જમ્મુ: જમ્મુ રેલવે યાર્ડના રિમોડલિંગ કાર્યને કારણે છેલ્લા છ મહિનાથી રદ કરાયેલી લગભગ ૨૦ ટ્રેનોનું સંચાલન ફરી શરૂ થયું છે. આ કાર્ય ૧૬ નવેમ્બર, ૨૦૨૪થી શરૂ થયું હતું અને ૧ મે, ૨૦૨૫થી ટ્રેનો ફરી પાટે ચડી છે. જોકે, પહેલગામ નરસંહાર બાદ જમ્મુથી કાશ્મીર સુધીની રેલ સેવા શરૂ થવાનો મુદ્દો હજુ અટવાયો છે, જે હવે લોકો માટે ચર્ચાનો વિષય બન્યો છે.
ધ ઈન્ડિયન એક્સપ્રેસના અહેવાલ મુજબ, પહેલગામમાં ૨૨ એપ્રિલ, ૨૦૨૫ના રોજ થયેલા આતંકવાદી હુમલા બાદ કાશ્મીર માટેની વંદે ભારત ટ્રેનનું ઉદ્ઘાટન રદ કરાયું હતું. વડાપ્રધાન શ્રી નરેન્દ્રભાઈ મોદી દ્વારા ૧૯ એપ્રિલે આ ટ્રેનને લીલી ઝંડી બતાવવાની હતી, પરંતુ ખરાબ હવામાન અને સુરક્ષાની ચિંતાઓને કારણે તે શક્ય બન્યું નહીં. આ હુમલા બાદ રેલવેના ઈન્ફ્રાસ્ટ્રક્ચર પર આતંકવાદી ખતરાની ગુપ્તચર માહિતી મળી છે, જેના કારણે સુરક્ષાને પ્રાથમિકતા આપવામાં આવી રહી છે.
રેલવેના એક વરિષ્ઠ અધિકારીએ બીબીસી હિન્દીને જણાવ્યું કે, “સુરક્ષા ઓડિટ, વ્યવહારિકતા અને વીઆઈપીની ઉપલબ્ધતા જેવા મુદ્દાઓને ધ્યાનમાં લેવા જરૂરી છે. અનુકૂળ વાતાવરણ ન આવે ત્યાં સુધી ટ્રેનનું સંચાલન શરૂ થવામાં ત્રણ મહિનાનો વિલંબ થઈ શકે છે.” ૨૭૦ કિલોમીટર લાંબી ઉધમપુર-શ્રીનગર-બારામુલ્લા રેલ લાઈનનું ઔપચારિક ઉદ્ઘાટન હજુ બાકી છે, જોકે તેને ચાર મહિના પહેલાં વાણિજ્યિક સંચાલન માટે મંજૂરી મળી હતી.
ખાસ કરીને ૧૧૧ કિલોમીટરના બનિહાલ-કટરા ગલિયારાને ચાલુ કરવું મહત્વનું છે, જે ભૂકંપીય ઝોન ૫ અને ડુંગરાળ વિસ્તારોમાંથી પસાર થાય છે. હિન્દુસ્તાન ટાઈમ્સના જણાવ્યા મુજબ, જાન્યુઆરી ૨૦૨૫માં વંદે ભારત ટ્રેનનું સફળ પરીક્ષણ થયું હતું, પરંતુ હાલમાં આ ટ્રેનો જમ્મુ રેલવે યાર્ડમાં ઊભી રહી છે. એક સુરક્ષા અધિકારીએ એનડીટીવીને જણાવ્યું કે, “અમે સમગ્ર વિસ્તારમાં સુરક્ષા વધારી દીધી છે અને ૪૮ પર્યટન સ્થળોને બંધ કરી દેવાયા છે.”
આમ, જમ્મુથી રેલ સેવાઓ શરૂ થઈ હોવા છતાં, કાશ્મીર સુધીની રેલ યાત્રા માટે હજુ રાહ જોવી પડશે.