ભારત અને પાકિસ્તાન વચ્ચે વધી રહેલા તણાવ વચ્ચે, વિદેશ મંત્રી એસ જયશંકર ગુરુવારે તેમના ઈરાની સમકક્ષ અબ્બાસ અરાઘચીને મળશે. ભારત અને ઈરાન વચ્ચે 20મી સંયુક્ત આયોગની બેઠકની સહ-અધ્યક્ષતા કરવા માટે અરાઘચી 7 અને 8 મેના રોજ ભારતની મુલાકાત લેશે

ઓગસ્ટ 2024 માં પદ સંભાળ્યા પછી ઈરાની વિદેશ મંત્રીની આ પહેલી ભારત મુલાકાત છે. બંને વિદેશ મંત્રીઓ વચ્ચેની વાતચીતમાં ભારત અને પાકિસ્તાન વચ્ચે વધતા તણાવ પર પણ ચર્ચા થવાની ધારણા છે. 

વિદેશ મંત્રાલયે એક નિવેદનમાં જણાવ્યું હતું કે, 'ભારત-ઈરાન મિત્રતા સંધિ પર હસ્તાક્ષરની 75મી વર્ષગાંઠ નિમિત્તે યોજાઈ રહેલી સંયુક્ત કમિશનની બેઠકમાં બંને દેશો વચ્ચેના પરસ્પર હિતના મુદ્દાઓ અને દ્વિપક્ષીય સંબંધોને મજબૂત બનાવવાના વધુ રસ્તાઓની સમીક્ષા કરવામાં આવશે.

 ભારતે પાકિસ્તાનમાં ઘણા આતંકવાદી ઠેકાણાઓ પર હુમલો કર્યો છે. ભારતીય સેનાએ તેને ઓપરેશન સિંદૂર નામ આપ્યું છે. ભારત અને પાકિસ્તાન વચ્ચેનો તણાવ ચરમસીમાએ પહોંચી ગયો છે. પાકિસ્તાનમાં આતંકવાદી ઠેકાણાઓ પર ભારત દ્વારા કરવામાં આવેલા હવાઈ હુમલાએ બંને દેશોને યુદ્ધની અણી પર લાવી દીધા છે. 

પહેલગામ આતંકવાદી હુમલાના જવાબમાં ભારતનું ઓપરેશન સિંદૂર હાથ ધરવામાં આવ્યું છે. પહેલગામ આતંકવાદી હુમલામાં 26 લોકોએ જીવ ગુમાવ્યા હતા. ભારતે આ હુમલા માટે પાકિસ્તાન સમર્થિત આતંકવાદી સંગઠનો, જેમ કે જૈશ-એ-મોહમ્મદ અને લશ્કર-એ-તૈયબાને જવાબદાર ઠેરવ્યા હતા