પ્રેસ ફ્રીડમ ઈન્ડેક્સઃ ૧૮૦ દેશોમાં ભારત ૧૫૧માં સ્થાને
નોર્વે પ્રથમ ક્રમેઃ ચીનમાં મીડિયાની સ્થિતિ અફઘાનિસ્તાન કરતાં પણ ખરાબ
પેરિસ તા.૩: પેરિસ સ્થિત ઈન્ટરનેશનલ એનજીઓ રિપોર્ટર્સ વિધાઉટ બોર્ડર્સના ૨૦૨૫ના વર્લ્ડ પ્રેસ ફ્રીડમ ઈન્ડેક્સમાં ભારતને ૧૮૦ દેશોમાંથી ૧૫૧મું સ્થાન સાંપડ્યું છે. આ રેન્કિંગમાં ગત વર્ષે ભારતનું સ્થાન ૧૫૯મું હતું. એટલે આ વર્ષના ભારતના રેન્કિંગમાં નજીવો સુધારો થયો છે. જોકે એકરીતે આ સ્થિતિ સારી ન ગણાય.
ઈન્ડેક્સમાં ઇરીટ્રિયા સૌથી નીચલા ક્રમે છે, જ્યારે નોર્વે પ્રથમ સ્થાન પર છે. ભૂતાન, પાકિસ્તાન, તુર્કીયે, પેલેસ્ટાઈન, ચીન, રશિયા, અફઘાનિસ્તાન, સીરિયા અને ઉત્તર કોરિયાનું રેન્કિંગ ભારત કરતાં નીચું છે.
રિપોર્ટર્સ વિધાઉટ બોર્ડર્સના રિપોર્ટમાં કહેવામાં આવ્યું છે કે, વર્લ્ડ પ્રેસ ફ્રીડમ ઈન્ડેક્સના આજ સુધીના ઇતિહાસમાં ઇકોનોમિક ઈન્ડિકેટર સૌથી નીચલા સ્તર પર છે. વિશ્વભરના મીડિયા હાઉસ આર્થિક મુશ્કેલીનો સામનો સામનો કરી રહ્યા છે.
ઈન્ફર્મેશનના સંસાધનો પર ગૂગલ, એપલ, ફેસબુક, એમેઝોન અને માઈક્રોસોફ્ટ જેવી ટેક કંપનીઓના દબદબાને લીધે મીડિયાને વધુ આર્થિક મુશ્કેલીઓનો સામનો કરવો પડી રહ્યો છે. પહેલા જે જાહેરાત મીડિયા આઉટલેટ્સને મળતી હતી, હવે એ જાહેરાતનો મોટો હિસ્સો ટેક પ્લેટફોર્મ્સને મળી રહ્યો છે. આ રિપોર્ટમાં કહેવામાં આવ્યું છે કે, કેટલાક દેશોમાં મીડિયા પર રાજકીય નેતાઓનો કંટ્રોલ છે. લેબનોન, ભારત અને આર્મેનિયા જેવા દેશોમાં મીડિયા આઉટ્લેટ્સ નેતાઓ અને બિઝનેસમેનોથી મળતી શરતોને આધિન ફંડિંગને લીધે પોતાનું અસ્તિત્વ જાળવી શકયા છે.
રિપોર્ટમાં એમ પણ દર્શાવવામાં આવ્યું છે કે, ડોનાલ્ડ ટ્રમ્પ સત્તામાં આવ્યા પછી અમેરિકામાં પ્રેસની સ્થિતિમાં નબળી થઈ છે. આ ઈન્ડેક્સમાં અમેરિકા ૫૭મા સ્થાન પર છે, જે ગત વર્ષે ૫૫ ક્રમે હતું.
જે ૪૨ દેશોમાં વિશ્વની અડધી વધુ વસ્તી રહે છે, ત્યાં પ્રેસની સ્થિતિ ખૂબ ગંભીર છે. એ દેશોમાં પ્રેસને લગભગ ન બરાબર આઝાદી છે. ત્યાં પત્રકારત્વ કરવું અત્યંત જોખમી છે.
આ રિપોર્ટમાં છેલ્લા ૧૮ મહિનાથી યુદ્ધનો સામનો કરી રહેલા પેલેસ્ટાઈનને ૧૬૩ ક્રમે રાખવામાં આવ્યું છે. રિપોર્ટમાં કહેવામાં આવ્યું છે કે, ગાઝામાં ઈઝરાયેલની સેનાએ કેટલાય ન્યૂઝરૂમોને તબાહ કરી નાખ્યા છે. ૨૦૨૩માં લડાઈ શરુ થયા પછી હમણા સુધી ગાઝામાં ૨૦૦થી વધુ પત્રકારો માર્યા ગયા છે.
બીજી તરફ ચીન અને વિએતનામ જેવા દેશોમાં મીડિયા પર સરકાર કે પછી સરકાર સાથે જોડાયેલા સંગઠનોનો કંટ્રોલ છે. જે લોકો સ્વતંત્ર પત્રકારત્વ કરે છે તેમને સતત ખતરાનો સામનો કરવો પડે છે. બીજી તરફ વિદેશી મીડિયા સંસ્થાઓને પણ બ્લેકલિસ્ટ કરવામાં આવે છે.
(3:00 PM IST)
છેલ્લા 8 દિવસમાં સૌથી લોકપ્રિય 
