નવી દિલ્હી: કેન્દ્ર સરકારે શનિવારે એક મહત્વપૂર્ણ નિર્ણય લેતા પાકિસ્તાનથી હવાઈ અને જમીની માર્ગે આવતી તમામ શ્રેણીની ટપાલ અને પાર્સલ સેવાઓ સ્થગિત કરી દીધી છે. સંચાર મંત્રાલય દ્વારા આ અંગે એક સૂચના જારી કરવામાં આવી છે.
આ નિર્ણય જમ્મુ અને કાશ્મીરના પહેલગામ જિલ્લામાં 22 એપ્રિલના રોજ થયેલા ભયાનક આતંકવાદી હુમલા બાદ લેવામાં આવ્યો છે, જેમાં 26 નાગરિકો માર્યા ગયા હતા.
સરકારે પાકિસ્તાન સામે અનેક પગલાં લીધા છે, જેમાં સિંધુ જળ સંધિ પર રોક લગાવવી, પાકિસ્તાની નાગરિકોને જારી કરાયેલા તમામ વિશેષ વિઝા રદ કરવા, પાકિસ્તાની એરલાઇન્સ માટે પોતાનું હવાઈ ક્ષેત્ર બંધ કરવું અને અમૃતસરમાં અટારી-વાઘા બોર્ડર બંધ કરવાનો પણ સમાવેશ થાય છે.