જમ્મુ: પહેલગામમાં ૨૨ એપ્રિલ, ૨૦૨૫ના રોજ થયેલા આતંકવાદી હુમલાએ કાશ્મીરના પર્યટન ઉદ્યોગને ભારે ફટકો આપ્યો છે. એનડીટીવીના અહેવાલ મુજબ, ગુલમર્ગ, પહેલગામ, સોનમર્ગ અને શ્રીનગર જેવા લોકપ્રિય પર્યટન સ્થળો પર બુકિંગમાં ૯૦થી ૯૫ ટકાનો ઘટાડો થયો છે. આ હુમલાએ બે વર્ષથી ચાલી રહેલી પર્યટકોની ભીડને ખતમ કરી દીધી છે, જેના કારણે હજારો વ્યવસાયો અનિશ્ચિતતાનો સામનો કરી રહ્યા છે.
ગુલમર્ગ હોટેલિયર્સ એસોસિયેશનના અધ્યક્ષ આકિબ છાયાએ ધ ઈન્ડિયન એક્સપ્રેસને જણાવ્યું, “અમારી હોટેલો, જે હંમેશા ભરેલી રહેતી હતી, હવે લગભગ ખાલી છે. બુકિંગ રદ થઈ રહ્યા છે અને નવા બુકિંગ શૂન્ય છે.” એક્સ પરના પોસ્ટ્સ અનુસાર, આ હુમલાએ શિકારા ચાલકો, હાઉસબોટ માલિકો, ટેક્સી ડ્રાઈવરો અને નાના વેપારીઓ જેવા પર્યટન પર નિર્ભર લોકોની આજીવિકા પર ગંભીર અસર કરી છે. ડાલ લેઈક ઉ પર શિકારા ચલાવતા બશીર અહમદે કહ્યું, “આ ઉદ્યોગ અમને રોટી આપે છે, પણ હવે દિવસો સુધી ગ્રાહકો નથી આવતા.”
જમ્મુ અને કાશ્મીર પર્યટન વિભાગે સ્થિતિને નિયંત્રણમાં લેવા પર્યટન સેવા પ્રદાતાઓને અગાઉથી બુકિંગ કરનાર પર્યટકોને સંપૂર્ણ રિફંડ આપવા અને રદ ફી માફ કરવાનો આદેશ આપ્યો છે. જોકે, અન્ય એક અહેવાલ મુજબ, આ નિર્ણયથી સ્થાનિક વ્યવસાયીઓનું નાણાકીય દબાણ વધ્યું છે. પહેલગામના એક હોટેલ વ્યવસાયીએ જણાવ્યું, “અમે કાશ્મીરની મહેમાનનવાજીની છબી જાળવવા માંગીએ છીએ, પરંતુ સરકાર તરફથી કોઈ વળતર કે સમર્થન વિના આ નુકસાન સહન કરવું મુશ્કેલ છે.”
એક પોસ્ટમાં જણાવાયુ કે, “છેલ્લા થોડા વર્ષોમાં બેંક લોનથી ૫૦૦થી વધુ નવી હોટેલો બની છે. હવે આવક ન હોવાથી આ લોન કેવી રીતે ચૂકવીશું?” પર્યટન ઉદ્યોગ, જે જમ્મુ અને કાશ્મીરના જીડીપીમાં ૭થી ૮ ટકા યોગદાન આપે છે, હવે મુશ્કેલીમાં છે. હિતધારકો સરકાર પાસે સુરક્ષા આશ્વાસનો અને પ્રચાર અભિયાનો સાથે પુનરુદ્ધાર યોજનાની માંગ કરી રહ્યા છે.