પહેલગામ હુમલા બાદ ભારત પર ૧૦ લાખથી વધુ વખત થયો સાયબર હુમલો
પહેલગામની દુર્ઘટના પછી ડિજિટલ સુરક્ષાએ ખતરો અનુભવ્યો : સાર્વજનિક વેબસાઇટ્સ પર સાયબર હુમલાનો વરસાદઃ આતંકવાદી હુમલાથી સાયબર યુદ્ધ સુધીઃ ભારતમાં સુરક્ષા એલર્ટ
નવી દિલ્હી તા.૨: જમ્મુ અને કાશ્મીરના પહેલગામમાં ૨૨ એપ્રિલે થયેલા ભયાનક આતંકવાદી હુમલા પછી ભારતમાં સુરક્ષા અને સાયબર હુમલાઓ નો ખતરો વધી ગયો છે. આ હુમલાને પગલે દેશભરમાં ઉચ્ચ સ્તરીય બેઠકોનો દોર શરૂ થયો છે, અને સરકારે આતંકવાદ સામે કડક કાર્યવાહીની પ્રતિબદ્ધતા વ્યક્ત કરી છે. બીજી તરફ, મહારાષ્ટ્ર સાયબર પોલીસે ચોંકાવનારો ખુલાસો કર્યો છે કે પહેલગામમાં થયેલા હુમલા બાદ દેશભરમાં ૧૦ લાખથી વધુ સાયબર હુમલાઓ નોંધાયા છે. આ હુમલાઓ પાકિસ્તાન સહિત અન્ય દેશોમાંથી થયા હોવાનું જાણવા મળ્યું છે, જેના કારણે સાયબર યુદ્ધ (cyber war) ની શકયતા પણ ચર્ચાઈ રહી છે.
પહેલગામ હુમલાની વિગતો
ગત મહિને, ૨૨ એપ્રિલે, જમ્મુ-કાશ્મીરના પહેલગામની બૈસરણ ખીણમાં આતંકવાદીઓએ પ્રવાસીઓ પર હુમલો કર્યો હતો. આતંકવાદીઓએ નિઃશષા પ્રવાસીઓને નિશાન બનાવીને તેમના ધર્મ વિશે પૂછપરછ કરી અને ગોળીબાર કર્યો હતો. આ હુમલામાં ૨૬ પ્રવાસીઓના મોત થયા હતા, જ્યારે ૧૭ લોકો ગંભીર રીતે ઘાયલ થયા હતા. આ ઘટનાએ ભારત અને પાકિસ્તાન વચ્ચેના સંબંધોને ગંભીર રીતે અસર કરી છે, અને બંને દેશો વચ્ચે તણાવ યુદ્ધની સ્થિતિ સુધી પહોંચી ગઇ છે. આ હુમલાએ દેશની સુરક્ષા વ્યવસ્થા પર પણ ગંભીર સવાલો ઉભા કર્યા છે. જણાવી દઇએ કે, પહેલગામ હુમલા બાદ ભારત પર સાયબર હુમલાઓની સંખ્યામાં નોંધપાત્ર વધારો થયો છે. મહારાષ્ટ્ર સાયબર વિભાગના અધિક પોલીસ મહાનિર્દેશક યશસ્વી યાદવે જણાવ્યું કે, ૨૨ એપ્રિલ પછી ભારતીય વેબસાઇટ્સ અને ડિજિટલ પોર્ટલો પર ૧૦ લાખથી વધુ સાયબર હુમલાઓ નોંધાયા છે. આ હુમલાઓ પાકિસ્તાન, મધ્ય એશિયા, ઇન્ડોનેશિયા અને મોરોક્કો જેવા દેશોમાંથી કરવામાં આવ્યા હોવાનું જાણવા મળ્યું છે. ઘણા હેકિંગ ગ્રુપોએ પોતાને ઇસ્લામિક ગ્રુપો તરીકે ઓળખાવ્યા છે, જે આ હુમલાઓને સાયબર યુદ્ધનું સ્વરૂપ આપે છે.
સાયબર સેલની કાર્યવાહી
મહારાષ્ટ્ર સાયબર પોલીસે આ હુમલાઓને રોકવા માટે તાત્કાલિક પગલાં લીધાં છે. રાજ્ય પોલીસની સાયબર ક્રાઈમ તપાસ શાખાએ ઘણા હુમલાઓને નિષ્ફળ બનાવ્યા છે અને સાયબર સુરક્ષા મજબૂત કરવા માટે સતત કામ કરી રહી છે. વરિષ્ઠ સાયબર સેલના એક અધિકારીએ નોંધ્યું હતું કે ૨૨ એપ્રિલ પછી આ હુમલાઓની આવળત્તિમાં નોંધપાત્ર વધારો થયો છે, જે ભારતના ડિજિટલ માળખાને અસ્થિર કરવાના સંકલિત પ્રયાસનો સંકેત આપે છે.
સરકારનું વલણ અને આગળના પગલાં
ભારત સરકારે આતંકવાદ અને સાયબર હુમલાઓ સામે ઝીરો ટોલરન્સ નીતિ અપનાવી છે. સરકારે સ્પષ્ટ કર્યું છે કે આવા હુમલાઓનો કડક જવાબ આપવામાં આવશે. ઉચ્ચ સ્તરીય બેઠકોમાં સુરક્ષા એજન્સીઓ, સાયબર સેલ અને ગુપ્તચર વિભાગો સાથે સંકલન કરીને ભવિષ્યની રણનીતિ તૈયાર કરવામાં આવી રહી છે. આ ઉપરાંત, આંતરરાષ્ટ્રીય સ્તરે પણ આ મુદ્દે ચર્ચા કરવા માટે ભારતે પગલાં લીધાં છે, ખાસ કરીને પાકિસ્તાન સાથેના તણાવને ધ્યાનમાં રાખીને. ઉલ્લેખનીય છે કે, પહેલગામમાં થયેલો આતંકવાદી હુમલો અને તેના પગલે શરૂ થયેલા સાયબર હુમલાઓએ ભારતની સુરક્ષા વ્યવસ્થા માટે ગંભીર પડકારો ઉભા કર્યા છે. આ ઘટનાઓએ દેશની આંતરિક અને ડિજિટલ સુરક્ષાને મજબૂત કરવાની તાતી જરૂરિયાત દર્શાવી છે. સરકાર અને સાયબર સેલની સક્રિય કાર્યવાહી આશાસ્પદ છે, પરંતુ આવા હુમલાઓનો સામનો કરવા માટે લાંબા ગાળાની રણનીતિ અને આંતરરાષ્ટ્રીય સહયોગની જરૂર છે.
(10:29 AM IST)
છેલ્લા 8 દિવસમાં સૌથી લોકપ્રિય 
