નવી દિલ્‍હી તા.૩: નેશનલ મેડિકલ કમિશન (NMC) દ્વારા રાજકોટની સરકારી મેડિકલ કોલેજને નિયત સમયમાં એન્‍યુઅલ ડિક્‍લેરેશન ફોર્મ ન ભરતાં ૫૦ હજાર રૂપિયાનો દંડ ફટકારવામાં આવ્‍યો છે. દેશની અંદાજે ૨૦થી વધુ કોલેજોને આ -કારની બેદરકારી બદલ દંડ કરવામાં આવ્‍યો છે, જેમાં ગુજરાતની એકમાત્ર રાજકોટની મેડિકલ કોલેજનો સમાવેશ થાય છે. આ ઉપરાંત પોસ્‍ટ ગ્રેજ્‍યુએશન કોર્સમાં પણ રાજકોટની મેડિકલ કોલેજ દ્વારા કોઇ વિગતો આપવામાં ન આવતાં વિષયદીઠ રૂ. ૫૦ હજારનો દંડ કરાયો છે. સુરતની મેડિકલ કોલેજને પણ પોસ્‍ટ ગ્રેજ્‍યુએશનમાં વિગતો ન આપવા બદલ વિષયદીઠ રૂ. ૫૦ હજારનો દંડ ભરવો પડે તેવી સ્‍થિતિ ઊભી થઇ છે.

નેશનલ મેડિકલ કમિશન દ્વારા દેશની તમામ મેડિકલ કોલેજોને અંડર ગ્રેજ્‍યુએશન કોર્સ માટે એન્‍યુઅલ ડિક્‍લેરેશન રિપોર્ટ (ADR) ઓનલાઇન જમા કરાવવા તાકીદ કરવામાં આવી હતી. કોલેજો દ્વારા નિયત મર્યાદામાં ઓનલાઇન વિગતો જમા કરાવી ન હોવાથી સળંગ બે વખત ઓનલાઇન ફોર્મ ભરવાની મુદતમાં વધારો પણ કરવામાં આવ્‍યો હતો. મહત્ત્વની વાત એ છે કે, મુદત વધારો કરવા છતાં હજુ સુધી સમગ્ર દેશની ૨૦થી વધુ મેડિકલ કોલેજોએ ઓનલાઇન કોઇપણ વિગતો જમા કરાવી નથી. આ કોલેજોમાં ગુજરાતની રાજકોટની મેડિકલ કોલેજનો પણ સમાવેશ થાય છે. મેડિકલ કમિશન દ્વારા સત્તાવાર નોટિસ જાહેર કરીને એવી સ્‍પષ્ટતા કરવામાં હતી કે, મેડિકલ કોલેજો દ્વારા જે પ્રકારની બેદરકારી દાખવામાં આવે છે તેને ગંભીરતાથી લેવામાં આવી છે. એટલું જ નહીં, ઓનલાઇન ફોર્મ ન ભરનારી રાજકોટની સરકારી મેડિકલ કોલેજ સહિત તમામ કોલેજને રૂ. ૫૦ હજારના દંડ સાથે આગામી ૯મી સુધીમાં ફોર્મ ભરવા આદેશ કરાયો છે. આ ઉપરાંત પોસ્‍ટ ગ્રેજ્‍યુએશન કોર્સમાં પણ તમામ મેડિકલ કોલેજોને ઓનલાઇન ડેટા રજૂ કરવા સૂચના આપવામાં આવી હતી. જેમાં પણ રાજકોટ મેડિકલ કોલેજે કોઇ વિગતો ભરી નથી. નેશનલ મેડિકલ કમિશને પોસ્‍ટ ગ્રેજ્‍યુએશન કોર્સ માટે વિષય દીઠ રૂ.૫૦ હજારના દંડ સાથે વિગતો ભરવા સૂચના આપી છે. મેડિકલ કોલેજો દ્વારા જુદા જુદા ૨૧ વિષયોમાં પોસ્‍ટ ગ્રેજ્‍યુએશનના કોર્સ ચલાવવામાં આવે છે. જે કોલેજ જેટલા પી.જી.કોર્સ ચલાવતી હોય તેટલા વિષયદીઠ રૂ. ૫૦ હજારના દંડ સાથે તમામ વિગતો ભરવાનો આદેશ કરાયો છે. પોસ્‍ટ ગ્રેજ્‍યુએશનમાં પણ સરકારી રાજકોટ મેડિકલ કોલેજ ઉપરાંત સુરતની મ્‍યુનિસિપલ કોર્પોરેશન સંચાલિત મેડિકલ કોલેજે પણ કોઈપણ પ્રકારની વિગતો રજૂ કરી નહોતી. હવે પી.જી. માટે વિષયદીઠ રૂ.૫૦ હજારભરીને આ તમામ કોલેજોએ નવેસરથી નેશનલ મેડિકલ કમિશનની વેબસાઇટ પર ઓનલાઇન ડેટા ભરવાના રહેશે. જે કોલેજ દંડ સાથે પણ વિગતો નહીં ભરે તેની સામે આગામી દિવસમાં અસરકારક પગલાં લેવાની પણ ચીમકી આપવામાં આવી છે. આમ, ગુજરાતમાં રાજકોટની મેડિકલ કોલેજે યુ.જી. અને પી.જી. અને સુરતની મેડિકલ કોલેજે પી.જી. કોર્સમાં ઓનલાઇન ડેટા રજૂ ન કરતાં હવે દંડાત્‍મક કાર્યવાહીનો સામનો કરવો પડે તેવી સ્‍થિતિ ઊભી થઇ છે.