ભારતે પાકિસ્તાન પર બદલો લેવાના હુમલા શરૂ કર્યા છે. ભારતે લાહોર અને સિયાલકોટ સહિત પાકિસ્તાનના ઘણા શહેરો પર હુમલા શરૂ કર્યા છે. પાકિસ્તાન દ્વારા ભારતના જમ્મુ, પંજાબ, રાજસ્થાનમાં કરવામાં આવેલા હુમલાના જવાબમાં, ભારતે પાકિસ્તાનના શહેરો પર મિસાઇલ હુમલા શરૂ કર્યા છે. તેના બદલામાં, ભારતે લાહોરમાં સ્થિત પાકિસ્તાનના AWACS (એરબોર્ન વોર્નિંગ એન્ડ કંટ્રોલ સિસ્ટમ) ને તોડી પાડ્યું છે. આ ઉપરાંત, ભારતે પાકિસ્તાનના ફૈસલાબાદ, સરગોધા, મુલતાન અને સિયાલકોટ શહેરોમાં સંરક્ષણ પ્રણાલીનો પણ નાશ કર્યો છે.

  ભારતે બદલો લેવા માટે પાકિસ્તાનના કુલ 3 ફાઇટર પ્લેનને તોડી પાડ્યા હતા. ભારત દ્વારા તોડી પાડવામાં આવેલા પાકિસ્તાની ફાઇટર જેટમાં બે JF-17 અને એક F-16નો સમાવેશ થાય છે. ગુરુવારે અંધારું થતાં જ પાકિસ્તાને સરહદ નજીક ભારતના વિવિધ શહેરોમાં 100 થી વધુ મિસાઇલો છોડી હતી. પાકિસ્તાને ફક્ત રાજસ્થાનના જેસલમેરમાં જ 70 થી વધુ મિસાઇલ હુમલા કર્યા હતા. જોકે, ભારતની વાયુ સંરક્ષણ પ્રણાલીએ પાકિસ્તાનની બધી મિસાઇલોને હવામાં જ તોડી પાડી હતી. ભારતની બધી સંરક્ષણ પ્રણાલીઓ આ સમયે પાકિસ્તાનના દરેક નાપાક ઈરાદાનો જવાબ આપવા માટે સંપૂર્ણપણે સક્રિય છે અને પાકિસ્તાનની દરેક ગતિવિધિ પર નજર રાખી રહી છે.

  ભારત અને પાકિસ્તાન વચ્ચે ચાલી રહેલા યુદ્ધ વચ્ચે, નવી દિલ્હીમાં ભારતના વડા પ્રધાન નરેન્દ્ર મોદી અને રાષ્ટ્રીય સુરક્ષા સલાહકાર અજિત ડોભાલની એક મહત્વપૂર્ણ બેઠક ચાલી રહી છે. પીએમ મોદી, એનએસએ ડોભાલ આ સમગ્ર કાર્યવાહી પર નજર રાખી રહ્યા છે અને દરેક ક્ષણે રિપોર્ટ લઈ રહ્યા છે. ભારતના વિદેશ પ્રધાન એસ. જયશંકરે યુરોપિયન યુનિયન સાથે આ સમગ્ર બાબતની ચર્ચા કરી છે. વિદેશ પ્રધાને યુરોપિયન યુનિયનને કહ્યું કે ભારત કોઈપણ ઉશ્કેરણીનો યોગ્ય જવાબ આપશે.

ભારતે જવાબી લશ્કરી કાર્યવાહીમાં પાકિસ્તાનના અત્યાધુનિક એરબોર્ન વોર્નિંગ એન્ડ કંટ્રોલ સિસ્ટમ (AWACS) વિમાનને તોડી પાડ્યું છે. આ કાર્યવાહી ભારતીય વાયુસેના દ્વારા સરહદ નજીક હાથ ધરવામાં આવેલા ઉચ્ચ સ્તરીય હવાઈ સંરક્ષણ કામગીરીનો એક ભાગ હતી. આ વિમાનને પાકિસ્તાનની દેખરેખ અને યુદ્ધ નિયંત્રણ ક્ષમતાઓનો એક મહત્વપૂર્ણ ભાગ માનવામાં આવે છે, તેને તોડી પાડીને ભારતે દુશ્મનના વ્યૂહાત્મક ફાયદાને ગંભીર નુકસાન પહોંચાડ્યું છે.

AWACS વિમાનને તોડી પાડવાથી પાકિસ્તાનની હવાઈ દેખરેખ અને સંદેશાવ્યવહાર સંકલન પ્રણાલીને મોટો ફટકો પડ્યો છે. આ કાર્યવાહી પછી, ભારતીય સુરક્ષા એજન્સીઓ અને વાયુસેનાની તૈયારીઓ વધુ મજબૂત બનાવવામાં આવી છે, અને સરહદી વિસ્તારોમાં હવાઈ સંરક્ષણને વધુ કડક બનાવવામાં આવ્યું છે. આ ભારતની સ્પષ્ટ લશ્કરી ચેતવણી છે કે કોઈપણ પ્રકારની ઘૂસણખોરી અથવા હિંમતનો યોગ્ય જવાબ આપવામાં આવશે.