નવી દિલ્હી: કાઉન્સિલ ફોર ધ ઇન્ડિયન સ્કૂલ સર્ટિફિકેટ એક્ઝામિનેશન્સ (CISCE) દ્વારા આજે ધોરણ 10 (ICSE) અને ધોરણ 12 (ISC) ની વર્ષ 2024-25 ની બોર્ડ પરીક્ષાનું પરિણામ જાહેર કરવામાં આવ્યું છે. સવારે 11 વાગ્યે પરિણામ ઓનલાઇન માધ્યમથી સત્તાવાર વેબસાઇટ cisce.org અને results.cisce.org પર પ્રકાશિત કરવામાં આવ્યું છે. પરિણામ જાહેર થયા બાદ વિદ્યાર્થીઓ તેમના યુનિક આઇડેન્ટિફિકેશન નંબર (UID) અને ઇન્ડેક્સ નંબર દાખલ કરીને તેમની માર્કશીટ ડાઉનલોડ કરી શકે છે. સત્તાવાર વેબસાઇટની સાથે સાથે વિદ્યાર્થીઓ ડિજિલોકરના માધ્યમથી પણ પોતાનું પરિણામ ચકાસી શકશે.
આ વર્ષે CISCE ની બોર્ડ પરીક્ષામાં કુલ 99,551 વિદ્યાર્થીઓએ ભાગ લીધો હતો, જેમાંથી 98,578 વિદ્યાર્થીઓએ સફળતા મેળવી છે. ધોરણ 10 (ICSE) નું પરિણામ 99.47% નોંધાયું છે, જ્યારે ધોરણ 12 (ISC) નું પરિણામ 98.19% રહ્યું છે. આ વર્ષે પણ છોકરીઓએ પરિણામમાં બાજી મારી છે. છોકરાઓનું પાસ થવાનું પ્રમાણ 98.64% છે, જ્યારે છોકરીઓનું પાસ થવાનું પ્રમાણ 99.45% નોંધાયું છે.
વિદ્યાર્થીઓ નીચે જણાવેલા પગલાં અનુસરીને તેમનું પરિણામ ચકાસી શકે છે:
 * સત્તાવાર વેબસાઇટ cisce.org ની મુલાકાત લો.
 * હવે કોર્સમાં ISC અથવા ICSE પસંદ કરો.
 * તમારો UID, ઇન્ડેક્સ નંબર અને કેપ્ચા કોડ દાખલ કરો.
 * 'Show Result' પર ક્લિક કરો.
 * હવે તમે તમારું પરિણામ જોઈ શકશો.
 * પરિણામની પ્રિન્ટઆઉટ લેવા માટે 'Print Result' બટન પર ક્લિક કરો.
પરિણામ જાહેર થયા બાદ જો કોઈ વિદ્યાર્થી મેળવેલા ગુણથી સંતુષ્ટ ન હોય તો તેઓ ઇમ્પ્રૂવમેન્ટ પરીક્ષામાં ભાગ લઈને પોતાના પરિણામમાં સુધારો કરી શકે છે. આ અંગેની વધુ માહિતી ટૂંક સમયમાં CISCE દ્વારા જાહેર કરવામાં આવશે.