દુબઈ: જોર્ડનના પબ્લિક સિક્યુરિટી ડિરેક્ટોરેટ (PSD)ના પ્રવક્તાએ જણાવ્યું કે, શનિવારે દક્ષિણ અમ્માનના અબુ અલંદા વિસ્તારમાં એક મસ્જિદ સાથે જોડાયેલા ગ્રાઉન્ડ-ફ્લોરના એપાર્ટમેન્ટમાં ભીષણ આગ લાગવાથી ચાર સગા ભાઈ-બહેનના ગંભીર રીતે દાઝી જવાથી મોત થયા છે, જ્યારે અન્ય બે બાળકો ઘાયલ થયા છે.
મૃત્યુ પામેલા બાળકોની ઉંમર 5 થી 10 વર્ષની વચ્ચે હતી. એક જ પરિવારના અન્ય બે બાળકો, જેની ઉંમર 2 અને 3 વર્ષ છે, તેમને ધુમાડાના કારણે શ્વાસ લેવામાં તકલીફ થઈ હતી. ઘટના સ્થળે તેમને પ્રાથમિક સારવાર આપવામાં આવી હતી અને ત્યારબાદ તાત્કાલિક અલ તુતાન્જી અને અલ બશીર સાર્વજનિક હોસ્પિટલમાં ખસેડવામાં આવ્યા હતા. PSDએ ઉમેર્યું કે તેઓ હાલમાં તબીબી સારવાર લઈ રહ્યા છે.
ઈસ્ટ અમ્માન સિવિલ ડિફેન્સ ડિપાર્ટમેન્ટની ફાયર અને રેસ્ક્યુ ટીમોએ તાત્કાલિક ઘટના સ્થળે પહોંચીને આગને કાબૂમાં લીધી હતી અને તેને વધુ ફેલાતી અટકાવી હતી. પ્રવક્તાએ જણાવ્યું કે જ્યારે ઇમરજન્સી ક્રૂ પહોંચ્યું ત્યારે મસ્જિદ સંકુલની અંદર આવેલો એપાર્ટમેન્ટ સંપૂર્ણપણે આગની લપેટમાં હતો.
આગ લાગવાનું કારણ જાણવા માટે હાલમાં તપાસ ચાલી રહી છે.