સાન ડિએગો (યુએસએ) : અમેરિકાના સાન ડિએગો શહેર નજીક દરિયા કિનારે પેસિફિક મહાસાગરમાં ગેરકાયદેસર રીતે સ્થળાંતર કરનારાઓને લઈ જતી એક નાનકડી હોડી પલટી જતાં એક કરુણ દુર્ઘટના સર્જાઈ છે. આ દુર્ઘટનામાં ત્રણ લોકોના મોત થયા છે, જ્યારે બે ભારતીય બાળકો સહિત સાત અન્ય લોકો ગુમ થયા હોવાના સમાચાર સામે આવ્યા છે. સોમવારે કેલિફોર્નિયાના સાન ડિએગો શહેરના ડાઉનટાઉનથી લગભગ ૧૫ માઈલ ઉત્તરમાં, ટોરી પાઇન્સ સ્ટેટ બીચ નજીક ઓછામાં ઓછા ૧૬ લોકોને લઈ જતી આ હોડી અચાનક પલટી ગઈ હતી.
યુએસ કોસ્ટ ગાર્ડે આ ઘટના અંગે એક સત્તાવાર નિવેદન જાહેર કર્યું છે. નિવેદનમાં જણાવ્યા અનુસાર, "કોસ્ટ ગાર્ડ સેક્ટર સાન ડિએગોના વોચસ્ટેન્ડર્સે સવારે લગભગ ૬:૩૦ વાગ્યે સ્થાનિક ડિસ્પેચમાંથી પંગા-સ્ટાઈલની બોટ પલટી ગઈ હોવાના અહેવાલ મેળવ્યા હતા. શરૂઆતમાં ત્રણ વ્યક્તિઓ બેભાન હાલતમાં મળી આવ્યા હતા અને વધુ ચાર લોકોને તાત્કાલિક તબીબી સહાયની જરૂર હતી." નિવેદનમાં વધુમાં જણાવાયું છે કે ઘટનાસ્થળે પહોંચેલા પ્રથમ પ્રતિભાવકર્તાઓએ ઈજાગ્રસ્ત બચી ગયેલા લોકો સાથે વાતચીત કર્યા બાદ નક્કી કર્યું કે લગભગ સાત જેટલા લોકો હજુ પણ ગુમ છે. કોસ્ટ ગાર્ડ સેક્ટર સાન ડિએગો વોચસ્ટેન્ડર્સે તાત્કાલિક કાર્યવાહી હાથ ધરીને ઍર સ્ટેશન સાન ડિએગો MH-૬૦ જેહોક હેલિકોપ્ટર, સ્ટેશન સાન ડિએગો ૪૫-ફૂટ રિસ્પોન્સ બોટ-મીડિયમ, ઍર સ્ટેશન સેક્રામેન્ટો C-૨૭ સ્પાર્ટન ઍરક્રાફ્ટ અને કટર સી ઓટરને ગુમ થયેલા વ્યક્તિઓની શોધમાં મદદ કરવા માટે ઘટનાસ્થળે મોકલવાનો આદેશ આપ્યો હતો.
સાન ફ્રાન્સિસ્કોમાં ભારતના કોન્સ્યુલેટ જનરલે આ દુર્ઘટના અંગે સોશિયલ મીડિયા પ્લેટફોર્મ X પર એક પોસ્ટ દ્વારા ઊંડું દુઃખ વ્યક્ત કર્યું છે. તેમણે જણાવ્યું હતું કે, "આજે સવારે કેલિફોર્નિયાના સાન ડિએગો નજીક દરિયા કિનારે ટોરી પાઈન્સ સ્ટેટ બીચ નજીક બોટ પલટી જવાની દુઃખદ ઘટના વિશે જાણીને અમને ખૂબ જ દુઃખ થયું છે. આ દુર્ઘટનાથી એક ભારતીય પરિવાર પણ પ્રભાવિત થયો છે. જ્યારે બે ભારતીય બાળકો ગુમ છે, ત્યારે તેમના માતા-પિતા સ્ક્રિપ્સ મેમોરિયલ હૉસ્પિટલ લા જોલામાં સારવાર લઈ રહ્યા છે." કોન્સ્યુલેટે વધુમાં જણાવ્યું હતું કે તેઓ સ્થાનિક અધિકારીઓ સાથે સતત સંપર્કમાં છે અને અસરગ્રસ્ત ભારતીય પરિવારને તમામ જરૂરી સહાય પૂરી પાડવા માટે પ્રતિબદ્ધ છે. મિશને આ દુર્ઘટનાના પીડિતો પ્રત્યે પોતાની ઊંડી સંવેદના વ્યક્ત કરી હતી અને તેમના માટે પ્રાર્થના કરી હતી.
કોસ્ટ ગાર્ડના એક અધિકારીએ સ્થાનિક ન્યૂઝ ચેનલને માહિતી આપતાં જણાવ્યું હતું કે તેઓ આ ઘટનાને શંકાસ્પદ માનવ તસ્કરીના કેસ તરીકે ગણી રહ્યા છે અને તે દિશામાં પણ તપાસ હાથ ધરી છે. અધિકારીઓએ જણાવ્યું હતું કે આ ઘટનામાં ઘાયલ થયેલા ચાર લોકોને તાત્કાલિક સારવાર માટે નજીકની હોસ્પિટલોમાં ખસેડવામાં આવ્યા છે. એન્સિનિટાસના ડેપ્યુટી ફાયર ચીફ જોર્જ સાંચેઝે સીએનએનને જણાવ્યું હતું કે ઘાયલોને થયેલી ઈજાઓ હળવાથી લઈને ગંભીર સુધીની છે. કોસ્ટ ગાર્ડે સોમવારે રાત્રે ગુમ થયેલા લોકોની શોધખોળ કામચલાઉ ધોરણે સ્થગિત કરી દીધી હતી, પરંતુ આજે સવારથી ફરીથી શોધખોળ શરૂ કરવામાં આવી છે.