નવી દિલ્હી: પહલગામમાં થયેલા આતંકવાદી હુમલા બાદ ભારત-પાકિસ્તાન સરહદ પર તણાવ યથાવત છે. LoC પર પાકિસ્તાની સેના દ્વારા સતત સીઝફાયરનું ઉલ્લંઘન કરવામાં આવી રહ્યું છે, જેનો ભારત પણ જડબાતોડ જવાબ આપી રહ્યું છે. આ તણાવ વચ્ચે ભારતીય વાયુસેનાએ ઉત્તર પ્રદેશના ગંગા એક્સપ્રેસ વે પર પોતાનું શૌર્ય પ્રદર્શિત કર્યું છે. IAF એ આ એક્સપ્રેસ વે પર લડાકુ વિમાનોની લેન્ડિંગ અને ટેક-ઓફની પ્રેક્ટિસ કરી છે.
શુક્રવારે ગંગા એક્સપ્રેસ વે પર બનેલી હવાઈ પટ્ટી પર ભારતીય વાયુસેનાના લડાકુ વિમાનોએ પ્રેક્ટિસ શરૂ કરી હતી. આકાશમાં સુખોઈ, રાફેલ અને જગુઆર જેવા લડાકુ વિમાનોની ગર્જનાથી દુશ્મન દેશ થરથરી ઉઠ્યો હતો. લડાકુ વિમાનોની ગર્જનાથી આસપાસનો વિસ્તાર ગુંજી ઉઠ્યો હતો અને લોકો પોતાના ઘરોમાંથી બહાર નીકળીને આકાશ તરફ જોવા લાગ્યા હતા. IAF નું આ શૌર્ય જોઈને દરેક ભારતીય ગર્વ અનુભવી રહ્યો હતો.
ઉત્તર પ્રદેશના શાહજહાંપુરમાં ભારતીય વાયુસેના (IAF) એ ગંગા એક્સપ્રેસ વે પર ફ્લાયપાસ્ટ કર્યું હતું. વાયુસેનાએ અહીં લડાકુ વિમાનો સાથે ટેક-ઓફ અને લેન્ડિંગની કવાયત કરી હતી. યુદ્ધ અથવા રાષ્ટ્રીય કટોકટીના સમયે વૈકલ્પિક રનવે તરીકે એક્સપ્રેસ વેની ક્ષમતાનું મૂલ્યાંકન કરવા માટે આ કવાયતનું આયોજન કરવામાં આવ્યું હતું. વાયુસેનાના લડાકુ વિમાનો દિવસના પ્રકાશની સાથે રાત્રે પણ ઉતરવા અને ઉડવાની પ્રેક્ટિસ કરશે.
એર ફોર્સે ગંગા એક્સપ્રેસ વે પર પોતાની તાકાત બતાવીને દુશ્મન દેશને જણાવી દીધું છે કે તેમની સાથે ટકરાવવાનું શું પરિણામ આવશે. IAF ના જવાનોએ 3.5 કિમી લાંબી હવાઈ પટ્ટી પર લડાકુ વિમાનોની લેન્ડિંગ અને ટેક-ઓફની પ્રેક્ટિસ કરી હતી. જો યુદ્ધ જેવી કટોકટીની સ્થિતિ સર્જાય, તો આ એક્સપ્રેસ વેની પટ્ટીનો ઉપયોગ વૈકલ્પિક એરપોર્ટ તરીકે થઈ શકે છે. રાત્રિના સમયે જ્યારે વિમાનો અહીં ઉતરશે, ત્યારે બેવર પીલીભીત માર્ગ પર કટરા અને જલાલાબાદ વચ્ચે ત્રણ કલાક સુધી વાહન વ્યવહાર પણ બંધ રહેશે.
નોંધનીય છે કે એક્સપ્રેસ વે પર ટ્રાયલ લેન્ડિંગ સવારે થવાની હતી, પરંતુ ખરાબ હવામાનને કારણે તેમાં થોડો વિલંબ થયો હતો. પહેલા આ પ્રેક્ટિસ સવારે 9:45 થી 10:30 સુધી થવાની હતી, પરંતુ તે સવારે 11 વાગ્યે શરૂ થઈ અને બપોરે 1 વાગ્યા સુધી ચાલી હતી, જ્યારે રાત્રે સાંજે 7 થી રાત્રે 10 વાગ્યાની વચ્ચે નાઇટ લેન્ડિંગ અને ટેક ઓફ કરાવવામાં આવશે. આમાં રાફેલ, જગુઆર અને મિરાજ જેવા વિમાનો સામેલ રહેશે.