શ્રીનગર: નેશનલ ઇન્વેસ્ટિગેશન એજન્સી (NIA)એ 22 એપ્રિલના રોજ પહેલગામમાં થયેલા આતંકવાદી હુમલાની તપાસને વધુ વિસ્તૃત કરી છે. આ હુમલામાં 26 નિર્દોષ લોકો માર્યા ગયા હતા, જેમાં મોટાભાગના પ્રવાસીઓ હતા. તપાસનો રેલો હવે જમ્મુ જેલ સુધી પહોંચ્યો છે, જ્યાં 2023ના રાજૌરી હુમલામાં સંડોવાયેલા બે આતંકવાદીઓ કેદ છે.
NIAના અધિકારીઓએ મુશ્તાક અને નિસાર નામના બે આતંકવાદીઓની પૂછપરછ કરી છે, જે એપ્રિલ 2023થી જમ્મુ જેલમાં બંધ છે. આ બંનેની 1 જાન્યુઆરી, 2023ના રોજ રાજૌરી જિલ્લામાં થયેલા આતંકવાદી હુમલાના સંબંધમાં ધરપકડ કરવામાં આવી હતી, જેમાં બે બાળકો સહિત સાત લોકો માર્યા ગયા હતા. ત્યારબાદ બીજા દિવસે IED બ્લાસ્ટ થયો હતો.
સૂત્રોના જણાવ્યા અનુસાર, NIAને શંકા છે કે મુશ્તાક અને નિસારને પહેલગામ હુમલાની યોજનાની જાણકારી હોઈ શકે છે અથવા તો તેમણે આ હુમલામાં મદદ કરી હોઈ શકે છે. NIA આ આતંકવાદી નેટવર્કને ઉજાગર કરવા માટે તમામ પાસાઓની તપાસ કરી રહી છે.
તપાસના ભાગરૂપે, NIAએ જમ્મુ અને કાશ્મીરના ઘણા સંવેદનશીલ સરહદી વિસ્તારો પર પણ ધ્યાન કેન્દ્રિત કર્યું છે. એજન્સીને આશંકા છે કે આ વિસ્તારોમાં સરહદ પારથી ઘૂસણખોરી થઈ શકે છે અને આતંકવાદીઓના છુપાઈ જવાના સ્થળો પણ હોઈ શકે છે.
આ સાથે, પહેલગામ હુમલામાં મદદ કરનારા 20થી વધુ શકમંદોની પણ પૂછપરછ કરવામાં આવી રહી છે. એક વરિષ્ઠ પોલીસ અધિકારીએ જણાવ્યું કે કલમ 370 હટાવ્યા બાદથી અત્યાર સુધીમાં સૌથી વધુ, 100થી વધુ લોકોની જાહેર સુરક્ષા કાયદા (PSA) હેઠળ અટકાયત કરવામાં આવી છે. આ કાયદા હેઠળ, વ્યક્તિને બે વર્ષ સુધી કોઈપણ ટ્રાયલ વિના કસ્ટડીમાં રાખી શકાય છે.
પહેલગામ હુમલાએ સમગ્ર દેશમાં ચિંતા ફેલાવી છે, કારણ કે આ હુમલો એક એવા પ્રવાસી સ્થળ પર થયો હતો જેને સુરક્ષિત માનવામાં આવતું હતું. નિયંત્રણ રેખા (LoC) પર તણાવ વધવાની સાથે, જમ્મુ અને કાશ્મીરના સુરક્ષા દળોને એલર્ટ કરી દેવામાં આવ્યા છે. ગુપ્તચર એજન્સીઓએ વધુ હુમલાની આશંકાને પગલે દેખરેખ અને ઘૂસણખોરી વિરોધી કાર્યવાહી વધારી દીધી છે.