનાત કર્યા છે. પાકિસ્તાને સરહદ પર પોતાની તૈનાતી વધારી દીધા બાદ, ભારતીય સુરક્ષા દળો પણ હાઈ એલર્ટ પર છે. ગુપ્ત માહિતીના આધારે, અધિકારીઓએ કહ્યું છે કે કાશ્મીરી પંડિતો અને બિન-કાશ્મીરીઓ આતંકવાદીઓના નિશાના પર છે અને તેથી વિસ્તારના દરેક ઇંચની શોધ કરવામાં આવી રહી છે. દરમિયાન, કોઈપણ અનિચ્છનીય ઘટનાને ધ્યાનમાં રાખીને જમ્મુની હોસ્પિટલોને દવાઓનો સ્ટોક તૈયાર રાખવાનો આદેશ આપવામાં આવ્યો છે.
જમ્મુની સરકારી મેડિકલ કોલેજ અને હોસ્પિટલના અધિકારીઓએ તબીબી કર્મચારીઓને સતર્ક રહેવા અને જરૂરી દવાઓ અને સાધનો તૈયાર રાખવા જણાવ્યું છે. ગુરુવારે જીએમસીએચ જમ્મુના મેડિકલ સુપરિન્ટેન્ડેન્ટ દ્વારા જારી કરાયેલા આદેશમાં કહેવામાં આવ્યું છે કે, જમ્મુ અને કાશ્મીરમાં -વર્તમાન સરહદ પારના તણાવને ધ્યાનમાં રાખીને, બધા સ્ટાફ સભ્યોને સતર્ક રહેવા અને કોઈપણ સમયે ઊભી થઈ શકે તેવી કોઈપણ કટોકટીનો સામનો કરવા માટે સંપૂર્ણ તૈયારી સુનિﾍતિ કરવાનો નિર્દેશ આપવામાં આવે છે.
આદેશમાં વધુમાં કહેવામાં આવ્યું છે કે, GMCH ના સ્ટોર ઓફિસર અને સ્ટોર કીપરને વિનંતી કરવામાં આવે છે કે તેઓ કોઈપણ કટોકટીનો સામનો કરવા માટે તાત્કાલિક ઉપયોગ માટે તમામ આવશ્યક પુરવઠો, કટોકટી દવાઓ અને મહત્વપૂર્ણ સાધનો તૈયાર રાખે. આ આદેશમાં હોસ્પિટલના તમામ સ્ટાફને બિનજરૂરી રજાઓ ન લેવાની સલાહ આપવામાં આવી છે અને તેમને ફરજ પર સક્રિય રહેવા જણાવ્યું છે.
આ ઉપરાંત, કટોકટીની પરિસ્થિતિને ધ્યાનમાં રાખીને જમ્મુમાં ૨૪x૭ કંટ્રોલ રૂમ પણ સ્થાપિત કરવામાં આવ્યો છે. આ કંટ્રોલ રૂમ ચોવીસ કલાક કાર્યરત રહેશે અને કોઈપણ તાત્કાલિક જરૂરિયાત કે કટોકટીના કિસ્સામાં તેનો સંપર્ક કરી શકાય છે. કંટ્રોલ રૂમનો સંપર્ક આ નંબરો પર કરી શકાય છેઃ ૦૧૯૧-૨૫૮૨૩૫૫ અને ૦૧૯૧-૨૫૮૨૩૫૬.(૩૮.૮)
(10:04 AM IST)
છેલ્લા 8 દિવસમાં સૌથી લોકપ્રિય 
