નવી દિલ્હી : સેન્ટ્રલ રિઝર્વ પોલીસ ફોર્સ એટલે કે CRPF એ તેના એક જવાન મુનીર અહેમદને પાકિસ્તાની મહિલા સાથેના લગ્ન છુપાવવા બદલ સેવામાંથી બરતરફ કર્યો છે, કારણ કે જવાનનું વર્તન રાષ્ટ્રીય સુરક્ષા માટે હાનિકારક હોવાનું જાણવા મળ્યું હતું. જવાન મુનીર અહેમદની છેલ્લી તૈનાતી દેશના મુખ્ય આંતરિક સુરક્ષા દળ CRPF ની 41મી બટાલિયનમાં હતી. સત્તાવાર સૂત્રોએ જણાવ્યું હતું કે જવાન મુનીર અહેમદને નિયમો હેઠળ સેવામાંથી બરતરફ કરવામાં આવ્યા છે, જેના હેઠળ તપાસની જરૂર નથી.

'મુનીર અહેમદને પાકિસ્તાની નાગરિક સાથેના લગ્ન છુપાવવા અને તેના વિઝાની માન્યતા કરતાં વધુ સમય માટે ઇરાદાપૂર્વક તેને આશ્રય આપવા બદલ તાત્કાલિક અસરથી સેવામાંથી બરતરફ કરવામાં આવ્યો છે. CRPF પ્રવક્તા ડેપ્યુટી ઇન્સ્પેક્ટર જનરલ (DIG) એમ દિનાકરણે જણાવ્યું હતું કે, 'તેમના કાર્યો સેવા આચારનું ઉલ્લંઘન અને રાષ્ટ્રીય સુરક્ષા માટે હાનિકારક હોવાનું જણાયું હતું.'

પહેલગામમાં આતંકવાદી હુમલા પછી લેવામાં આવેલા રાજદ્વારી પગલાંના ભાગ રૂપે ભારતે પાકિસ્તાની નાગરિકોને દેશ છોડી દેવાનું કહ્યું ત્યારે CRPF જવાન મુનીર અહેમદના મીનલ ખાન સાથેના લગ્ન પ્રકાશમાં આવ્યા હતા. બંનેએ ગયા વર્ષે 24 મેના રોજ વીડિયો કોલ દ્વારા લગ્ન કર્યા હતા. CRPF તપાસમાં જાણવા મળ્યું હતું કે જવાને તેના લગ્ન અને ભારતમાં તેના રોકાણ વિશે સંબંધિત અધિકારીઓને જાણ કરી ન હતી.