નવી દિલ્‍હી,તા.૦૩: એન્‍ફોર્સમેન્‍ટ ડિરેક્‍ટોરેટના તાજેતરના અહેવાલ મુજબ, મુકદ્દમા અને સ્‍ટે ઓર્ડરને કારણે ૫૦,૦૦૦ કરોડ રૂપિયાથી વધુની સંપત્તિ જપ્ત કરવાની કાર્યવાહી અટકી પડી છે. આ મિલકતો ED દ્વારા મની લોન્‍ડરિંગ નિવારણ કાયદા હેઠળ કામચલાઉ રીતે જપ્ત કરવામાં આવી હતી.

તપાસ એજન્‍સીને પ્રિવેન્‍શન ઓફ મની લોન્‍ડરિંગ એક્‍ટ (PMLA) હેઠળ તપાસ દરમિયાન ગુનાની શંકાસ્‍પદ મિલકતોને કામચલાઉ રીતે જપ્ત કરવાની સત્તા છે. આવા કામચલાઉ આદેશને જારી કર્યાના ૧૮૦ દિવસની અંદર ઉપરોક્‍ત કાયદાનું સંચાલન કરતી ટ્રિબ્‍યુનલ દ્વારા પુષ્ટિ આપવી આવશ્‍યક છે. રિપોર્ટ અનુસાર, ૨૦૦૫ થી ૨૦૨૫ દરમિયાન PMLA અમલમાં આવ્‍યા પછી ચ્‍ઝ એ ૧.૫૫ લાખ કરોડ રૂપિયાની સંપત્તિ જપ્ત કરી છે, જેમાંથી ૨૦૨૪-૨૫ ના નાણાકીય વર્ષ સુધીમાં ટ્રિબ્‍યુનલ દ્વારા ૧.૦૭ કરોડ રૂપિયાની સંપત્તિની પુષ્ટિ કરવામાં આવી છે, પરંતુ કાનૂની અવરોધોને કારણે ૫૦ હજાર કરોડ રૂપિયાથી વધુની સંપત્તિ જપ્ત કરવાની પ્રક્રિયા હજુ પણ અટવાયેલી છે.

EDએ પોતાના રિપોર્ટમાં કહ્યું છે કે દેશભરમાં ૧૦૦ ખાસ PMLA કોર્ટ હોવા છતાં, મની લોન્‍ડરિંગ કેસોમાં ટ્રાયલ સમયસર પૂર્ણ થતી નથી. આમાં પ્રણાલીગત અને પ્રક્રિયાગત અવરોધો છે. ઘણી અદાલતો પર અન્‍ય કાયદાઓ હેઠળના કેસોનો બોજ વધુ પડતો હોય છે. અહેવાલમાં જણાવાયું છે કે ઘણીવાર વચગાળાની અરજીઓ, રિટ અરજીઓ અને જામીનના કેસ દાખલ કરવાથી ટ્રાયલ અવરોધાય છે. આમાંથી કેટલાક કેસો હાઇકોર્ટ અને સુપ્રીમ કોર્ટ સુધી પહોંચે છે, જે પીએમએલએ હેઠળના કેસોની સાતત્‍યતા અને ઝડપી નિકાલને અસર કરે છે.

દરમિયાન, ગયા ગુરુવારે ED ડે પર આયોજિત એક કાર્યક્રમમાં, એન્‍ફોર્સમેન્‍ટ ડિરેક્‍ટોરેટ (ED) ના ડિરેક્‍ટર રાહુલ નવીને જણાવ્‍યું હતું કે એજન્‍સીનો દોષિત ઠેરવવાનો દર ૯૩.૬ ટકા છે. કારણ કે અત્‍યાર સુધીમાં અદાલતો દ્વારા નક્કી કરાયેલા ૪૭ કેસમાંથી, ફક્‍ત ત્રણ કેસમાં જ આરોપીને નિર્દોષ જાહેર કરવામાં આવ્‍યા છે. એજન્‍સીના વડાએ કહ્યું કે તેઓ નિખાલસપણે સ્‍વીકારે છે કે પ્રિવેન્‍શન ઓફ મની લોન્‍ડરિંગ એક્‍ટ (PMLA) હેઠળ શરૂ કરાયેલી ઘણી તપાસ ઘણા લાંબા સમયથી પેન્‍ડિંગ હતી, પરંતુ આ વર્ષે અમારું ધ્‍યાન તપાસ પૂર્ણ કરવા અને અંતિમ ચાર્જશીટ ઝડપથી દાખલ કરવાના પ્રયાસો પર છે.